Sant Marc 13 - Testamant Nevez 1897 (Jenkins)

CHABISTR XIII.

¹ Pa oa Jesus o vond er meaz euz an templ, unan euz he ziskibien a lavaraz dezhan: Mestr, sell pebez mein ha pebez edifisou kaer!

² Ha Jesus a respontaz hag a lavaraz dezhan: Gwelet a rez‐te an edifisou kaer‐ze; na vezo lezet mean var vean hep na vezo diskaret.

³ Ha pa edo azezet var menez Olived, dirag an templ, Per, Jakes, Ian hag Andre a reaz a‐gostez ar goulen‐man diganthan:

⁴ Lavar deomp peur e c’hoarvezo an traou‐ze, ha dre be seurt sin e vezo gouezet ez int prest da erruout?

⁵ Ha Jesus, o respont, a gommansaz lavaret: Diwallit na zeufe den d’ho trompla.

⁶ Rag dond a rai kalz em hano hag a lavaro: Me eo ar C’hrist; ha kalz a vezo tromplet ganthe.

⁷ Hogen, pa glevot komz a vrezel hag a vrud‐brezel, na vezit ket troublet; rag red eo da gement‐se c’hoarvezout; mes ne vezo ket c’hoas ar fin.

⁸ Rag sevel a rai eur bobl a‐enep eur bobl all, hag eur rouantelez a‐enep eur rouantelez all; ha beza e vezo krenamanchou‐douar e meur a leac’h ha kernez, ha trubuil. An traou‐ze a zo ar gommansamant euz ar poaniou.

⁹ Mes likit evez ouzoc’h hoc’h‐unan; rag kas a raint ac’hanoc’h dirag an tribunaliou hag ar sinagogou; skourjezet e viot, ha kasset abalamour d’in dirag ar gouarnerien hag ar rouane, evit rei testeni d’in dirazhe.

¹⁰ Mes da genta eo red ma vez prezeget an Aviel d’an holl nationou.

¹¹ Hogen, pa gassint ac’hanoc’h evit ho livra, na vezit ket en poan da c’houzoud araog petra ho pezo da lavaret, ha na choumit ket da zonjal e kement‐se; mes livirit ar pez a vezo roet deoc’h da lavaret en heur‐ze; rag n’eo ket c’houi a gomzo, mes ar Spered‐Santel.

¹² Hogen, neuze ar breur a livro he vreur d’ar maro, hag an tad he vugel; hag ar vugale a zavo a‐enep ho zad hag ho mam, hag ho lakaint da vervel.

¹³ Hag e viot kaseet gant an holl abalamour d’am hano, mes an hini a gendalc’ho beteg ar fin, hennes a vezo salvet.

¹⁴ Hogen, pa velot an abomination euz an dezolation, euz a behini hen deuz komzet ar profet Daniel, o ren el leac’h na dle ket beza (ra lako evez mad an hini hen lenn); neuze ar re a vezo er Jude, ra dec’hint var ar meneziou;

¹⁵ hag an hini a vezo var an doen, diwallo da zisken en ti, na da vond ebarz evit kemeret tra e‐bed euz he di;

¹⁶ hag an hini a vezo er park, diwallo da zistrei var he c’hiz evit kemeret he zae.

¹⁷ Malheur d’ar gragez o tougen frouez, ha d’ar magerezed en deiziou‐ze.

¹⁸ Pedit evit ne rankoc’h ket tec’hel er goanv.

¹⁹ Rag beza e vezo en deiziou‐ze eun affliction ker braz, ken n’euz bet biskoas hini henvel outhi, abaoe ma’z eo crouet ar bed gant Doue beteg hirio, ha ne vezo biken.

²⁰ Ha ma n’hen divije ket an Aotrou diveret an deveziou‐ze, na vije bet saveteet den e‐bed; mes diveret hen deuz an deveziou‐ze abalamour d’ar re a zo bet choazet ganthan.

²¹ Neuze mar lavar unan‐benag deoc’h: Setu ar C’hrist aman; pe: Setu‐hen a‐hont; na gredit ket.

²² Rag sevel a rai Christed faos ha fals profeted, hag e raint miraclou ha burzudou evit trompla memeus ar re choazet ma vije gallet.

²³ Likit evez eta; setu, em euz discleriet deoc’h pep tra en avans.

²⁴ En deiziou‐ze goude an dribulation‐ze, an heol a devalaio, hag al loar na roio ket he sclerijen;

²⁵ ar stered a gwezo euz an env, hag ar puissansou a zo en envou a vezo bransellet.

²⁶ Ha neuze e vezo gwelet Mab an den o tond var ar goabrennou, gant eur galloud hag eur gloar braz;

²⁷ hag e kasso he elez da zastum he re choazet euz ar pevar avel, adaleg ar c’horn pella euz an douar beteg ar pen pella euz an env.

²⁸ Diskit kement‐man dre barabolen ar vezen‐fiez: Pa zeu he brancou da deneraad hag he deliou da zispaka, ec’h ouzoc’h ema tost an hanv.

²⁹ Evel‐se ive c’houi, pa velot an traou‐ze o c’hoarvezoud, gouezit ema tost Mab an den hag ema e‐kichen an nor.

³⁰ E gwirionez e lavaran deoc’h, penaos na dremeno ket ar generation‐man, ken a vezo c’hoarvezet an holl draou‐ze.

³¹ An env hag an douar a dremeno; mes va c’homzou‐me na dremenint ket.

³² Evit ar pez a zell an deiz hag an heur‐ze, den na anavez anezhe, nag an elez a zo en env, nag ar Mab? nemed an Tad hep‐ken.

³³ Likit evez, veillit ha pedit; rag na ouzoc’h ket peur e teuio an amzer‐ze.

³⁴ Rag henvel eo ouz eun den pehini, o vond en hent evit eur vro bell, a lez he di, a ro d’he vevelien ar gondu anezhan, a verk da bep hini he labour, hag a c’hourc’hemen d’ar porzier beza var evez.

³⁵ Beillit eta, rag na ouzoc’h ket peur e teuio mestr an ti, pe d’an abardaez, pe da hanter‐noz, pe pa gano ar c’hilloc, pe deuz ar mintin;

³⁶ gant aoun, oc’h erruout en eun taol, ne vec’h kavet ganthan kousket.

³⁷ Hogen, ar pez a lavaran, hen lavaret a ran d’an holl: Beillit.