Sant Ian 7 - Testamant Nevez 1897 (Jenkins)

CHABISTR VII.

¹ Goude an traou‐ze, Jesus a valee dre ar Galile, rag ne felle ket dezhan choum er Jude, abalamour ma klaske ar Judevien hen lakaad d’ar maro.

² Hogen, gouel ar Judevien, hanvet gouel an Tabernacleu a dostae.

³ Hag he vreudeur a lavaraz dezhan: Kea kuit ac’halen, ha kea er Jude, evit ma velo ive da ziskibien an oberou a rez.

⁴ Rag den na ra netra en kuz, pa vez o klask beza anavezet. Mar grez an traou‐ze, en em ziskouez da‐unan d’ar bed.

⁵ Rag he vreudeur ho‐unan na gredent ket enhan.

⁶ Jesus a lavaraz dezhe: Va amzer n’eo ket deuet c’hoas; mes hoc’h amzer c’houi a vez da bep koulz.

⁷ Ar bed na hell ket ho kasaad; mes kasaad a ra ac’hanoun‐me, abalamour ma roan testeni divar he ben penaos eo fall he oberou.

⁸ It c’houi d’ar gouel‐ze; evidoun‐me, n’ed an ket c’hoas, rag n’eo ket erru c’hoas va amzer.

⁹ Hag o veza lavaret kement‐se dezhe, e choumaz er Galile.

¹⁰ Mes, pa oe eat he vreudeur kuit, ez eaz ive d’ar gouel; n’ez eaz ket publicamant, mes evel en kuz.

¹¹ Ar Judevien eta a glaske anezhan e‐pad ar gouel, hag a lavare: E pe leac’h ema?

¹² Ha kalz a drouz a oa divar he ben e‐touez ar bobl. Darn a lavare: Eun den mad eo; ha darn all a lavare: N’eo ket, mes trompla a ra ar bobl.

¹³ Koulskoude, den e‐bed na gomze freaz divar he ben, gant aoun rag ar Judevien.

¹⁴ Var‐dro hanter ar gouel, Jesus a bignaz d’an templ, hag en em lakaz da gelen.

¹⁵ Hag ar Judevien a oa souezet braz, hag a lavare: Penaos ec’h hell an den‐ze anavezoud ar Scrituriou, pa n’hen deuz biskoas ho disket?

¹⁶ Jesus a respontaz dezhe: Va c’helenadurez na zeu ket ac’hanoun‐me, mes euz an hini hen deuz va digasset.

¹⁷ Mar fell da unan‐benag ober bolontez Doue, ec’h anavezo pe euz a Zoue eo va c’helenadurez, pe ac’hanoun va‐unan eo e komzan.

¹⁸ An hini a gomz anezhan he‐unan a glask he c’hloar he‐unan; mes an hini a glask gloar an hini hen deuz kasset anezhan, a zo dign da veza credet, ha n’euz ket a injustis enhan.

¹⁹ Moises ha n’euz‐hen ket roet deoc’h al lezen? ha koulskoude hini ac’hanoc’h na vir al lezen. Perag e klaskit‐hu va lakaad d’ar maro?

²⁰ Ar bobl a respontaz dezhan: Eun drouk‐spered a zo enoud; piou a glask lakaad ac’hanoud d’ar maro?

²¹ Jesus a respontaz hag a lavaraz dezhe: Eun dra em euz great, hag ho laka holl souezet.

²² Moises hen deuz gourc’hemenet deoc’h ar circoncision (n’eo ket ma teufe euz a Voises, mes euz an tadou), hag e circoncisit eun den deiz ar sabbat.

²³ Mar bez circonciset eun den deiz ar sabbat, evit miret lezen Moises, perag oc’h euz‐hu droug ouzin‐me, abalamour ma’m euz roet ar iec’hed da eun den deiz ar sabbat?

²⁴ Na varnit ket hervez an apparans, mes barnit hervez ar justis.

²⁵ Hag unan‐benag a dud Jerusalem a lavare: N’e ket he‐man eo an hini a oar o klask anezhan da lakaad d’ar maro?

²⁶ Ha setu hen o komz dirag an holl, ha ne leverer netra dezhan. Daoust hag ar chefou ho defe anavezet ez eo en gwirionez ar C’hrist?

²⁷ Mes ni a oar a be leac’h e teu he‐man; e leac’h pa zeuio ar C’hrist, ne ouezo den euz a be leac’h eo.

