Koloseiz 4 - Testamant Nevez 1897 (Jenkins)

CHABISTR IV.

¹ Mistri, rentit d’ho servicherien ar peza c’houlen al lealded hag an honestis diganeoc’h, o c’houzout penaos, c’houi ive hoc’h euz eur Mestr en envou.

² Kendalc’hit da bedi, ha bezit aketus d’hen ober gant actionou a c’hras;

³ pedit er memeus amzer evidomp‐ni, evit ma tigoro Doue deomp eun nor evit ar gomz, evit annons myster ar C’hrist, abalamour da behini emoun ive er chadennou;

⁴ hag evit ma hen roin da anaoud, evel ma tlean komz divar he ben.

⁵ En em gomportit gant furnez e kenver ar re a zo a‐ziaveaz, o prena an amzer.

⁶ Ra vezo ho komz leun a c’hras, ha saouret‐mad gant holen, evit ma c’hellot respont da bep hini evel ma’z eo dleet.

⁷ Tychikus, ar breur muia‐karet, ar ministr fidel, ha va c’hen‐zervicher en Aotrou, a roio da anaoud deoc’h kement a zell ouzin.

⁸ Kasset em euz anezhan deoc’h evit kement‐man, evit ma c’hanavezo e pe stad emaoc’h, ha ma consolo ho calonou,

⁹ gant Onesimus, eur breur karet ha fidel, pehini a zo euz ho pro; int a roio da anaoud deoc’h kement tra a c’hoarvez dre aman.

¹⁰ Aristark, va c’hen‐brizonier, a zalud ac’hanoc’h, ha Marc ive, kinderv da Varnabas, divarben pehini hoc’h euz recevet urzou; (mar d’a d’ho kavoud, digemerit anezhan).

¹¹ Jesus, les‐hanvet Justus, a zalud ac’hanoc’h ive. Ar re‐man a zo euz ar circoncision, hag e‐touez va c’hen‐labourerien evit rouantelez Doue, ar re‐man hep‐ken a zo bet eur gonsolation evidoun.

¹² Epaphras, pehini a zo euz ho touez, ha servicher d’ar C’hrist, a zalud ac’hanoc’h; ne ehan ket da gombatti evidoc’h en he bedennou, evit ma viot parfet ha peur‐c’hreat en holl bolontez Doue.

¹³ Rag me a ro testeni dezhan, penaos hen deuz eur zel vraz evidoc’h hag evit ar re a zo en Laodicea, hag ar re a zo en Hierapolis.

¹⁴ Lucas, ar medeusin muia‐karet, a zalud ac’hanoc’h, ha Damas a ra ive.

¹⁵ Saludit ar breudeur euz a Laodicea ha Nymphas, hag an Iliz a zo en he di.

¹⁶ Ha pa vezo bet lennet al lizer‐man en ho touez, grit ma vezo lennet ive en Iliz al Laodiceed, ha lennit, c’houi ive, an hini d’al Laodiceed.

¹⁷ Ha livirit da Archippus: Laka evezmad ouz ar garg ec’h euz recevet digant an Aotrou, evit gallout he ober ervad.

¹⁸ Me, Paol, a zalud ac’hanoc’h gant va dorn va‐unan. Ho pezet sonj euz va liammou. Ar c’hras ra vezo ganeoc’h! Amen.