Sant Ian 20 - Testamant Nevez 1897 (Jenkins)

CHABISTR XX.

¹ An deiz kenta euz ar sizun, Mari Madalen a zeuaz etrezeg ar bez beure mad, pa oa c’hoas teval; hag e velaz ar mean lammet kuit divar ar bez.

² Diredec a reaz eta da gavout Simon Per hag an diskibl all a oa karet gant Jesus; hag e lavaraz dezhe: Tennet ho deuz an Aotrou euz ar bez, hag hen douget kuit ha ne ouzomp ket e pe leac’h ho deuz lakeat anezhan.

³ Neuze Per a ieaz er meaz gant an diskibl all, hag ez ejont d’ar bez.

⁴ Hag e redent ho daou assambles; mes an diskibl all‐ze a redaz buhannoc’h eged Per, hag a erruaz da genta e kichen ar bez.

⁵ Hag o veza daou‐bleget evit sellet, e velaz al lienennou var an douar; mes n’ez eaz ket ebarz.

⁶ Mes Simon Per, pehini a zeue var he lerc’h, a erruaz, hag a ieaz er bez, hag a velaz al lienennou a oa var an douar,

⁷ hag al linsel a oa bet var he ben, pehini ne oa ket lakeat assambles gant al linselliou all; mes a oa pleget en eul leac’h a‐gostez.

⁸ An diskibl all, pehini a oa deuet da genta d’ar bez, a ieaz ive ebarz, hag e velaz, hag e credaz.

⁹ Rag n’ho doa ket c’hoas comprenet ar Scritur a lavar e ranke Jesus resussita a‐douez ar re varo.

¹⁰ Neuze an diskibien a zistroaz d’ar gear.

¹¹ Koulskoude Mari a choume er meaz, e‐tal ar bez, o wela; hag evel ma wele, e plegaz evit sellet er bez,

¹² hag e velaz daou eal gwisket en gwenn, azezet unan ouz ar pen, hag egile ouz an treid, el leac’h ma oa bet gourvezet corf Jesus.

¹³ Hag an elez a lavaraz dezhe: Greg, perag e welez‐te? Hi a lavaraz dezhe: Abalamour ma ho deuz douget kuit va Aotrou, ha na ouzon ket pe leac’h ho deuz lakeet anezhan.

¹⁴ Ha goude beza lavaret kement‐se, e tistroaz hag e velaz Jesus en he za; mes na ouie ket e oa Jesus hennes.

¹⁵ Jesus a lavaraz dezhi: Greg, perag e welez‐te? Piou a glaskez? Hi, o credi e oa hennes ar jardiner, a lavaraz dezhan: Aotrou, mar d’eo te ec’h euz hen douget kuit, lavar d’in pe leac’h ec’h euz hen lakeat, hag e kemerin anezhan.

¹⁶ Jesus a lavaraz dezhi: Mari! Hag hi, o veza distroet, a lavaraz dezhan: Rabbouni! da lavaret eo, va Mestr!

¹⁷ Jesus a lavaraz dezhi: Na douch ket ouzin, rag n’oun ket c’hoas pignet etrezeg va Zad; mes kea da gavoud va breudeur, ha lavar dezhe e pignan etrezeg va Zad hag ho Tad, va Doue hag ho Toue.

¹⁸ Ha Mari Madalen a zeuaz da annonsi d’an diskibien penaos he doa gwelet an Aotrou, hag hen doa lavaret an traou‐ze dezhi.

¹⁹ Var ar pardaez euz an deiz‐ze, a oa ar c’henta euz ar sizun, an norojou euz al leac’h ma oa assamblet enhan an diskibien, o veza serret, gant aoun rag ar Judevien, Jesus a zeuaz, hag en em brezantaz en ho c’hreiz, hag a lavaraz dezhe: Ar peoc’h ra vezo ganeoc’h!

²⁰ Ha goude beza lavaret an dra‐ze dezhe, e tiskouezaz dezhe he zaouarn hag he gostez. An diskibien eta, o velet an Aotrou, ho doe eur joa vraz.

²¹ Ha Jesus a lavaraz adare dezhe: Ar peoc’h ra vezo ganeoc’h! Evel ma hen deuz an Tad digasset ac’hanoun, evel‐se ive me a gas ac’hanoc’h.

²² Ha pa hen doe lavaret kement‐se, e c’hwezaz varnezhe hag e lavaraz dezhe: Recevit ar Spered‐Santel.

²³ Da biou‐benag e pardonot ar pec’hejou, e vezint pardonet dezhe; hag ar re da bere ho dalc’hot, e vezint dalc’het dezhe.

²⁴ Hogen, Thomas, unan euz an daouzec, galvet Didimus, ne oa ket ganthe pa zeuaz Jesus.

²⁵ An diskibien all eta a lavaraz dezhan: Ni hon euz gwelet an Aotrou. Mes hen a lavaraz dezhe: Ma na velan en he zaouarn merk an tachou, ha ma na lakaan va biz en merk an tachou, ha ma na lakaan va dorn en he gostez, me na gredin ket.

²⁶ Eiz deiz goude, he ziskibien a oa adare en ti, ha Thomas a oa ganthe. Jesus a zeuaz, an norojou o veza serret, hag en em zalc’haz en ho c’hreiz hag a lavaraz: Ar peoc’h ra vezo ganeoc’h!

²⁷ Neuze e lavaraz da Thomas: Laka da viz aman, ha sell ouz va daouarn; astenn ive da zorn, ha laka‐hen em c’hostez, ha na vez ket eun den difeiz, mes eun den hag a gred.

²⁸ Thomas a respontaz hag a lavaraz dezhan: Va Aotrou ha va Doue!

²⁹ Jesus a lavaraz dezhan: Abalamour ma ec’h euz va gwelet, Thomas, ec’h euz credet. Eürus ar re n’ho deuz ket gwelet, hag ho deuz credet!

³⁰ Jesus a reaz c’hoas dirag he ziskibien kalz a viraclou all, pere n’int ket scrivet el levr‐man.

³¹ Mes an traou‐man a zo scrivet, evit ma credot penaos Jesus eo ar C’hrist, Mab Doue, hag o credi ma ho pezo ar vuez en he hano.