Sant Lucas 4 - Testamant Nevez 1897 (Jenkins)

CHABISTR IV.

¹ Jesus, o veza leun euz ar Spered‐Santel, a zistroaz euz ar Jourdan, hag a oe kasset gant ar Spered ebarz an dezert;

² eno e oe tentet gant an diaoul daou‐ugent devez, ha na zebraz netra e‐pad an deiziou‐ze; mes pa oant tremenet, hen doe naoun.

³ Neuze an diaoul a lavaraz dezhan: Mar d’oud Mab Doue, lavar d’ar mean‐man trei en bara.

⁴ Ha Jesus a respontaz dezhan: Scrivet eo: An den na vevo ket gant bara hep‐ken, mes gant pep ger euz a Zoue.

⁵ Neuze an diaoul hen kassaz var eur menez huel, hag a ziskouezaz dezhan en eur momant holl rouanteleziou ar bed;

⁶ hag an diaoul a lavaraz dezhan: Rei a rin d’id an holl buissans‐ze ha gloar ar rouanteleziou‐ze; rag roet eo bet d’in, ha me a ro anezhan d’an neb a fell d’in.

⁷ Rag‐se mar en em brosternez dirazoun, kement‐se holl a vezo d’id.

⁸ Mes Jesus a respontaz dezhan: Tec’h kuit diouzin, Satan; rag scrivet eo: An Aotrou da Zoue a adori, hag hen hep‐ken a zervichi.

⁹ Kas a reaz anezhan ive da Jerusalem, hag e lekeaz anezhan var lein an templ, hag e lavaraz dezhan: Mar d’oud Mab Doue, en em daol ac’hann d’an traon;

¹⁰ rag scrivet eo e c’hourc’hemeno d’he elez divar da ben, evit ma tiwallint ac’hanoud,

¹¹ ha ma tougint ac’hanoud etre ho daouarn, gant aoun na stokfe da droad ouz eur mean‐benag.

¹² Mes Jesus a respontaz dezhan: Lavaret eo: Na denti ket an Aotrou da Zoue.

¹³ Hag an diaoul, o veza achuet an holl dentation, a guitaaz anezhan evit eun amzer.

¹⁴ Ha Jesus a zistroaz dre c’halloud ar Spered en Galile, hag ar vrud anezhan a redaz dre ar vro holl tro‐var‐dro.

¹⁵ Rag kelen a rea en ho zinagogou, hag e oa henoret gant an holl.

¹⁶ Ha Jesus a zeuaz da Nazaret, en pe leac’h e oa bet savet, hag evel ma oa he gustum, ec’h antreaz da zeiz ar sabbat er sinagog, hag e savaz evit lenn.

¹⁷ Hag e oe roet dezhan levr ar profet Izaias, hag o veza digoret al levr, e kavaz al leac’h e pehini e oa scrivet:

¹⁸ Spered an Aotrou a zo varnoun, abalamour da ze hen deuz va eoliet evit prezeg an Aviel d’ar beorien; va c’hasset hen deuz evit iac’haad ar re a zo mantret ho c’halon;

¹⁹ evit annons an delivrans d’ar gaptived, hag an distro euz ar gwelet d’ar re dall; evit lakaad en liberte ar re a zo opprimet, hag evit embann bloavez favorabl an Aotrou.

²⁰ Ha goude beza serret al levr, ha roet anezhan d’ar ministr, ec’h azezaz; ha daoulagad kement a oa er sinagog a oa batet varnezhan.

²¹ Neuze e commansaz lavaret dezhe: Hirio eo accomplisset ar gomz‐ze euz ar Scritur, hag her c’hlevet a rit.

²² An holl a roe testeni dezhan, hag a oa souezet euz ar c’homzou a c’hras a zeue euz he c’henou, hag e lavarent: Ha n’eo ket hennes mab Josef?

²³ Hag hen a lavaraz dezhe: Hep mar c’houi a lavaro d’in ar proverb‐man: Medeusin, en em iac’ha da‐unan; gra ive aman en da vro, kement ha m’hon euz klevet ec’h euz great en Capernaüm.

