Sant Lucas 3 - Testamant Nevez 1897 (Jenkins)

CHABISTR III.

¹ Er pempzecved bloa vez euz a amzer an impelaer Tiberius Cezar, pa oa Pons Pilat gouarner ar Jude, hag Herodes tetrark euz a C’halile, Philip he vreur, tetrark euz a Iturea hag euz a vro Trakonitis, ha Lusanias tetrark euz a Abilene,

² pa oa Annas ha Caïphas beleien vraz, ger Doue a oe adresset da Ian, mab Zakarias, ebarz an dezert.

³ Hag hen a zeuaz en holl vro var‐dro d’ar Jourdan, en eur brezeg badiziant ar gonversion, evit remission ar pec’hejou;

⁴ evel ma’z eo scrivet e levr komzou ar profet Izaias: Mouez an hini a gri en dezert: Preparit hent an Aotrou, grit eün he wenojennou.

⁵ Pep traonien a vezo leuniet, ha pep menez ha krec’hien a vezo izelleet, an hentchou kam a vezo lakeat, eün; hag an hentchou garo a vezo great kompez;

⁶ ha pep kig a velo silvidigez Doue.

⁷ Ian eta a lavare d’ar bobl a zeue evit beza badezet ganthan: Raç an aered‐viber, piou hen deuz desket deoc’h tec’hel rag ar goler da zond?

⁸ Rentit eta frouez hag a gonven d’ar gonversion; ha n’ed it ket da lavaret enoc’h hoc’h‐unan: Ni hon euz evit tad Abraham; rag me a lavar deoc’h ec’h hell Doue sevel euz ar vein‐ze bugale da Abraham.

⁹ Hogen, ema dija ar vouc’hal var grizien ar gwez. Pep gwezen eta ha na zoug ket a frouez mad, a ia da veza troc’het ha taolet en tan.

¹⁰ Neuze ar bobl a c’houlennaz diganthan: Petra eta a raimp‐ni?

¹¹ Hen a respontaz dezhe: An neb hen deuz diou zae, ra roio d’an neb n’hen deuz hini, hag an neb hen deuz boued, ra zeui da ober ar memeus tra.

¹² Dond a reaz ive publicaned evit beza badezet; hag e lever‐jont dezhan: Mestr, petra a raimp‐ni?

¹³ Hag hen a lavaraz dezhe: Na c’houlennit netra en tu‐hont d’ar pez a zo bet gourc’hemenet deoc’h.

¹⁴ Ar zoudarded ive a c’houlennaz diganthan: Ha ni, petra a raimp‐ni? Hag hen a lavaraz dezhe: Na wall‐dretit den, na dromplit den, mes bezit contant euz ho pae.

¹⁵ Hag evel ma oa ar bobl en gortoz, ha ma rezone an holl en ho c’halonou divarben Ian daoust ha ne oa ket hen ar C’hrist,

¹⁶ Ian a gomzaz hag a lavaraz d’an holl: Evidounme a vadez ac’hanoc’h en dour; mes dond a ra unan all muioc’h galloudec eged’oun; ha n’oun ket dign da zilassa dezhan correou he voutou; hennes ho padezo er Spered‐Santel hag en tan.

¹⁷ He groe a zo ganthan en he zorn, netaad a rai mad he leur, hag e tastumo ar gwiniz en he c’hreuniel; mes ar pell a lako da zevi en eun tan ha ne vougo biken.

¹⁸ Ober a rea c’hoas meur a exhortation all d’ar bobl, en eur brezeg dezhe an Aviel.

¹⁹ Mes Herodes an tetrark, o veza m’hen doa bet rebechou digant Ian, divarben Herodias, greg Philip he vreur, ha divarben an holl fallagriez hen doa great,

²⁰ goude an holl draou fall hen doa great, a reaz c’hoas hou‐man, lakaad a reaz teurel Ian er prizon.

²¹ Hogen, evel ma tostae ar bobl holl evit beza badezet, Jesus a oe badezet ive; hag e‐pad ma oa o pedi, an env a zigoraz,

²² hag ar Spered‐Santel a ziskennaz varnezhan gant eur c’horf henvel ouz eur goulm; hag e teuaz eur vouez euz an env, hag a lavaraz: Te eo va Mab muia‐karet, en pehini ema va holl flijadur.

²³ Ha Jesus a oa var‐dro tregont vloaz pa gommansaz da brezeg, hag e oa evel ma credet, mab da Josef, da Heli,

²⁴ da Vatthat, da Levi, da Velchi, da Janna, da Josef,

²⁵ da Vattathias, da Amos, da Nahum, da Heli, da Nagge,

²⁶ da Vaaht, da Vattathias, da Semeï, da Josef, da Juda,

²⁷ da Johanna, da Rhesa, da Zorobabel, da Salathiel, da Neri,

²⁸ da Velchi, da Addi, da Gosam, da Elmodam, da Her,

²⁹ da Jose, da Eliezer, da Jorim, da Vatthat, da Levi,

³⁰ da Simeon, da Juda, da Josef, da Jonan, da Eliakim,

³¹ da Velea, da Vaïnan, da Vattatha, da Nathan, da Zavid,

³² da Jesse, da Obed, da Vooz, da Salmon, da Naason,

³³ da Aminadab, da Aram, da Esrom, da Pharez, da Juda,

³⁴ da Jacob, da Isaac, da Abraham, da Dare, da Nachor,

³⁵ da Saruch, da Ragaü, da Phaleg, da Heber,

³⁶ da Sala, da Gaïnan, da Arphaxad, da Sem, da Noe, da Lamech,

³⁷ da Vathusala, da Henoch, da Jared, da Valaleel, da Gaïnan,

³⁸ da Enos, da Seth, da Adam, mab da Zoue.