Sant Lucas 11 - Testamant Nevez 1897 (Jenkins)

CHABISTR XI.

¹ Eun devez ma oa Jesus o pedi en eul leac’h, goude ma oa echuet he beden, unan euz he ziskibien a lavaraz dezhan: Aotrou, desk deomp pedi, evel ma hen deuz Ian desket ive d’he ziskibien.

² Ha Jesus a lavaraz dezhe: Pa bedot, livirit: Hon tad pehini a zo en envou; da hano bezet santifiet; ra zeui da rouantelez; da volontez bezet great var an douar evel en env;

³ ro deomp bemdez hor bara pemdeziec;

⁴ pardon deomp hor pec’hejou; rag ni a bardon ive d’ar re holl ho deuz hon offanset; ha n’hon lez ket da gweza en dentation; mes delivr ac’hanomp diouz an drouk.

⁵ Neuze e lavaraz dezhe: Mar hen dije unan ac’hanoc’h eur mignon hag a deuje d’hen kavout da hanter‐noz, da lavaret dezhan: Va mignon, prest d’in tri bara;

⁶ rag unan euz va mignoned, o veaji, a zo deuet du‐man, ha n’em euz netra da rei dezhan;

⁷ ha mar teuje hennes a zo en he di da respont: Ro peoc’h d’in, va dor a zo serret, ha va bugale a zo ganen em gwele; ne hallan ket sevel evit rei bara d’id.

⁸ Me a lavar deoc’h penaos, ma na zavfe ket evit rei bara dezhan abalamour ma’z eo he vignon, e savfe o veza skuiz ouz hen klevet, hag e rofe dezhan kement ha m’hen defe ezom.

⁹ Me ive a lavar deoc’h: Goulennit, hag e vezo roet deoc’h; klaskit, hag e kavfot; skoit, hag e vezo digoret deoc’h.

¹⁰ Rag an hini a c’houlen, a receo, hag an hini a glask, a gav; hag an hini a sko, e vezo digoret dezhan.

¹¹ Piou ac’hanoc’h‐hu eo an tad, ma c’houlenfe he vab diganthan eun tam bara, a rofe dezhan eur mean? Pe, ma c’houlenfe diganthan eur pesk, daoust hag hen a rofe dezhan eur serpant e leac’h eur pesk?

¹² Pe otramant c’hoas, mar goulen diganthan eur vi, daoust hag hen a rofe dezhan eur scorpion?

¹³ Mar gouzoc’h eta c’houi, pere a zo fall, rei traou mad d’ho pugale, pegement muioc’h e roio ho Tad celestiel ar Spered‐Santel d’ar re her goulen diganthan?

¹⁴ Jesus a gassaz ive kuit eun drouk‐spered hag a oa mud; ha pa oe sortiet an drouk‐spered, an den mud a gomzaz; hag ar bobl a oe leun a admiration.

¹⁵ Hag unan‐benag anezhe a lavaraz: Dre Veelzebul, prins an drouk‐sperejou, eo e kas kuit an drouk‐sperejou.

¹⁶ Mes darn all, evit hen amprouv, a c’houlenne diganthan eur miracl euz an env.

¹⁷ Mes Jesus, oc’h anaoud ho zonjezonou, a lavaraz dezhe: Pep rouantelez divizet a‐enep dezhi he‐unan a vezo troet en eun dezert; hag eun ti divizet a‐enep dezhan he‐unan a gwezo.

¹⁸ Mar d’eo eta Satan divizet a‐enep dezhan he‐unan, penaos ec’h hallo he rouantelez choum en he za? pa’z eo gwir e livirit eo dre Veelzebul e kassan kuit an drouk‐sperejou.

¹⁹ Mar d’eo dre Veelzebul e kassan kuit an drouk‐sperejou, dre biou eta ho pugale‐hu ho c’hassont‐hi kuit? Int ho‐unan eta a vezo ho parnerien.

²⁰ Mes mar d’eo dre viz Doue e kassan kuit an drouk‐sperejou, a dra sur rouantelez Doue a zo deuet beteg enoc’h.

²¹ Pa vez eun den krenv hag armet mad o tiwall he di, kement hen deuz a zo diwallet mad.

²² Mes pa zeu unan krenvoc’h egethan, he‐man hen taol d’an douar, a lam diganthan he holl armou var bere e oa he fizians, hag e ra partach var he vadou.

²³ An neb n’ema ket ganen, a zo a‐enep d’in, hag an hini na zastum ket ganen, a sklabez.

²⁴ Pa vez eat eur spered impur er meaz euz a eun den, ez a dre leac’hiou seac’h, o klask repos, hag evel na gav ket, e lavar: Distrei a rin d’am zi euz a behini oun sortiet.

²⁵ Ha pa zeu d’he di, e kav anezhan skubet ha kempennet.

²⁶ Neuze ez a, hag e kemer ganthan seiz spered all gwassoc’h egethan, hag ec’h antreont, hag e choumont eno; ha stad diveza an den‐ze a zeu da veza gwassoc’h eged ar c’henta.

²⁷ Pa oa o lavaret an traou‐ze, eur plac’h euz a‐greiz ar bobl a zavaz he mouez, hag a lavaraz dezhan: Eürus ar c’hov hen deuz da zouget, hag an diou‐vron ho deuz da vaget!

²⁸ Eürus kentoc’h, eme Jesus, ar re a zelaou ger Doue, hag a vir anezhan!