²⁴ Mes lavaret a reaz: E gwirionez hen lavaran deoc’h, profet e‐bed n’ed eo digemeret mad en he vro he‐unan.

²⁵ E gwirionez hen lavaran deoc’h: Bez’ e oa kalz a intanvezed en Israel en amzer Elias, pa oe serret an env e‐pad tri bloaz ha c’houec’h miz, en hevelep doare ma c’hoarvezaz eur gernez vraz dre ar vro holl.

²⁶ Koulskoude Elias na oe kasset etrezeg hini anezhe, nemed etrezeg eur vreg intanvez euz a Sarepta, en Sidon.

²⁷ Bez’ e oa ive kalz a dud lor en Israel en amzer ar profet Elizeüs; mes hini anezhe na oe neteet, nemed Naaman, ar Siread.

²⁸ Hag ar re a oa er sinagog, o klevet kement‐se, a oe holl leun a goler.

²⁹ Hag o sevel ac’hane, e vountjont anezhan er meaz euz ho c’hear, hag e kasjont anezhan ganthe beteg beg ar menez var behini e oa savet ho c’hear, evit hen stlapa d’an traon.

³⁰ Mes hen a dremenaz dre ho c’hreiz, hag a ieaz kuit.

³¹ Hag e tiskennaz da Capernaüm, kear euz a C’halile, hag e kelenne anezhe deiziou ar sabbat.

³² Hag e oent souezet gant he gelennadurez; rag komz a rea gant otorite.

³³ Hogen, bez’ e oa er sinagog eun den dalc’het gant eur spered impur, pehini a griaz gant eur vouez huel:

³⁴ Ha! petra a zo etre te ha ni, Jesus a Nazaret? Ha deuet oud‐de evit koll ac’hanomp? Gouzoud a ran piou oud: Ar Zant a Zoue.

³⁵ Ha Jesus a c’hourdrouzaz anezhan, en eur lavaret: Tav, ha kea er meaz euz an den‐ze. Hag an drouk‐spered, o veza hen taolet e‐kreiz an assamble, a ieaz er meaz euz anezhan, heb ober droug e‐bed dezhan.

³⁶ Hag e oent holl spountet braz, hag e lavarent etrezhe: Petra eo an dra‐man? Gourc’hemen a ra gant otorite ha gant galloud d’ar sperejou louz, hag e sortiont!

³⁷ Hag ar vrud anezhan a ieaz en pep leac’h er vro tro‐var‐dro.

³⁸ Jesus, o veza eat er meaz euz ar sinagog, a ieaz en ti Simon. Hogen, mam‐gaer Simon a oa klanv gant eur gwall derzien, hag e pedjont anezhan evithi.

³⁹ Hen eta, o veza en he za a‐uz dezhi, a c’hourc’hemenaz d’an derzien, hag an derzien a guitaaz anezhi; hag hi a zavaz kerkent, hag a zervichaz anezhe.

⁴⁰ Pa oe kuzet an heol, kement hini hen doa tud klanv gant meur a seurt klenved, ho c’hassaz dezhan; hag hen ho fareaz en eur astenn he zaouarn var bep hini anezhe.

⁴¹ An drouk‐sperejou ive a zortie euz a veur a hini, en eur grial, hag en eur lavaret: Te eo ar C’hrist, Mab Doue; mes hen ho reprene, ha na bermete ket dezhe lavaret e ouient e oa hen ar C’hrist.

⁴² Kerkent ha ma oa tarzet an deiz, ez eaz er meaz, da eul leac’h dezert, hag eur bobl vraz, a oa ouz he glask, a zeuaz beteg enhan, hag ho doa c’hoant derc’hel anezhan, evit na’z aje ket kuit diouthe.

⁴³ Mes hen a lavaraz dezhe: Red eo d’in prezeg ive rouantelez Doue d’ar c’heariou all; rag evit se eo ez oun bet digasset.

⁴⁴ Hag e prezege e sinagogou ar Galile.