Sant Marc 10 - Testamant Nevez 1897 (Jenkins)

CHABISTR X.

¹ Jesus, o veza eat kuit ac’hane, a zeuaz var bord ar Jude, a‐hed ar Jourdan; hag ar bobl en em zastumaz c’hoas var he dro, hag hervez he gustum, e kelennaz anezhe adare.

² Neuze ar Farizianed a dostaaz outhan hag a c’houlennaz diganthan, evit hen amprouv: Ha permetet eo da eun den kas kuit he vreg?

³ Hen a respontaz hag a lavaraz dezhe: Petra a zo bet gourc’hemenet deoc’h gant Moises?

⁴ Int a lavaraz dezhan: Moises hen deuz permetet ober eur scrid a zivors hag he c’has kuit.

⁵ Ha Jesus, o respont, a lavaraz dezhe: Abalamour d’ar galeder euz ho calonou eo hen deuz Moises scrivet deoc’h ar gourc’hemen‐ze.

⁶ Mes er pen‐kenta euz ar grouidigez, Doue a reaz eur goaz hag eur vaouez hep‐ken.

⁷ Abalamour da ze e tilezo an den he dad hag he vam, hag en em roio d’he vreg;

⁸ hag ho daou ne vezint nemed eur c’hig hep‐ken; evel‐se n’ed int mui daou, mes eur c’hig hep‐ken.

⁹ Arabad eo eta d’an den dispartia ar pez a zo unanet gant Doue.

¹⁰ Hag ebarz an ti, he ziskibien hen interrojaz adare divarben ar memeus tra;

¹¹ hag e lavaraz dezhe: Piou‐benag a gasso kuit he vreg hag a gemero unan all, a ra eun avoultriach en he c’henver;

¹² ha mar deu eur vreg da guitaad he ozac’h, ha mar timez da unan all, e ra avoultriach.

¹³ Neuze e oe digasset dezhan bugale vihan, evit ma touchje outhe; mes an diskibien a c’hourdrouze ar re ho digasse.

¹⁴ Ha Jesus, o velet kement‐se, a oe indiniet, hag a lavaraz dezhe: Lezit ar vugaligou da zond d’am c’havout, ha na virit ket outhe; rag rouantelez Doue a zo evit ar re a zo henvel outhe.

¹⁵ E gwirionez hen lavaran deoc’h, piou‐benag na recevo ket rouantelez Doue evel eur bugel bihan, na antreo ket enhi.

¹⁶ Hag o veza ho c’hemeret etre he zivrec’h, ec’h astennaz he zaouarn varnezhe hag ho bennigaz.

¹⁷ Ha pa oa o vond er meaz evit en em lakaad en hent, eun den a ziredaz, hag a zaoulinaz dirazhan, en eur c’houlen diganthan: Mestr mad, petra a dlean‐me da ober evit herita ar vuez eternel?

¹⁸ Jesus a lavaraz dezhan: Perag em galvez‐te mad? N’euz hini mad e‐bed, nemed Doue hep‐ken.

¹⁹ Anaoud a rez ar gourc’hemenou: Na ra ket a avoultriach; na laz ket; na laer ket; na lavar ket a desteni faos; na ra gaou e‐bed ouz den; henor da dad ha da vam.

²⁰ Hen a respontaz: Mestr, miret em euz an holl draou‐ze adaleg va yaouankiz.

²¹ Ha Jesus, o sellet outhan, hen karaz hag a lavaraz dezhan: Mankoud a ra d’id eun dra: Kea, gwerz kement ec’h euz, ha ro‐hen d’ar beorien, hag ez pezo eun tenzor en env; neuze deuz, doug da groaz hag heul ac’hanoun.

²² Mes he‐man en em gavaz nec’het gant ar gomz‐se, hag ez eaz kuit gwall drist, rag madou braz hen doa.

²³ Neuze Jesus, o sellet en dro dezhan, a lavaraz d’he ziskibien: Pegen dies eo d’ar re ho deuz madou antren en rouantelez Doue!

²⁴ Hag he ziskibien a oe souezet gant ar c’homzou‐ze. Mes Jesus, o komz outhe, a lavaraz: Va bugale, pegen dies eo d’ar re a laka ho fizians er madou antren en rouantelez Doue!

²⁵ Ezetoc’h eo da eur c’hanval tremen dre graouen eun nadoz, eged da eun den pinvidic antren en rouantelez Doue.

²⁶ Hag e oent c’hoas muioc’h souezet, hag e lavarent an eil d’egile: Piou eta a hell beza salvet?

²⁷ Mes Jesus, o sellet outhe, a lavaraz: Kement‐se a zo impossubl d’an dud, mes n’eo ket impossubl da Zoue; rag pep tra a zo possubl da Zoue.

²⁸ Neuze Per a gommansaz lavaret dezhan: Setu, ni hon euz dilezet pep tra, hag hon euz heulliet ac’hanoud.

