Sant Marc 12 - Testamant Nevez 1897 (Jenkins)

CHABISTR XII.

¹ Jesus a gommansaz neuze da gomz outhe dre barabolennou: Eun den, emezhan, a blantaz eur winien, a lekeaz eur c’harz en‐dro dezhi, a doullaz enhi eur plas evit eur waskerez, hag a zavaz eun tour, ha goude beza he roet en feurm da verourien, ez eaz kuit.

² Pa oe erru amzer ar frouez, e kassaz eur mevel etrezeg ar verourien, evit receo digant ar verourien frouez euz ar winien.

³ Mes, o veza croget enhan, e kannjont anezhan, hag her c’hasjont kuit en goullo.

⁴ Kas a reaz dezhe c’hoas eur servicher all; mes int a sklapaz mein outhan, hag e c’hloazjont anezhan en he ben, hag her c’hasjont kuit, goude beza hen tretet gant dismegans.

⁵ Hag e kassaz c’hoas unan all hag a oe lazet ganthe, ha kalz a re all, a bere lod a oe kannet ha lod all lazet.

⁶ Er fin, o veza m’hen doa c’hoas eur mab hag a garie meurbed, e kassaz anezhan dezhe an diveza, en eur lavaret: Douja a raint d’am mab.

⁷ Mes ar verourien‐ze a lavaraz etrezhe: He‐man eo an heritour; deuit, lazomp anezhan, hag he heritach a vezo deomp‐ni.

⁸ Hag, o veza croget enhan, e lakjont anezhan d’ar maro, hag e taoljont anezhan er meaz euz ar winien.

⁹ Petra a rai eta aotrou ar winien? Dond a rai, hag e tistrujo ar verourien‐ze, hag e roio ar winien da dud all.

¹⁰ Ha n’hoc’h euz‐hu ket lennet ar gomz‐man euz ar Scritur: Ar mean a oa bet taolet a‐gostez gant ar re a oa o vatissa, a zo deuet da veza ar c’henta mean‐corn?

¹¹ An Aotrou eo hen deuz great kement‐se, hag eun dra souezus eo d’hon daou‐lagad.

¹² Neuze e klaskjont cregi enhan; rag anaoud a reant ervad hen doa lavaret ar barabolen‐ze a‐enep dezhe; mes, o veza m’ho doa aoun rag ar bobl, e lezjont anezhan, hag ez ejont kuit.

¹³ Goude‐ze e kasjont dezhan darn euz ar Farizianed hag euz an Herodianed, evit tapoud anezhan en he gomzou.

¹⁴ O veza eta deuet d’he gavoud, e leverjont dezhan: Mestr, gouzoud a reomp ez oud gwirion, ha penaos ne glaskez plijoud da zen e‐bed; rag na zellez ket ouz apparans an dud, mes diski a rez hent Doue hervez ar wirionez. Ha permetet eo paea an tribut da Cezar, pe n’eo ket? Ha paea a raimp‐ni, pe na baeimp ket?

¹⁵ Mes hen, oc’h anaoud ho hipocrizi, a lavaraz dezhe: Perag e tentit‐hu ac’hanoun? Digassit d’in eun diner, evit ma her gwelin.

¹⁶ Hag e tigasjont dezhan unan. Neuze e lavaraz dezhe: Imach piou, hag hano piou eo ar re‐man? Hag e leverjont dezhan: Re Cezar.

¹⁷ Ha Jesus a respontaz dezhe: Rentit eta da Cezar ar pez a zo da Cezar, ha da Zoue ar pez a zo da Zoue. Hag e oent souzet braz ganthan.

¹⁸ Neuze ar Saduseed, pere a lavar n’euz ket a resurrection, a zeuaz d’he gavoud, hag a interrojaz anezhan, o lavaret:

¹⁹ Mestr, Moises hen deuz gourc’hemenet deomp mar marv breur unan‐benag, ha mar lez he vreg hep bugale, e ranko he vreur kemeret an intanvez evit sevel lignez d’he vreur.

²⁰ Hogen, bez’ e oa seiz breur. Ar c’henta a gemeraz eur vreg, hag a varvaz hep lezel bugale.

²¹ An eil a zimezaz dezhi, hag a varvaz ive, hep lezel bugel e‐bed. Hag an trede en hevelep doare.

²² Ho seiz e timezjont dezhi, ha na lezjont ket a vugale. Hag ar vreg a varvaz ive, an diveza anezhe holl.

