Sant Lucas 23 - Testamant Nevez 1897 (Jenkins)

CHABISTR XXIII.

¹ Neuze an assamble holl, o veza savet, a gassaz anezhan da Bilat.

² Hag int a gommansaz tamal anezhan, en eur lavaret: Kavet hon euz an den‐man o trompla ar bobl hag o tifen paea an tribut da Cezar, hag o lavaret ez eo hen he‐unan ar C’hrist, ar roue.

³ Neuze Pilat a c’houlennaz diganthan: Ha te eo roue ar Judevien? Ha Jesus a respontaz dezhan: Hen lavaret a rez.

⁴ Ha Pilat a lavaraz da brinsed ar veleien ha d’ar bobl: Ne gavan netra da damal en den‐man.

⁵ Mes int a zalc’he muioc’h‐mui varnezhan, en eur lavaret: Lakaad a ra ar bobl d’en em zevel, en eur brezeg dre ar Jude holl, adaleg ar Galile beteg aman.

⁶ Pa glevaz Pilat komz euz ar Galile, e c’houlennaz hag an den‐ze a oa Galilead.

⁷ Hag o veza klevet e oa euz a c’houarnamant Herodes, e kassaz anezhan da gavoud Herodes, pehini a oa ive en Jerusalem en deiziou‐ze.

⁸ Pa velaz Herodes Jesus, hen devoe eur joa vraz, rag abaoe pell amzer hen doa c’hoant d’he velet, o veza m’hen doa klevet lavaret kalz a draou divar he ben; hag e oa en gortoz d’he velet oc’h ober eur miracl‐benag.

⁹ Goulen a reaz eta meur a dra diganthan; mes Jesus na respontaz netra dezhan.

¹⁰ Ha prinsed ar veleien hag ar Scribed a oa eno, hag e tamallent anezhan gant coler.

¹¹ Mes Herodes koulz hag he zoudarded hen tretaz gant disprijans; hag evit ober goab anezhan, e lekeaz hen gwiska gant eur zae gaer, hag hen kassaz da gavout Pilat.

¹² En deiz‐ze ive Pilat hag Herodes a zeuaz da veza mignoned; rag araog e oa droug etrezhe.

¹³ Neuze Pilat, o veza assamblet prinsed ar veleien, ar barnerien, hag ar bobl, a lavaraz dezhe:

¹⁴ Digasset hoc’h euz an den‐man d’in, tamallet ganeoc’h da lakaad ar bobl d’en em zevel; ha koulskoude, pa em euz hen interrojet dirazoc’h, n’em euz kavet anezhan coupabl a hini euz an torfedou a damallit dezhan;

¹⁵ nag Herodes ken neubeud; rag kasset em euz ac’hanoc’h d’hen kavout; ha setu n’hen deuz great netra da veritout ar maro.

¹⁶ Rag‐se, goude beza hen castizet, e laoskin anezhan.

¹⁷ Hogen, bep gouel e tlie accordi dezhe liberte eur prizonnier.

¹⁸ En em lakaad a rejont eta da grial holl assambles: Laka he‐man d’ar maro, ha laosk ganeomp Barabbas.

¹⁹ Hogen, Barabbas a oa bet lakeat er prizon abalamour da eur revolt a oa c’hoarvezet en kear, hag abalamour da eur muntrerez.

²⁰ Pilat a gomzaz a‐nevez outhe, gant ar c’hoant hen doa da leuskel Jesus.

²¹ Mes int a gommansaz da grial, en eur lavaret: Crucifi, Crucifi, anezhan.

²² Hag e lavaraz dezhe an trede gwech: Pe seurt droug eta hen deuz hen great? n’am euz kavet netra enhan hag a verit ar maro. Me eta a bunisso anezhan, ha neuze e laoskin anezhan.

²³ Mes int a zalc’he muioc’h‐mui da c’houlen, en eur grial var bouez ho fen ma vije crucifiet; hag ho c’hri‐fors hag hini prinsed ar veleien a greske bepred.

²⁴ Neuze Pilat a c’hourc’hemenaz ma vije great ar pez a c’houlennent.

²⁵ Hag e laoskaz ganthe an hini a oa bet lakeat er prizon evit eur revolt hag evit eur muntr, pa her goulennent; hag e laoskaz Jesus en ho bolontez.

²⁶ Ha pa oant ouz hen kas ganthe, e kemerjont eun den euz a Zyren, hanvet Simon, pehini a oa o tond divar ar meaz, hag e lekejont ar groaz varnezhan, evit he dougen var lerc’h Jesus.

²⁷ Hag eur foul vraz a bobl hag a c’hragez a iea var he lerc’h, hag a skoe var boull ho c’halon hag a hirvoude divar he ben.

