Sant Lucas 20 - Testamant Nevez 1897 (Jenkins)

CHABISTR XX.

¹ Eun devez ma oa Jesus o kelen ar bobl en templ, ha ma oa o prezeg an Aviel, prinsed ar veleien hag ar Scribed, gant ar re Ancien, o veza erruet eno,

² a gomzaz outhan hag a lavaraz: Lavar deomp dre be seurt otorite e rez‐te an traou‐ze, ha piou hen deuz roet d’id an otorite‐ze?

³ Hen a respontaz hag a lavaraz dezhe: Me a c’houlenno ive eun dra diganeoc’h; respontit d’in:

⁴ Pe euz an env, pe a‐berz an dud eo e teue badiziant Ian?

⁵ Hogen, evel‐hen e rezonent enhe ho‐unan: Mar leveromp: Euz an env, hen a lavaro: Perag eta n’hoc’h euz‐hu ket credet dezhan?

⁶ Ha mar leveromp: A‐berz an dud, e vezimp meinet gant ar bobl holl; rag ar bobl a gred mad ez eo Ian eur profet.

⁷ Rag‐se e respontjont ne ouient ket euz a beleac’h e teue.

⁸ Ha Jesus a lavaraz dezhe: Na me ken neubeud na livirin ket deoc’h dre be seurt otorite e ran an traou‐man.

⁹ Neuze e commansaz lavaret d’ar bobl ar barabolen‐man: Eun den a blantaz eur winien, hag a roaz anezhi e feurm da labourerien, hag ez eaz euz he vro evit pell amzer.

¹⁰ Ha pa oa deuet an amzer da zastum, e kassaz eur servicher etrezeg al labourerien evit kaout diganthe frouez euz ar winien; mes al labourerien goude beza skoet varnezhan, a gassaz anezhan kuit en goullo.

¹¹ Kas a reaz c’hoas eur servicher all; mes goude beza kannet ha gwall‐dretet he‐man ive, e kasjont anezhan kuit en goullo.

¹² Kas a eure c’hoas unan all evit an trede gwech; mes he vlessa a rejont ive, hag e taoljont anezhan er meaz.

¹³ Mestr ar winien a lavaraz neuze: Petra a rin‐me? Kas a rin va mab muia‐karet; marteze, pa her gwelint, e toujint dezhan.

¹⁴ Mes pa velaz al labourerien anezhan, e commansjont da rezoni evel‐hen etreze: He‐man eo an heritour; deuit, lazomp anezhan, evit ma vezo he heritach deomp‐ni.

¹⁵ Hag, o veza taolet anezhan er meaz euz ar winien, hen lazjont. Petra a rai eta mestr ar winien?

¹⁶ Dond a rai, hag e lako al labourerein‐ze d’ar maro, hag e roio he winien da labourerien all. Ar Judevien, pa glevjont kement‐se, a lavaraz: Doue ra viro na c’hoarvezfe kement‐se!

¹⁷ Neuze Jesus, o sellet piz outhe, a lavaraz: Petra a zinifi eta an dra‐man a zo scrivet: Ar mean a zo bet taolet a‐gostez gant ar re a oa o vatissa, hennes a zo deuet da veza ar c’henta mean‐corn?

¹⁸ Piou‐benag a gwezo var ar mean‐ze a vezo brevet, hag an hini a gwezo ar mean‐ze varnezhan a vezo flastret.

¹⁹ Neuze prinsed ar veleien hag ar Scribed a glaskaz, hep dale pelloc’h, lakaad ho daouarn varnezhan; rag anavezet ho doa hen doa lavaretar barabolen‐ze a‐eneb dezhe; mes aoun ho doa rag ar bobl.

²⁰ Rag‐se, o teurel evez mad outhan, e kasjont tud hag a rea seblant da veza tud just, evit hen surpren en he gomzou, ha gallout evel‐se hen livra d’ar barner hag hen lakaad etre daouarn ar gouarner.

