Sant Lucas 17 - Testamant Nevez 1897 (Jenkins)

CHABISTR XVII

¹ Jesus a lavaraz ive d’he ziskibien: Red eo e c’hoarvezfe skoueriou fall; koulskoude malheur d’an hini a ro skouer fall.

² Gwelloc’h e vez dezhan ma vez staget ouz he c’houzoug eur mean milin, hag ma vez taolet er mor, eged ma rofe skouer fall da hini euz ar re vihan‐man.

³ Likit evez ouzoc’h hoc’h‐unan. Mar hen deuz pec’het da vreur en da enep, repren anezhan; ha mar hen deuz keuz, pardon dezhan.

⁴ Ha mar hen deuz pec’het enep d’id seiz gwech en deiz ha mar teu seiz gwech en deiz‐ze da zistrei ouzid, ha da lavaret: Keuz em euz; pardon dezhan.

⁵ Hag an ebestel a lavaraz d’an Aotrou: Cresk enomp ar feiz.

⁶ Hag an Aotrou a lavaraz: Mar ho pije eur feiz ker braz hag eur c’hreunen sezo, e lavarjac’h d’ar vezen zicomor‐man: En em difram ac’halen ha kea d’en em blanta er mor; ar vezen a zentfe ouzoc’h.

⁷ Piou ac’hanoc’h, hag hen deuz eur mevel oc’h arat, pe o vessa, a lavar dezhan kerkent ha ma vez distro euz ar park: Tosta aman, hag en em laka ouz taol?

⁸ Daoust ha ne lavarfe ket dezhan kentoc’h: Aoz d’in va c’hoan, stard da c’houriz en‐dro d’id, ha servich ac’hanoun, ken am bezo debret hag evet; ha goude‐ze e tebri hag ec’h evi.

⁹ Daoust hag hen hen devezo anaoudegez‐vad d’ar mevel‐ze, evit beza great ar pez a oa bet gourc’hemenet dezhan? Ne gav ket d’in.

¹⁰ Evel‐se ive c’houi, pa ho pezo great kement a zo gourc’hemenet deoc’h, livirit: Servicherien didal‐voudec ez omp, rag n ’hon euz great nemed ar pez a oa dleet deomp da ober.

¹¹ Digwezoud a reaz dezhan, en eur vond da Jerusalem, tremen dre greiz ar Samari hag ar Galile.

¹² Ha pa oa oc’h antren en eur bourg, e teuaz d’hen dialben deg den lor, pere en em zalc’he pell diouthan;

¹³ hag int, o sevel ho mouez, a lavaraz: Jesus, Mestr, bez truez ouzimp!

¹⁴ Jesus pa velaz anezhe, a lavaraz dezhe: It, hag en em ziskouezit d’ar veleien. Hag e c’hoarvezaz pa oant o vond, ma oent neteet euz ho lorgnez.

¹⁵ Hag unan anezhe, o velet e oa rentet pare, a zistroaz var he c’hiz en eur veuli Doue a vouez huel;

¹⁶ hag en em daolaz e c’harz treid Jesus, he visach ouz an douar, o renta grasou dezhan. Hogen he‐man a oa eur Samaritan.

¹⁷ Jesus o komz outhan, a lavaraz: Ha n’inthi ket bet pareet ho dek? Peleac’h eta eo choumet an nao all?

¹⁸ N’euz nemed an estranjour‐man hag a zo distroet evit renta gloar da Zoue.

¹⁹ Neuze e lavaraz dezhan: Sav alese, kea, da feiz hen deuz da zaveteet.

²⁰ Ar Farizianed, o veza goulennet diganthan peur e teuje rouantelez Doue, e respontaz dezhe: Rouantelez Doue na zeuio ket gant apparans;

²¹ ha ne vezo ket lavaret: Setu‐hen aman, pe: Setu‐hen a‐hont; rag setu, ema rouantelez Doue en ho kreiz.

²² Hag e lavaraz d’an diskibien: Dond a rai an deiziou ma ho pezo c’hoant da velet unan euz deiziou Mab an den, ha n’her gwelot ket.

²³ Hag e vezo lavaret deoc’h: Setu‐hen aman, pe: Setu‐hen a‐hont; n’ez it ket, ha n’ho heullit ket.

²⁴ Rag e‐c’hiz ma lugern al luc’heden euz an eil pen an oabl beteg egile, evel‐se ive ec’h apparisso Mab an den pa zeuio he zeiz.

²⁵ Mes red eo dezhan da genta gouzanv kalz ha beza nac’het gant ar generation‐man.

²⁶ Hag ar pez a c’hoarvezaz en deiziou Noe, a c’hoarvezo ive en amzer Mab an den:

²⁷ an dud a zebre, a eve, a zimeze, hag a roe en priedelez, beteg an deiz ma c’hantreaz Noe ebarz an arc’h; hag an diluch a zeuaz hag ho distrujaz holl.

²⁸ Kement‐se ive a c’hoarvezaz en amzer Lot; an dud a zebre, a eve, a brene, a verze, a blante hag a zave tiez;

²⁹ mes en deiz ma sortiaz Lot euz a Sodom, eur glao tan ha soufr a gwezaz euz an env, hag ho distrujaz holl;

³⁰ evel‐se e c’hoarvezo ive en devez ma c’happarisso Mab an den.

³¹ En deizze, an neb a vezo var an doen, hag hen devezo he veubl ebarz an ti, diwallo da zisken evit ho c’has ganthan; hag er memeus doare, an neb a vezo er meziou, diwallo da zistrei var he c’hiz.

³² Dalc’hit sonj euz a vreg Lot.

³³ Piou‐benag a glasko savetei he vuez, he c’hollo; ha piou‐benag a gollo anezhi, he c’havo.

³⁴ Lavaret a ran deoc’h, penaos en noz‐ze e vezo daou assambles en eur gwele; unan a vezo kemeret hag egile lezet;

³⁵ diou a vezo o vala assambles, unan a vezo kemeret hag eben lezet;

³⁶ daou a vezo er park, unan a vezo kemeret, hag egile lezet.

³⁷ Hag o respont, e lever‐jont dezhan: E pe leac’h, Aotrou, e c’hoarvezo kement‐se? Hag hen a lavaraz dezhe: E pe leac’h‐benag ma vezo ar c’horf maro, eno en em zastumo an egled.