Sant Lucas 18 - Testamant Nevez 1897 (Jenkins)

CHABISTR XVIII.

¹ Jesus a lavaraz ive ar barabolen‐man, evit diskouez ez eo red pedi bepred, hag hep skuiza:

² En eur gear e oa eur barner pehini na zouje ket Doue, ha n’hen doa respet e‐bed evit den.

³ Bez’ e oa ive er gear‐ze eun intanvez hag a zeue d’hen kavout hag a lavare dezhan: Rent justis d’in a‐enep va adversour.

⁴ E‐pad pell‐amzer na fellaz dezhan ober netra evithi. Goude‐ze evel‐kent e lavaraz enhan he‐unan: Petra‐benag ma na zoujan ket Doue, ha ma n’em euz respet e‐bed evit den,

⁵ koulskoude, o veza ne ehan ket an intanvez‐ze d’am inoui, e rin justis dezhi, gant aoun ne gendalc’hfe atao da zond da derri va fen d’in.

⁶ Hag an Aotrou a lavaraz: Selaouit mad ar pez a lavar ar barner injust‐se.

⁷ Ha Doue, daoust hag hen na venjo ket ar re hen deuz choazet, pere a gri var zu enhan noz deiz, petra‐benag ma tale da zond d’ho venji?

⁸ Hen lavaret a ran deoc’h, hep‐dale e venjo anezhe. Mes pa deui Mab an den, daoust hag hen a gavo feiz var an douar?

⁹ Lavaret a reaz ive ar barabolen‐man, divarben tud pere a grede enhe ho‐unan e oant tud just, hag a zisprije ar re all:

¹⁰ Daou zen a bignaz en templ evit pidi; unan a oa Farizian, hag egile publican.

¹¹ Ar Farizian, oc’h en em zerc’hel en he za, a bede evel‐hen enhan he‐unan: O Doue, da drugarekaad a ran o veza n’oun ket evel an dud all pere a zo scraperien, injust, avoultrerien, na zo‐ken evel ar publican‐ze;

¹² iun a ran diou wech ar sizun, hag e roan an deog var gement em euz.

¹³ Mes ar publican, oc’h en em zerc’hel a‐ziabell, na grede ket zo‐ken sevel he zaou‐lagad var‐zu an env; mes skei a rea var boull he galon, en eur lavaret: O Doue, kemer truez ouzin‐me rag n’ed oun nemed eur pec’her!

¹⁴ Hen lavaret a ran deoc’h, he‐man a ziskennaz d’he di justifiet kentoc’h eged egile; rag kement hini en em huella a vezo izelleet; ha kement hini en em izella, a vezo huelleet.

¹⁵ Digas a rent ive bugaligou dezhan da douch. An diskibien o velet kement‐se, a reprene ar re ho digasse.

¹⁶ Mes Jesus, o c’hervel anezhe d’he gavoud, a lavaraz: List ar vugaligou da zond d’am c’havoud ha na virit ket outhe; rag rouantelez Doue a zo evit ar re a zo henvel outhe.

¹⁷ E gwirionez hen lavaran deoc’h, piou‐benag na recevo ket rouantelez Doue evel eur bugel bihan, na antreo ket enhi.

¹⁸ Neuze eur chef euz ar c’hontre a c’houlennaz digant Jesus: Mestr mad, petra a dlean‐me da ober evit kaoud ar vuez eternel?

¹⁹ Jesus a lavaraz dezhan: Perag e c’halvez‐te ac’hanoun mad? N’euz hini mad e‐bed, nemed Doue hep‐ken.

²⁰ Anaoud a rez ar gourc’hemenou: Na ri ket a avoultriach; na lazi ket; na laeri ket; na liviri ket a falz testeni; henor da dad ha da vam.

²¹ Hen a lavaraz: Miret em euz kement‐se holl adaleg va yaouankiz.

²² Jesus, o klevet kement‐se, a lavaraz dezhan: Mankoud a ra d’id eun dra c’hoas; gwerz kement ec’h euz, ha ro‐hen d’ar beorien, hag e pezo eun tenzor en env; ha neuze deuz, hag heuil ac’hanoun.

²³ Mes hen, pa hen doe klevet kement‐se, a zeuaz da veza gwall drist; rag pinvidic braz e oa.

²⁴ Jesus, o velet e oa deuet gwall drist, a lavaraz: Na pegen diez eo d’ar re ho deuz madou antren en rouantelez Doue!

²⁵ Eassoc’h eo da eur c’hanval tremen dre graouen eun nadoz, eged da eun den pinvidic antren en rouantelez Doue.

²⁶ Hag ar re a gleve anezhan a lavaraz: Piou eta a hell beza salvet?

²⁷ Ha Jesus a lavaraz dezhe: Ar pez a zo impossubl d’an dud a zo possubl da Zoue.

²⁸ Ha Per a lavaraz: Setu, ni hon euz dilezet pep‐tra, hag hon euz heulliet ac’hanoud.

²⁹ Hag hen a lavaraz dezhe: E gwirionez hen lavaran deoc’h, n’euz hini hag hen deuz dilezet ti, pe dad ha mam, pe vreudeur, pe vreg, pe vugale, abalamour da rouantelez Doue,

³⁰ ha na recevo kalz muioc’h er bed‐man, hag er bed da zond, ar vuez eternel.

³¹ Jesus a gemeraz neuze an daouzec a‐gostez ganthan hag a lavaraz dezhe: Setu, emaomp o pignad da Jerusalem, ha kement tra a zo bet scrivet gant ar brofeted divarben Mab an den a ia da veza accomplisset.

³² Rag livret e vezo d’ar Jentiled, goapeat ha gwall‐dretet e vezo, ha cranchet e vezo outhan;

³³ ha goude ma vezo bet skourjezet, e vezo lakeat d’ar maro, hag an trede devez e resussito.

³⁴ Mes ne gomprenjont netra a gement‐se; ar c’homzou‐ze a oa goloet evithe, ha ne gomprenent ket ar pez a lavare dezhe.

³⁵ Pa oa o tostaad da Jerico, eun den dall, azezet var bord an hent o c’houlen an aluzen,

³⁶ pa glevaz ar bobl o vond a‐biou, a c’houlennaz petra e oa kement‐se;

³⁷ ha e oe roet dezhan da anaoud e oa Jesus a Nazaret o tremen.

³⁸ Neuze e commansaz da grial: Jesus, Mab David, kemer truez ouzin!

³⁹ Hag ar re a iea araog a c’hourdrouze anezhan, evit hen lakaad da rei peoc’h; mes hen a grie c’hoas krenvoc’h: Mab David, kemer truez ouzin!

⁴⁰ Ha Jesus, o choum en he za, a c’hourc’hemenaz hen digas dezhan, ha pa oe deuet an den dall beteg enhan, e c’houlennaz diganthan:

⁴¹ Petra a fell d’id a rafen evidoud? Hag hen a respontaz: Aotrou, ma kavin ar gwelet.

⁴² Ha Jesus a lavaraz dezhan: Receo ar gwelet; da feiz hen deuz da iac’heet.

⁴³ Ha rag‐tal e kavaz ar gwelet, hag ec’h heullie anezhan, o renta gloar da Zoue. Hag ar bobl holl, o velet kement‐se, a veulaz Doue.