Sant Lucas 8 - Testamant Nevez 1897 (Jenkins)

CHABISTR VIII.

¹ Goude‐ze, Jesus a iea euz an eil kear hag euz an eil bourgaden d’eben, en eur brezeg hag en eur annons ar c’helou mad euz a rouantelez Doue; hag an daouzec a oa ganthan,

² hag ive eun neubeud merc’hed pere a oa bet delivret euz a zrouk‐sperejou hag euz a glenvejou; Mari, galvet Magdalen, euz a behini e oa sortiet seiz drouk‐spered;

³ ha Janned, greg Chouza, ministr Herodes, Suzanna, ha meur a hini all, pere a zicoure anezhan gant ho madou.

⁴ Hogen, evel ma en em dastume eur bobl vraz, ha ma teue d’he gavout kalz a dud euz an holl geariou, e lavaraz dezhe ar barabolen‐man:

⁵ Eun hader a ieaz er meaz evit hada he had, hag en eur hada, lod a gwezaz a‐hed an hent, hag a oe mac’het, hag al lapoused euz an env a zebraz anezhan holl.

⁶ Ha lod all a gwezaz var douar meinec; ha pa oe diwanet, e sec’haz, o veza ne oa ket a zaour en douar.

⁷ Lod all a gwezaz e‐touez ar spern, hag ar spern a greskaz assambles gant ar greun, hag a vougaz anezhan.

⁸ Lod all a gwezaz en douar mad, hag a zavaz hag a roaz frouez, kant evit unan. O lavaret kement‐man, e crie: Ra zelaouo an neb hen deuz diou‐skouarn evit klevet!

⁹ He ziskibien a c’houlennaz diganthan petra a zinifie ar barabolen‐ze.

¹⁰ Hag hen a respontaz: Deoc’h‐hu eo bet roet da anaoud ar mysteriou euz a rouantelez Doue; mes d’ar re all ne gomzer a gement‐se nemed dre barabolennou, en hevelep doare ma velint heb gwelet, ha ma klevint heb compren.

¹¹ Setu aman eta ar pez a zinifi ar barabolen‐ze.

¹² An had eo ger Doue; ar re a receo anezhan a‐hed an hent eo ar re hen selaou; mes an diaoul a zeu, hag a denn ar ger‐ze euz ho c’halonou, gant aoun ne deufent da gredi ha da veza salvet;

¹³ ar re a receo anezhan var douar meinec eo an dud pere, o veza klevet ar ger, a receo anezhan gant joa, mes n’ho deuz ket a c’hrizien, ha na gredont nemed evit eun neubeud amzer; ha pa deu an dentation, e tec’hont kuit;

¹⁴ hag ar pez a zo kwezet e‐touez ar spern, eo ar re ho deuz klevet ar ger; ha pere en eur vond kuit, a lez ar ger da veza mouget gant ar sourciou, gant ar pinvidigeziou, hag ar plijadurezou euz ar vuez‐man, en hevelep doare ma na zougont ket ho frouez beteg beza dare;

¹⁵ mes ar pez a zo kwezet en douar mad, eo ar re pere, o veza klevet ar ger gant eur galon bur ha mad, a vir anezhan hag a gendalc’h da zougen frouez.

¹⁶ Den e‐bed, goude beza alumet eur c’houlaouen, na c’holo anezhi gant eur bessel, ha ne laka anezhi dindan ar gwele; mes hel lakaad a ra var eur c’hantoleur, evit ma c’hello ar re a zeu en ti gwelet ar sclerijen.

¹⁷ Rag n’euz netra kuzet ha na dle beza discleriet, na netra goloet ha na dle beza dizoloet, ha dond da veza anat.

¹⁸ Rag‐se likit evez penaos e selaouit; rag d’an neb hen deuz e vezo roet, mes an neb n’hen deuz ket, a vezo lammet diganthan memeus ar pez a zonj dezhan hen deuz.

