Koloseiz 2 - Testamant Nevez 1897 (Jenkins)

CHABISTR II.

¹ Rag me a fell d’in e teufec’h da c’houzout pegen braz eo ar gombat em euz da zouten evidoc’h, hag evit ar breudeur a Laodicea, hag evit ar re holl n’ho deuz james va gwelet va‐unan.

² Evit ma vezo consolet ho c’halonou, hag unanet assambles er garantez, evit beza pinvidikeet euz a eun ententamant vad, evit anaoud myster Doue an Tad, hag ar C’hrist,

³ en pehini ema dastumet an holl denzoriou euz ar furnez hag euz ar skiant.

⁴ Kement‐man a lavaran, evit na deui den d’ho trompla gant komzou kaer.

⁵ Rag, mar d’oun pell diouzoc’h a gorf, emoun prezant en ho touez a spered, leun a joa, o velet an urz vad en ho touez, hag ho feiz stard er C’hrist.

⁶ Evel eta ma hoc’h euz recevet Jesus‐Christ an Aotrou, baleit assambles ganthan,

⁷ o veza griziennet ha fontet enhan, ha krenveet er feiz, evel ma oc’h bet desket, o creski enhi, gant actionou a c’hras.

⁸ Likit evez na zeufe den da c’hounid ac’hanoc’h dre philosophi ha touellerez goullo, hervez giz an dud, hervez kenta kenteliou ar bed, ha nann hervez ar C’hrist.

⁹ Rag enhan ema an holl leunder euz an divinite o choum en eur c’horf.

¹⁰ Ha c’houi hoc’h euz pep leunder enhan, pehini eo ar pen euz a bep princelez hag a bep galloud.

¹¹ Enhan ive oc’h bet circonciset, gant eur circoncision great hep dorn e‐bed, en eur delivra ar c’horf euz a bec’hejou ar c’hig, rag honnes eo circoncision ar C’hrist;

¹² o veza bet sebeliet assambles ganthan er vadiziant; enhan ive ez oc’h resussitet, drear feiz en galloud Doue, pehini hen deuz resussitet anezhan a‐douez ar re varo.

¹³ Ha pa oac’h maro en ho pec’hejou hag en ho kig dicirconcis, hen deuz ho tigasset d’ar vuez assambles ganthan, o veza pardonet deoc’h hoc’h holl bec’hejou.

¹⁴ Effacet hen deuz ar pez a oa en hon enep, an obligation euz an ordrenansou pehini en em zave a‐enep deomp; hag hen deuz he rentet nul, o staga anezhi ouz ar groaz;

¹⁵ o veza divisket ar princelezou hag ar puissansou, lakeat hen deuz anezhe da spectacl dirag an holl, o veza ho zrec’het var ar groaz‐ze.

¹⁶ Diwallo den d’ho condaoni divarben an debri pe an eva, pe divarben eun devez gouel, pe eul loar nevez pe deiziou ar sabbat;

¹⁷ an traou‐ze a oa ar skeuden euz an traou da zond, mes ar c’horf anezhe a zo er C’hrist.

¹⁸ Diwallo den da lemmel diganeoc’h ho recompans dre eur zeblant a humilite, ha dre adoration an elez, o sourcial ouz traou ha n’hen deuz ket ho gwelet, o veza c’houezet a ourgouil gant skiant ar c’hig,

¹⁹ hag heb en em derc’hel stag ouz ar pen, euz a behini e teu ar c’horf, unanet gant ar mellou hag al liammou, da greski euz eur greskadurez hervez Doue.

²⁰ Mar d’oc’h eta maro assambles gant ar C’hrist, evit ar pez a zell an diskadurez dister euz ar bed‐man, perag e karger ac’hanoc’h euz an ordrenansou‐ze, evel pa vijec’h c’hoas o veva er bed?

²¹ En eur lavaret deoc’h: Na zebr ket, na danva ket, na douch ket;

²² (gourc’hemenou hag a dro holl da fall dre an usach direiz) hervez maximou ha kelenadurezou an dud,

²³ traou pere ho deuz evit‐gwir eur zeblant a furnez, o veza eur servich a volontez‐vad, great gant eun neubeud‐benag a humilite, hag o castia ar c’horf, heb sourci e‐bed euz ar pez a ra plijadur d’ar c’hig.