²⁸ Jesus eta a grie en templ, en eur gelen, hag en eur lavaret: Anaoud a rit ac’hanoun, hag ec’h ouzoc’h a be leac’h ez oun. N’ed oun ket deuet ac’hanoun va‐unan, mes an hini hen deuz va digasset a zo gwirion, ha c’houi na anavezit ket anezhan.

²⁹ Hogen, me hen anavez; rag euz he berz eo e teuan, hag hen eo hen deuz va digasset.

³⁰ Klask a rent eta an tu da gregi enhan; mes den na lekeaz he zorn varnezhan, rag ne oa ket c’hoas deuet he heur.

³¹ Koulskoude kalz a‐douez ar bobl a gredaz enhan, hag a lavare: Pa zeui ar C’hrist, daoust hag hen a rai muioc’h a viraclou eged na ra he‐man?

³² Ar Farizianed, o veza klevet ar pez a lavare ar bobl e‐kuz divar he ben, en em glevaz gant prinsed ar veleien, evit kas serjanted da gregi enhan.

³³ Setu perag Jesus a lavaraz dezhe: Evit eun neubeud amzer emoun c’hoas ganeoc’h; hag ez an goude da gavoud an hini hen deuz va digasset.

³⁴ Va c’hlask a reot, ha n’em c’havot ket, hag el leac’h ma emoun, c’houi na hellit ket dont.

³⁵ Ar Judevien eta a lavaraz etrezhe: Da be leac’h ez ai ma n’her c’havimp ket? Ha mond a rai etrezeg ar re a zo disperset e‐touez ar Greked, evit kelen ar Greked?

³⁶ Petra a zinifi ar gomz‐man, hen deuz lavaret: Va c’hlask a reot, ha n’am c’havot ket, hag el leac’h ma emoun, c’houi na hellit ket dont?

³⁷ D’an deiz diveza, devez braz ar gouel, Jesus a oa eno, hag a lavare, en eur grial: Mar deuz unan‐benag hag hen deuz sec’hed, ra zeui d’am c’havoud, ha ra evo.

³⁸ An hini a gred enoun, e tiredo euz anezhan steriou a zour beo, hervez ma lavar ar Scritur.

³⁹ (Hogen, lavaret a reaz kement‐se divarben ar Spered a dlie ar re a gredje enhan da receo; rag ne oa ket bet roet c’hoas ar Spered‐Santel, abalamour na oa ket bet c’hoas glorifiet Jesus.)

⁴⁰ Kalz euz ar bobl, o veza klevet ar c’homzou‐ze, a lavare: He‐man eo en gwirionez ar profet.

⁴¹ Darn all a lavare: He‐man eo ar C’hrist. Mes darn all a lavare: Daoust ha deuz ar C’halile e tle dond ar C’hrist?

⁴² Ha na lavar ket ar Scritur e teu ar C’hrist euz a lignez David, hag euz a gear Bethlehem, a be leac’h e oa David?

⁴³ Bez’ e oa eta division e‐touez ar bobl divar he ben.

⁴⁴ Ha darn anezhe a felle dezhe cregi enhan; koulskoude den e‐bed na lakeaz he zorn varnezhan.

⁴⁵ Ar serjanted eta a zistroaz etrezeg prinsed ar veleien hag ar Farizianed, hag ar re‐man a lavaraz dezhe: Perag n’hoc’h euz‐hu ket digasset anezhan?

⁴⁶ Ar serjanted a respontaz: Biskoas den n’hen deuz komzet evel an den‐ze!

⁴⁷ Ar Farizianed a lavaraz dezhe: Daoust ha c’houi a zo bet ive gounezet?

⁴⁸ Ha bez’ a zo unan‐benag euz ar chefou pe euz ar Farizianed hag hen defe credet enhan?

⁴⁹ Mes ar bobl‐ze, pehini na anavez ket al lezen, a zo milliget.

⁵⁰ Nicodem (an hini a oa deuet en noz da gavout Jesus, hag a oa unan anezhe), a lavaraz dezhe:

⁵¹ Hon lezen, daoust hag hi a varn eun den heb beza hen klevet araog, hag heb gouzout petra hen deuz great?

⁵² Respont a rejont dezhan: Hag eur Galilead oud‐te ive? Klask, ha gwel ha profet e‐bed a zo bet biskoas savet euz a C’halile.

⁵³ Ha pep hini anezhe a ieaz d’ar gear.