¹⁹ Neuze he vam hag he vreudeur a zeuaz d’he gavout; mes na hellent ket tostaad outhan abalamour d’ar bobl.

²⁰ Hag e teujont da lavaret dezhan: Da vam ha da vreudeur a zo aze er meaz, hag ho deuz c’hoant da velet ac’hanoud.

²¹ Mes hen a respontaz: Ar re a zelaou ger Doue, hag hen laka en pratic, ar re‐ze eo va mam ha va breudeur.

²² Eun devez e c’hoarvezaz ma pignaz en eur vag gant he ziskibien, hag e lavaraz dezhe: Tremenomp en tu all d’ar mor, hag ez ejont.

²³ Hag e‐pad ma navigent, Jesus a choumaz kousket; hag eur barrad avel a zavaz var ar mor, ar vag a oa erru leun a zour, hag e oant en danjer braz.

²⁴ Neuze e teujont d’hen kavoud, hag e tihunjont anezhan, en eur lavaret: Mestr, Mestr, emomp o vond da goll. Mes hen, o veza dihunet, a gomzaz gant otorite d’an avel ha d’ar mor, hag ar re‐man a davaz, hag an amzer a zeuaz da veza sioul braz.

²⁵ Neuze e lavaraz dezhe: Pe leac’h ema ho feiz? Hag int, spountet ha souezet braz, a lavare an eil d’egile: Piou eta eo he‐man, pa gommand memeus d’an avelou ha d’an dour, hag e sentont outhan?

²⁶ Neuze e teujont var bord bro ar Gadarened, pehini a zo dirag ar Galile.

²⁷ Ha pa oe diskennet Jesus d’an douar, eun den euz ar gear‐ze, hag a oa possedet abaoe pell amzer gant drouk‐sperejou, a zeuaz d’he zialben. Ne oa ket a zillad varnezhan, ha ne choume ket er gear, mes er beziou.

²⁸ Kerkent ha ma velaz Jesus, e commansaz da grial hag, oc’h en em deurel e c’harz he dreid, e lavaraz a vouez huel: Petra a zo etre me ha te, Jesus, Mab an Doue Holl‐C’halloudec? Me az ped, na dourmant ket ac’hanoun.

²⁹ Rag Jesus a gommande d’ar spered hudur mond er meaz euz an den‐ze, en pehini e oa crog stard abaoe pell amzer; kaer e oa staga anezhan gant chadennou hag hen derc’hel gant hualou, terri a rea he ereou, hag an drouk‐spered a gasse anezhan ganthan el leac’hiou dezert.

³⁰ Ha Jesus a c’houlennaz diganthan: Pe hano ec’h euz? He‐man a respontaz: Lejion; rag kalz a zrouk‐sperejou a oa antreet enhan.

³¹ Hag e pedent anezhan ne gommandje ket dezhe mond e punz an abim.

³² Hogen, bez’ e oa eno eur vanden vraz a voc’h o peuri var ar menez; hag e pedent anezhan d’ho lezel da antren er moc’h‐se, ha Jesus hen permetaz dezhe.

³³ An drouk‐sperejou eta, o veza eat er meaz euz an den‐ze, a antreaz er moc’h, hag ar vanden en em daolaz euz ar plas huelze er mor, hag e oent beuzet.

³⁴ Hag ar re a oa ouz ho diwall, pa veljont ar pez a oa c’hoarvezet, a redaz kuit hag a gontaz kement‐se en kear ha var ar meaz.

³⁵ Neuze an dud a zeuaz er meaz evit gwelet petra a oa c’hoarvezet; hag o veza deuet da gavout Jesus, e kavjont an den euz a behini e oa eat kuit an drouk‐sperejou, azezet e c’harz treid Jesus, gwisket hag en he skiant‐vad; hag e oent leun a spount.

³⁶ Hag ar re ho doa gwelet kement‐se a gontaz dezhe penaos e oa bet delivret an den possedet.