²⁹ Evel ma en em dastume ar bobl en eur vanden vraz, Jesus a gommansaz da lavaret: Ar raç tud‐man a zo fall, goulen a reont eur miracl, ha na vezo roet dezhe hini e‐bed nemed hini ar profet Jonas.

³⁰ Rag, evel ma oe Jonas eur miracl evit an dud euz a Niniv, evel‐se ive e vezo Mab an den eur miracl evit ar generation‐man.

³¹ Rouanez ar C’hreiz‐teiz a zavo, deiz ar varn, a‐enep tud ar generation‐man, hag ho c’hondaono, rag hou‐man a zeuaz euz ar pen pella euz an douar da zelaou furnez Salomon; ha setu, ez euz aman brassoc’h eged Salomon.

³² Tud Niniv a zavo, deiz ar varn, a‐enep ar generation‐man, hag he c’hondaono, rag ar re‐man en em gonvertissaz gant predication Jonas; ha setu, ez euz aman brassoch eged Jonas.

³³ Den e‐bed na allum eur c’houlaouen evit he lakaad en eul leac’h kuzet, pe dindan eur boezel, mes he lakaad a ra var eur c’hantoleur, evit ma c’hallo ar re a zeu en ti gwelet ar sclerijen.

³⁴ Al lagad eo sclerijen ar c’horf; rag‐se mar d’eo iac’h da lagad, da gorf holl a vezo sclerijennet; mes mar d’eo fall, da gorf ive a vezo en devalijen.

³⁵ Diwall eta na vez tevalijen ar sclerijen a zo enoud.

³⁶ Mar d’eo eta da gorf holl sclerijennet, ha mar n’euz loden e‐bed anezhan en devalijen, neuze e vezo sclerijennet holl, evel pa deu eur c’houlaouen da sclerijenna ac’hanoud gant he sclerijen.

³⁷ E oa c’hoas o komz, pa deuaz eur Farizian d’hen pedi da vond d’he lein ganthan; ha Jesus a antreaz hag en em lekeaz ouz taol.

³⁸ Hogen ar Farizian a oa souezet o velet n’hen doa ket en em walc’het araog he lein.

³⁹ Hag an Aotrou a lavaraz dezhan: C’houi etrezoc’h Farizianed, a neta an diaveaz euz an tass hag euz ar plad; mes en diabarz ac’hanoc’h ez oc’h leun a laeronsiou hag a fallagriez.

⁴⁰ Tud diskiant ma’z oc’h! daoust hag an hini hen deuz great an diaveaz n’hen deuz ket great ive an diabarz?

⁴¹ Mes kentoc’h, roit en aluzen ar pez hoc’h euz, ha pep tra a vezo net evidoc’h.

⁴² Mes malheur deoc’h, Farizianed, pere a bae an deog var ar manth, var ar ru, ha var bep seurt louzou, hag e lezit a‐gostez ar justis hag ar garantez a Zoue. An traou‐man a oa dleet da bratica, heb lezel ar re all.

⁴³ Malheur deoc’h, Farizianed, pere a gar kemer ar plasou kenta er sinagogou, ha beza saludet er plasennou public.

⁴⁴ Malheur deoc’h, Scribed ha Farizianed hipocrit, rag henvel oc’h ouz beziou kuzet en douar, var bere e vale an dud heb gouzoud emaint eno.

⁴⁵ Neuze unan euz an doctored euz al lezen a gommansaz da gomz hag a lavaraz dezhan: Mestr, en eur gomz evel‐se, ec’h outrajez ive ac’hanomp‐ni.

⁴⁶ Ha Jesus a lavaraz: Malheur ive deoc’h‐hu doctored euz al lezen, rag c’houi a zam an dud gant beac’hiou re bounner evithe, hag hoc’h‐unan ne stokfac’h ket enhe gant ho piz.

⁴⁷ Malheur deoc’h, rag sevel a rit beziou d’ar brofeted a zo bet lakeat d’ar maro gant ho tadou.

⁴⁸ Beza ez oc’h eta testou ha lodennec euz ar pez ho deuz great ho tadou; rag lakeat ho deuz ar brofeted d’ar maro, ha c’houi a zav ho beziou.

⁴⁹ Rag‐se ive ar furnez a Zoue hen deuz lavaret: Kas a rin dezhe profeted ha kannaded; lakaad a raint lod anezhe d’ar maro ha persecuti a raint lod all:

⁵⁰ evit ma vezo goulennet digant ar generation‐man goad an holl brofeted hag a zo bet skulliet abaoe commansamant ar bed,

⁵¹ adaleg goad Abel bete goad Zakarias, pehini a oe lazet etre an aoter hag an templ; ia, hen lavaret a ran deoc’h, ar goad‐se a vezo goulennet digant ar generation‐man.

⁵² Malheur deoc’h, doctored euz al lezen, rag, o veza kemeret an alc’houez euz an anaoudegez, n’ed oc’h ket antreet hoc’h‐unan, hag ar re ho doa c’hoant da antren oc’h euz harzet anezhe.

⁵³ Ha pa oa o lavaret kement‐se dezhe, ar Scribed hag ar Farizianed a gommansaz hen gwaska stard, evit ober dezhan komz var meur a dra, o stigna pechou dezhan,

⁵⁴ hag o klask tenna eun dra‐benag euz he c’henou evit galloud accusi anezhan.