²¹ An dud‐se a c’houlennaz diganthan an dra‐man; Mestr, gouzoud a reomp e komzez hag e kelennez gant eünder, hag e teskez hent Doue hervez ar wirionez, heb sellet ouz apparans an dud.

²² Ha permetet eo deomp paea an tribut da Cezar pe n’eo ket?

²³ Mes Jesus, oc’h anaoud ho finessa, a lavaraz dezhe: Perag e tentit‐hu ac’hanoun?

²⁴ Diskouezit d’in eun diner. Euz piou eo an imach hag an hano a zo var he‐man? Respont a rejont: Euz a Cezar.

²⁵ Hag hen a lavaraz dezhe: Rentit eta da Cezar ar pez a zo da Cezar, ha da Zoue ar pez a zo da Zoue.

²⁶ Ha na heljont ket hen surpren en he gomzou dirag ar bobl; mes souezet gant ar respont hen doa great, e tavjont.

²⁷ Neuze eur re‐benag a‐douez ar Saduceed, pere a nac’h ar resurrection, a dostaaz, hag a c’houlennaz evel‐hen diganthan:

²⁸ Mestr, Moises hen deuz gourc’hemenet deomp, pa zigouez da eun den‐benag kaoud eur breur dimezet hag a varv heb bugale, e tle hennes kemeret ar vreg, ha sevel lignez d’he vreur.

²⁹ Hogen, bez’ e oa seiz breur. Ar c’henta, o veza dimezet, a varvaz heb bugale.

³⁰ An eil a zimezaz d’he vreg, hag a varvaz heb bugale.

³¹ Neuze an trede a zimezaz dezhi ive, hag ho seiz e rejont ar memeus tra, hag e varvjont heb lezel bugale.

³² Var lerc’h ar re‐man holl ar vreg a varvaz ive.

³³ Da behini anezhe eta e vezo hi greg pa resussito ar re varo? Rag ho zeiz ez int bet dimezet dezhi.

³⁴ Jesus a respontaz dezhe: Bugale ar bed‐man a zimez, hag a ro da zimezi.

³⁵ Mes ar re a vezo kavet dign da gaout lod er bed da zond hag en resurrection ar re varo, na zimezint ket ha ne roint ket da zimezi.

³⁶ Rag ne hellint ket ken neubeud mervel, rag henvel e vezint ouz an elez, hag e vezint bugale da Zoue, o veza bugale a resurrection.

³⁷ Hogen Moises he‐unan a ziskouez deomp ive e teu ar re varo da resussita, pa deu, o komz divarben ar bod‐spern, da c’hervel an Aotrou, Doue Abraham, Doue Isaac ha Doue Jacob.

³⁸ Hogen, Doue n’eo ket Doue ar re varo, mes Doue ar re veo; rag holl e vevont dezhan.

³⁹ Neuze darn euz ar Scribed, o komz, a lavaraz: Mestr, komzet mad ec’h euz.

⁴⁰ Ha ne gredent ken goulen netra diganthan.

⁴¹ Neuze e lavaraz dezhe: Penaos ec’h heller lavaret ez eo ar C’hrist Mab da Zavid?

⁴² Pa lavar David he‐unan en levr ar Salmou: An Aotrou hen deuz lavaret d’am Aotrou:

⁴³ Azez a‐zeo d’in, ken am bezo lakeat da inimied da scabel dindan da dreid.

⁴⁴ Mar deu eta David d’hen gervel Aotrou, penaos ec’h hell hen beza he vab?

⁴⁵ Hag, o veza ma oa ar bobl holl o selaou, e lavaraz d’he ziskibien:

⁴⁶ Diwallit ouz ar Scribed pere a blij dezhe pourmen gant saeou hir, hag a gar beza saludet var ar blasennou public ha kaoud ar c’hadoriou kenta er sinagogou, hag ar plasou kenta er festou;

⁴⁷ ha pere a zevor tiez an intanvezed var digarez ober pedennou hir; beza ho devezo eur gondaonation vrassoc’h.