³⁷ Neuze an holl dud euz a vro ar Gadarened hen pedaz da guitaad ho bro; rag croget e oa eur spount vraz enhe. Pignad a reaz eta var ar vag evit dond var he c’hiz.

³⁸ Hag an den euz a behini e oa eat kuit an drouk‐sperejou, hen pede da lezel anezhan da choum ganthan; mes Jesus a gassaz anezhan kuit, en eur lavaret:

³⁹ Distro d’ar gear, ha lavar d’an holl ar burzudou hen deuz great Doue en da genver. Mond a reaz kuit eta, en eur embann dre ar gear holl kement hen doa great Jesus en he genver.

⁴⁰ Pa oe distro Jesus, eur bobl vraz a zeuaz d’hen digemer; rag an holl a oa en gortoz anezhan.

⁴¹ Ha setu ma teuaz eun den hanvet Jaïrus, pehini a oa chef euz ar sinagog, hag oc’h en em deurel da dreid Jesus, e pedaz anezhan da zond d’he di;

⁴² rag beza hen doa eur verc’h pen‐heres, oajet a zaouzec vloaz, pe var dro, hag a oa o vond da vervel. Ha pa oa Jesus o vond di, e oa gwasket gant ar bobl.

⁴³ Neuze eur vreg, pehini a oa klanv gant an dioada abaoe daouzec vloaz, hag he doa dispiniet he holl vadou gant medeusinet, hep gallout beza pareet gant hini e‐bed,

⁴⁴ a dostaaz outhan a‐dreg he gein, a douchaz ar bord euz he zae; ha kerkent ec’h ehanaz he dioada.

⁴⁵ Ha Jesus a lavaraz: Piou hen deuz touchet ouzin? Hag evel ma nac’he an holl, Per hag ar re a oa ganthan a lavaraz: Mestr, ar bobl a zo en‐dro d’id hag a wask ac’hanoud; hag e leverez: Piou hen deuz touchet ouzin?

⁴⁶ Mes Jesus a lavaraz: Unan‐benag hen deuz touchet ouzin; rag anavezet em euz ez euz eat eur vertuz e meaz ac’hanoun.

⁴⁷ Ar vreg‐se, o velet ne oa ket bet kuzet kement‐man diouthan, a zeuaz en eur grena, hag oc’h en em deurel d’he dreid, e tiscleriaz dirag an holl, perag he doa touchet diouthan, ha penaos e oa bet pareet dioc’h‐tu.

⁴⁸ Ha Jesus a lavaraz dezhi: Va merc’h, kemer courach, da feiz hen deuz da iac’heet; kea en peoc’h.

⁴⁹ E‐pad ma oa c’hoas o komz, e teuaz unan euz a di chef ar sinagog, hag a lavaraz dezhan: Da verc’h a zo maro; na choum ken da skuiza ar Mestr.

⁵⁰ Mes Jesus, o veza klevet kement‐se, a lavaraz da Jaïrus: N’az pe ket a aoun; n’ec’h euz nemed credi, ha da verc’h a vezo iac’heet.

⁵¹ Ha pa oe deuet en ti, na lezaz den da antren nemed Per, Jakes ha Ian, ha tad ha mam ar plac’h yaouank.

⁵² Hag an holl a wele hag a hirvoude abalamour dezhi; mes Jesus a lavaraz: Na welit ket; n’ed eo ket maro, mes kousket hep‐ken.

⁵³ Hag e reant goab anezhan, o veza ma ouient e oa maro.

⁵⁴ Mes, goude m’hen doa kasset anezhe holl er meaz, e crogaz en he dorn, hag e lavaraz a vouez huel: Bugel, sav alese.

⁵⁵ Hag he ene a zeuaz a‐nevez enhi; sevel a reaz rag‐tal, ha Jesus a c’hourc’hemenaz rei boued dezhi.

⁵⁶ Hag he zad hag he mam a oe souezet meurbed; mes hen a zifennaz outhe lavaret da zen ar pez a oa c’hoarvezet.