Sant Lucas 2 - Testamant Nevez 1897 (Jenkins)

CHABISTR II.

¹ En amzer‐ze, e oe embannet eun urz a‐berz Cezar‐Augustus, evit ma vije countet an niver euz an dud a oa var ar bed holl.

² An denombramant kenta‐zea oe great pa oa Kurenus gouarner ar Siri.

³ An holl eta a iea da lakaad ho hano, pep hini en he gear he‐unan.

⁴ Josef ive a bignaz euz a C’halile, euz a gear Nazaret, d’ar Jude, da gear David, a c’halver Bethlehem, dre ma oa euz a di hag euz a famil David,

⁵ evit lakaad he hano gant Mari, he bried, pehini a oa dougeres.

⁶ Hag e‐pad ma oant eno, ec’h erruaz an amzer ma tlie gwillioudi.

⁷ Hag e c’hanaz he mab kenta‐ganet, hag e vailluraz anezhan, hag hen lekeaz en eur manjouer, rag ne oa ket a blas evithe en hostaliri.

⁸ Hogen, bez’ e oa er vro‐ze pastored pere a choume er meziou, o tiwall ho loened e‐pad beilladennou an noz.

⁹ Ha setu, eun eal a‐berz an Aotrou en em brezantaz dezhe, ha gloar an Aotrou a lugernaz en‐dro dezhe, hag e oant spouronet‐holl.

¹⁰ Neuze an eal a lavaraz dezhe: N’ho pezet ket a aoun; rag digas a ran deoc’h eur c’helou mad, pehini a vezo eur sujet a joa vraz evit ar bobl holl;

¹¹ rag ganet eo hirio deoc’h, en kear David, eur Zalver, pehini eo ar C’hrist, an Aotrou.

¹² Ha setu aman eur sin deoc’h evit hen anaoud: Kavoud a reot ar bugel bihan mailluret, ha gourvezet en eur manjouer.

¹³ Ha kerkent en em gavaz gant an eal eun niver braz euz a arme an env, o veuli Doue hag o lavaret:

¹⁴ Gloar da Zoue, en huella euz an envou; peoc’h var an douar, bolontez vad e‐kenver an dud!

¹⁵ Ha goude ma ho doe an elez kuiteet diouthe hag en em dennet en env, ar bastored a lavaraz an eil d’egile: Deomp eta bete Bethlehem, ha gwelomp ar pez a zo c’hoarvezet, hag a zo roet deomp da anaoud gant an Aotrou.

¹⁶ Mond a rejont eta gant hast, hag e kavjont Mari, ha Josef, hag ar bugel bihan gourvezet er manjouer.

¹⁷ Ha pa ho doa gwelet anezhan, e tisclerjont ar pez a oa bet lavaret dezhe divarben ar bugel‐ze.

¹⁸ Hag ar re holl a glevaz kement‐se, a oa souezet braz euz ar pez a lavare ar bastored dezhe.

¹⁹ Ha Mari a zalc’he sonj euz an holl draou‐ze, hag a vedite anezhe ebarz en he c’halon.

²⁰ Hag ar bastored a zistroaz, en eur c’hlorifia hag en eur veuli Doue euz an holl draou ho doa gwelet ha klevet, hervez ma oa bet lavaret dezhe.

²¹ Pa oe deuet an eizved devez evit circonciza ar bugel, e oe hanvet JESUS, an hano a oa bet roet dezhan gant an eal, araog ma oa concevet en kov he vam.

²² Ha pa oe accomplisset deiziou ho furification, hervez lezen Moises, e tougjont ar bugel da Jerusalem, evit hen prezanti d’an Aotrou,

²³ hervez ma’z eo scrivet el lezen an Aotrou: Pep bugel mal kenta‐ganet a vezo consacret d’an Aotrou;

²⁴ hag evit offr en sacrifis, hervez ma’z eo gourc’hemenet el lezen an Aotrou, eur c’houblad turzuneled, pe diou goulmic.

²⁵ Bez’e oa en Jerusalem unan hanvet Simeon, eun den just hag a zoujans Doue; he‐man a c’hortoze consolation Israel, hag ar Spered‐Santel a oa varnezhan.