²⁹ Ha Jesus a respontaz: E gwirionez e lavaran deoc’h, penaos n’euz den hag hen deuz dilezet ti, pe vreudeur, pe c’hoarezed, pe tad, pe vam, pe vreg, pe vugale, pe douarou, abalamour d’in ha d’an Aviel,

³⁰ ha na recevo divar vreman, en amzer a zo o ren, kant gwech kemend all a diez, a vreudeur, a c’hoarezed, a vammou, a vugale, a zouarou, gant persecutionou; hag, er bed da zond, ar vuez eternel.

³¹ Mes kalz euz ar re genta a vezo an diveza, hag ar re ziveza a vezo ar re genta.

³² Hogen, evel ma oant en hent, o pignad da Jerusalem, Jesus a iea araog dezhe; hag e oant spountet, hag ho doe aoun en eur vond var he lerc’h. Ha Jesus, o kemeret adare an daouzec a‐gostez, a gommansaz lavaret dezhe ar pez a dlie c’hoarvezout ganthan.

³³ Setu, e pignomp da Jerusalem, ha Mab an den a vezo livret da brinsed ar veleien ha d’ar Scribed, hag e condaonint anezhan d’ar maro, hag e livrint anezhan d’ar Jentiled.

³⁴ Ober a raint goab anezhan, hag e skourjezint anezhan, hag e cranchint ouz he vizach, hag hen lakaint d’ar maro; mes an trede deiz e resussito.

³⁵ Neuze Jakes ha Ian, mibien Zebede, a zeuaz d’he gavoud en eur lavaret: Mestr, ni a garfe e rafez deomp ar pez a c’houlennimp.

³⁶ Hag hen a lavaraz dezhe: Petra a fell deoc’h a rafen deoc’h?

³⁷ Int a lavaraz dezhan: Accord deomp ma vezimp azezet unan a‐zeo, hag egile a‐gleiz d’id, en da c’hloar.

³⁸ Jesus a lavaraz dezhe: Na ouzoc’h ket petra a c’houlennit. Ha gallout a hellit‐hu eva ar c’halir a dlean‐me da eva, ha beza badezet gant ar vadiziant gant pehini e tlean beza badezet?

³⁹ Hag e leverjont dezhan: Gallout a reomp. Ha Jesus a lavaraz dezhe: Eva a reot evit‐gwir ar c’halir a dlean da eva, ha badezet e veot gant ar vadiziant gant pehini e tlean beza badezet;

⁴⁰ mes evit beza azezet a‐zeo pe a‐gleiz d’in, n’eo ket d’in‐me eo hen rei, nemed d’ar re evit pere eo preparet kement‐se.

⁴¹ An deg all, o veza klevet kement‐se, a zavaz droug enhe ouz Jakes ha Ian.

⁴² Mes Jesus, o veza galvet anezhe, a lavaraz dezhe: Gouzoud a rit penaos ar re a dremen evit mistri var an nationou a zav varnezhe; ha penaos ar re vraz ho deuz otorite varnezhe.

⁴³ Mes na vezo ket evel‐se en ho touez; er c’hontrol, piou‐benag a fello dezhan beza ar brassa en ho touez, a vezo ho servicher.

⁴⁴ Ha piou‐benag ac’hanoc’h a fello dezhan beza ar c’henta en ho touez, a vezo esclav d’an holl.

⁴⁵ Rag Mab an den n’eo ket deuet evit beza servichet, mes evit servicha, hag evit rei he vuez da rançon evit kalz.

⁴⁶ Ha goude e teujont da Jerico; hag evel ma’z ea kuit euz a Jerico gant he ziskibien ha kalz a dud, mab Time, Bartime, an dall, a oa azezet var bord an hent, o c’houlen an aluzen.

⁴⁷ Hag, o veza klevet e oa Jesus a Nazaret an hini a oa o tremen, e commansaz da grial, ha da lavaret: Jesus, Mab David, bez truez ouzin!

⁴⁸ Ha meur a hini a c’hourdrouze anezhan, evit ober dezhan tevel; mes hen a grie c’hoas krenvoc’h: Mab David, bez truez ouzin!

⁴⁹ Ha Jesus, o choum en he za, a lavaraz gervel anezhan. Gervel a rejont eta an den dall, hag e leverjont dezhan: Kemer courach, sav, gervel a ra ac’hanoud.

⁵⁰ Hag, o teurel kuit he vantel, e savaz hag e teuaz da gavout Jesus.

⁵¹ Neuze Jesus, o komz outhan, a lavaraz: Petra a fell d’id a rafen evidoud? Hag an dall a respontaz: Aotrou, ma kavin ar gwelet.

⁵² Ha Jesus a lavaraz dezhan: Kea, da feiz hen deuz da iac’heet. Ha kerkent e kavaz ar gwelet, hag ec’h heullie Jesus en hent.