Koloseiz 3 - Testamant Nevez 1897 (Jenkins)

CHABISTR III.

¹ Mar d’och eta resussitet assambles gant ar C’hrist, klaskit an traou a zo d’an neac’h, en pe leac’h ema ar C’hrist azezet a‐zeo da Zoue.

² Likit ho karantez en traou a zo d’an neac’h, ha nann en traou an douar;

³ rag maro oc’h, hag ho puez a zo kuzet gant ar C’hrist en Doue;

⁴ mes pa zeuio ar C’hrist, pehini eo ho puez, d’en em diskouez, neuze c’houi ive a vezo diskouezet assambles ganthan er gloar.

⁵ Lakit eta da vervel en hoc’h izili kement a zo euz an douar, al lubricite, an impurete, ar gwall‐ioulou, an deziriou fall, hag an avaristed, pehini a zo eun idolatriach;

⁶ rag evit an traou‐ze eo e teu coler Doue var vugale an dizentidigez;

⁷ en traou‐ze hoc’h euz ive baleet gwech‐all, pa oac’h o veva enhe.

⁸ Mes breman c’houi ive dilezit anezhe holl: ar goler, ar gassoni, an drougviez, ar gwall‐deodadou, ar c’homzou udur; diwallit na zeufe hini euz ho kenou.

⁹ Na livirit ket a c’hevier an eil d’egile; p’az oc’h en em divisket euz an den koz, hag euz he oberou,

¹⁰ ha pa’z oc’h en em visket euz an den nevez, pehini a zo adnevezet, ebarz an anaoudegez, hervez imach an hini hen deuz he grouet.

¹¹ Aman n’euz na Grek na Judeo, na circonciset na dicirconcis, na Barbar, na Scythiad, nag esclav na den libr; mes ar C’hrist a zo holl en holl.

¹² En em viskit eta, evel tud choazet gant Doue, santel ha muia‐karet, a entraillou a drugarez, a vadelez, a humilite, a zousder, a batianted;

¹³ oc’h en em supporti an eil egile, hag o pardoni an eil d’egile, mar hen deuz unan‐benag eur c’hlem a‐enep unan all. Evel ma hen deuz pardonet ar C’hrist ac’hanoc’h, c’houi, grit ive evel‐se.

¹⁴ Mes dreistholl en em viskit euz ar garantez, pehini eo an ere euz ar berfection.

¹⁵ Ha ra zeui peoc’h ar C’hrist, da behini ez oc’h bet galvet en eur c’horf hep‐ken, da rên en ho calonou; ha bezit leun a anaoudegez‐vad.

¹⁶ Ra zeui Ger ar C’hrist da choum enoc’h gant he holl leunder, m’ho kargo a bep furnez. En em deskit, hag en em exhortit an eil egile, dre salmou, canaouennou ha canticou spirituel, o cana en ho calonou d’an Aotrou gant anaoudegez‐vad.

¹⁷ Ha kement tra a reot, dre gomzou pe dre oberou, grit pep tra en hano an Aotrou Jesus, o trugarekaad Doue an Tad dreizhan.

¹⁸ Gragez, plegit d’ho priejou, evel ma’z eo deread hervez an Aotrou.

¹⁹ Goazed, karit ho kragez, ha na gemerit ket kaz outhe.

²⁰ Bugale, sentit ouz ho tadou hag ho mamou en pep tra; rag kement‐se a zo agreabl d’an Aotrou.

²¹ Tadou, na hegazit ket ho pugale, gant aoun ne zeufent da goll courach.

²² Servicherien, sentit en pep tra ouz ho mistri hervez ar c’hig, o servicha anezhe, nann hep‐ken dirag ho daou‐lagad, evel o klask plijoud d’an dud; mes gant eur galon eün en doujans Doue.

²³ Ha kement tra a reot, grit‐hen a galonvad, evel evit an Aotrou, ha nann evit an dud;

²⁴ o c’houzout penaos e recevfot digant an Aotrou ar recompans euz an heritach, rag c’houi a zervich Christ, an Aotrou.

²⁵ Mes an hini a ra ar pez a zo injust, a recevo hervez he injustis; ha na vez diskouezet preferans e‐bed evit den.