²⁶ Discleriet e oa bet dezhan gant ar Spered‐Santel, ne varvje ket, ken hen divije gwelet ar C’hrist euz an Aotrou.

²⁷ Dond a reaz d’an templ renet gant ar Spered‐Santel; hag evel ma oa he dad hag he vam o tigas ar bugel Jesus, evit ober dezhan ar pez e oat custum hervez al lezen,

²⁸ e kemeraz anezhan etre he zivrec’h, hag e veulaz Doue, en eur lavaret:

²⁹ Breman, Aotrou, e laoskez da zervicher da guitaad en peoc’h, hervez da c’her;

³⁰ rag va daou‐lagad ho deuz gwelet da zilvidigez,

³¹ ar zilvidigez ec’h euz preparet dirag faç an holl boblou,

³² ar goulou a dle sclerijenna an nationou, hag ar gloar euz da bobl Israel.

³³ Ha Josef hag he vam a oa souezet euz an traou a lavaret divar he ben.

³⁴ Ha Simeon a vennigaz anezhe, hag a lavaraz da Vari he vam: Setu, ar bugel‐man a zo lakeat evit beza occasion a scandal hag a zilvidigez da galz en Israel, hag evit gouzanv controliach a‐berz an dud,

³⁵ en hevelep doare ma vezo dizoloet ar zonjezonou euz calon meur a hini; ha da ene‐te a vezo treuzet gant eur c’hleze.

³⁶ Bez’e oa ive Anna ar brofetes, merc’h da Phanuel, euz a dribu Ascer; oajet braz e oa, hag he doa bevet seiz vloaz gant he goaz, adaleg he gwerc’hted.

³⁷ Intanvez e oa, ha oajet a bevar bloaz ha pevar‐ugent, pe var dro, ha na zortie ket euz an templ, mes servicha a rea Doue er iun hag er beden noz deiz.

³⁸ Hou‐man, o veza en em gavet eno en heur‐ze, a veule ive an Aotrou, hag a gomze divarben Jesus d’an holl dud euz a Jerusalem, pere a oa o c’hortoz delivrans Israel.

³⁹ Ha goude m’ho doe great pep tra hervez lezen an Aotrou, e tistrojont en Galile, d’ho c’hear Nazaret.

⁴⁰ Hag ar bugel a greske hag a grenvae en spered, o veza leun a furnez; ha gras Doue a oa varnezhan.

⁴¹ Hogen, he dad hag he vam a iea bep bloaz da Jerusalem, da c’houel ar Pask.

⁴² Ha pa hen doe daouzec vloaz, e savjont da Jerusalem, evel ma oa giz ar gouel.

⁴³ Goude ma oe tremenet deiziou ar gouel, pa oant o tistrei, ar bugel Jesus a choumaz en Jerusalem; ha Josef hag he vam na ouient ket kement‐se.

⁴⁴ Mes, o sonjal e oa assambles gant ho c’hen‐veajourien, e valejont e‐pad eun dervez, ha goude e klaskjont anezhan etouez ho c’herent hag ho anaoudegez;

⁴⁵ hag o veza n’her c’havent ket, e tistrojont da Jerusalem da glask anezhan.

⁴⁶ Hag a‐ben tri devez, e kavjont anezhan en templ, azezet e‐kreiz an doctored, o selaou hag oc’h interroji anezhe.

⁴⁷ Hag ar re holl a gleve anezhan, a oa souezet euz he furnez hag euz he respontchou.

⁴⁸ Pa velaz he dad hag he vam anezhan, e oent souezet; hag he vam a lavaraz dezhan: Va bugel, perag ec’h euz‐te great kement‐man deomp? Setu da dad ha me hon euz da glasket gant kalz a nec’hamant.

⁴⁹ Hag hen a lavaraz dezhe: Perag e klaskec’h‐hu ac’hanoun? Ha na ouiec’h‐hu ket penaos eo red d’in beza occupet gant afferou va Zad?

⁵⁰ Mes int na gomprenjont ket ar pez a lavare dezhe.

⁵¹ Goude‐ze e tiskennaz ganthe, hag e teuaz da Nazaret, hag e oa sentus outhe. Hag he vam a vire an holl draou‐ze en he c’halon.

⁵² Ha Jesus a greske en furnez, en ment hag en gras, dirag Doue ha dirag an dud.