²³ Er resurrection eta, pa resussitint, da behini euz ar re‐man e vezohi greg? rag ho seiz ho deuz bet anezhi evit pried.

²⁴ Ha Jesus a respontaz, hag a lavaraz dezhe: Ha n’oc’h‐hu ket en errol, dre na anavezit ket ar Scrituriou, na galloud Doue?

²⁵ Rag pa vezo ar resurrection, ar oazed na gemerint ket a c’hragez, nag ar gragez priejou; mes beza e vezint evel an elez a zo en env.

²⁶ Hag, evit ar pez a zell resurrection ar re varo, ha n’hoc’h euz‐hu ket lennet e levr Moises, penaos Doue a gomzaz outhan er voden‐spern, en eur lavaret: Me eo Doue Abraham, Doue Isaac, ha Doue Jacob?

²⁷ Doue n’eo ket Doue ar re varo; mes Doue ar re veo. Rag‐se emoc’h en eun errol vraz meurbed.

²⁸ Neuze unan euz ar Scribed, hag hen doa klevet anezhe o tisput, o velet hen doa respontet mad dezhe, a dostaaz hag a c’houlennaz diganthan: Pehini eo ar c’henta euz an holl gourc’hemenou?

²⁹ Jesus a respontaz dezhan: Ar c’henta euz an holl gourc’hemenou eo he‐man: Selaou, Israel, n’ed euz nemed eun Aotrou, pehini eo an Aotrou, hon Doue.

³⁰ Karoud a ri an Aotrou da Zoue euz da holl galon, euz da holl ene, euz da holl spered, hag euz da holl nerz. Hennes eo ar c’henta gourc’hemen.

³¹ Ha setu aman an eil pehini a zo henvel outhan: Karoud a ri da nessa eveld’oud da‐unan. N’euz gourc’hemen all e‐bed brassoc’h eged ar re‐man.

³² Hag ar Scrib a respontaz dezhan: Mestr, komzet mad ec’h euz, ha gant gwirionez ec’h euz lavaret penaos n’euz nemed eun Doue hep‐ken, ha penaos n’euz Doue all e‐bed nemethan;

³³ ha penaos he garoud euz a greiz ar galon, euz an holl spered, euz an holl ene, hag euz an holl nerz, ha karoud hon nessa eveld’omp hon‐unan, a zo mui eged an holl offransou devet, hag an holl sacrifisou.

³⁴ Jesus, o velet hen doa respontet gant furnez, a lavaraz dezhan: N’oud ket pell euz a rouantelez Doue. Ha den na grede mui interroji anezhan.

³⁵ Hag evel ma oa Jesus o kelen en templ, e lavaraz: Penaos e lavar ar Scribed ez eo ar C’hrist mab da Zavid?

³⁶ Rag David he‐unan hen deuz lavaret dre ar Spered‐Santel: An Aotrou hen deuz lavaret d’am Aotrou: Azez a‐zeo d’in, bete ma likiin da inimied da scabel dindan da dreid.

³⁷ Pa’z eo gwir eta David he‐unan a c’halv anezhan Aotrou, penaos ec’h hell hen beza he vab? Hag eur bobl vraz a gemere plijadur o selaou anezhan.

³⁸ Lavaret e rea dezhe c’hoas, en he gelennadurez: Diwallit ouz ar Scribed pere a gar pourmen gant zaeou hir, ha beza saludet er plasennou public;

³⁹ hag a gar ar c’hadoriou kenta er sinagogou, hag ar plasou kenta er festou,

⁴⁰ pere a zevor tiez an intanvezed, hag evit digarez a ra pedennou hir; ar re‐man ho devezo eur gondaonation vrassoc’h.

⁴¹ Ha Jesus, o veza azezet dirag ar c’hef, a zelle penaos e taole ar bobl arc’hant er c’hef,

⁴² ha kalz a dud pinvidic a daole kalz enhan. Dond a reaz ive eun intanvez paour, pehini a daolaz ebarz daou bezic arc’hant pere a ra eul liard.

⁴³ Neuze, o veza galvet he ziskibien, e lavaraz dezhe: E gwirionez e lavaran deoc’h: an intanvez paour‐ze he deuz taolet ebarz ar c’hef muioc’h eged ar re all holl.

⁴⁴ Rag holl ho deuz taolet ebarz euz ar pez ho doa a re; mes hou‐man he deuz taolet ebarz euz ar pez a oa necesser dezhi, kement a oa choumet ganthi evit beva.