²⁸ Mes Jesus o tistrei outhe, a lavaraz: Merc’hed Jerusalem, na welit ket varnoun‐me, mes gwelit varnoc’h hoc’h‐unan ha var ho pugale;

²⁹ rag dond a rai an deiziou ma vezo lavaret: Eürus ar gragez difrouez, ar c’hovou n’ho deuz ket douget, hag ar bronou n’ho deuz ket roet da zena!

³⁰ Neuze en em lakaint da lavaret d’ar meneziou: Kwezit varnomp, ha d’an tossennou: Goloit ac’hanomp.

³¹ Rag mar greont kement‐se d’ar c’hoat glaz, petra a raint‐hi d’ar c’hoat sec’h?

³² Digas a rent ive ganthe daou dorfetour all, evit ho lakaad d’ar maro assambles ganthan.

³³ Ha pa oent erruet el leac’h hanvet Calvar (pen‐maro), e crucifijont anezhan eno, hag an dorfetourien, unan a‐zeo, hag egile a‐gleiz.

³⁴ Mes Jesus a lavare: Va Zad, pardon dezhe, rag na ouzont ket petra a reont. Neuze, e lodenjont he zillad, hag e tenjont d’ar zort varnezhe.

³⁵ Ar bobl a choume eno hag a zelle. Hag ar chefou a rea goab assambles gant ar bobl, en eur lavaret: Saveteet hen deuz ar re all, ra en em zavetao eta he‐unan, mar d’eo ar C’hrist, an hini choazet gant Doue.

³⁶ Ar zoudarded ive, o tostaad evit kinnig dezhan gwin‐egr, a rea goab anezhan, hag a lavare:

³⁷ Mar d’oud roue ar Judevien, en em zaveta da‐unan.

³⁸ Ha bez’ e oa ive a‐uz d’he ben ar c’homzou‐man scrivet en gregach, en latin hag en hebrach: HE‐MAN EO ROUE AR JUDEVIEN.

³⁹ Unan euz an dorfetourien a oa crucifiet a insulte anezhan ive, en eur lavaret: Mar d’oud ar C’hrist, en em zaveta da‐unan ha ni ive.

⁴⁰ Mes egile, ouz he repren, a lavaraz dezhan: N’ec’h euz eta doujans e‐bed evit Doue, rag condaonet oud d’ar memeus maro?

⁴¹ Evidomp‐ni, gant justis eo e souffromp, rag souffr a reomp ar pez a zo dleet d’hon gwall oberou; mes he‐man n’hen deuz great droug e‐bed.

⁴² Hag e lavare da Jesus: Aotrou, bez sonj ac’hanoun, pa vezi antreet en da rouantelez.

⁴³ Ha Jesus a lavaraz dezhan: E gwirionez hen lavaran d’id, hirio e vezi ganen er barados.

⁴⁴ Hogen ar c’houec’hved heur e oa, pe var‐dro, hag e teuaz tevalijen var an douar holl beteg an naoved heur.

⁴⁵ An heol a devalaaz, hag ar voal euz an templ a freuzaz dre he greiz.

⁴⁶ Ha Jesus, en eur grial gant eur vouez krenv, a lavaraz: Va Zad, etre da zaouarn e rentan va spered. Hag o veza lavaret kement‐se e varvaz.

⁴⁷ Ar c’hantener, o velet ar pez a oa c’hoarvezet, a rentaz gloar da Zoue, en eur lavaret: E gwirionez, an den‐ze a oa eun den just.

⁴⁸ Hag ar bobl holl a oa en em dastumet da velet kement‐man, o velet an traou a oa c’hoarvezet, a zistroe d’ar gear en eur skei var boull ho c’halon.

⁴⁹ Hag ar re holl euz he anaoudegez, hag ar groagez ho doa heulliet anezhan adaleg ar C’halile, en em zalc’he a‐ziabell, o sellet ouz an traou‐ze.

⁵⁰ Hogen eun den, hanvet Josef, hag a oa eur senatour, eun den mad ha just;

⁵¹ pehini n’hen doa ket consantet d’ho c’huzul na d’ho oberou, hag a oa euz a Arimathe, eur gear euz ar Jude, hag a oa o c’hortoz ive rouantelez Doue,

⁵² o veza deuet da gavout Pilat, a c’houlennaz diganthan corf Jesus.

⁵³ Hag o veza hen diskennet euz ar groaz, hen lienaz gant eul linsel, hag hen lakeaz en eur bez toullet er roc’h, ha ne oa bet c’hoas lakeat den e‐bed enhan.

⁵⁴ An deiz‐ze a oa deiz ar breparation, hag ar sabbat a iea da gommans.

⁵⁵ Hag ar gragez a oa deuet gant Jesus euz a C’halile, o veza eat var lerc’h Josef, a velaz e pe leac’h e oa ar bez, ha penaos e oa bet lekeat ar c’horf enhan.

⁵⁶ Hag o veza distroet var ho c’hiz, e preparjont essanzou ha louzou a c’houez‐vad, hag e kemerjont ho repos deiz ar sabbat, hervez al lezen.