Sant Ian 10 - Testamant Nevez 1897 (Jenkins)

CHABISTR X.

¹ E gwirionez, e gwirionez hen lavaran deoc’h: An hini na antre ket dre an nor e kraou an denved, mes a ia dre eul leac’h all, a zo eul laer hag eun torfetour.

² Mes an hini a antre dre an nor eo mesaer an denved.

³ Ar porzier a zigor dezhan, hag an denved a glev he vouez; gervel a ra he zenved he‐unan dre ho hano, hag e kas anezhe er meaz.

⁴ Ha pa hen deve digasset er meaz he zenved he‐unan, e vale araog dezhe, hag an denved a heul anezhan, rag anaoud a reont he vouez.

⁵ Mes na heullint ket eun estranjour; er c’hontrol, pellaad a raint diouthan, rag ne anavezont ket mouez an estranjourien.

⁶ Jesus a lavaraz dezhe ar barabolen‐ze; mes na gomprenjont ket euz a betra e komze dezhe.

⁷ Jesus eta a lavaraz dezhe c’hoas: E gwirionez, e gwirionez hen lavaran deoc’h:

⁸ Me eo dor an denved. Ar re holl a zo bet deuet araog d’in, a zo laeron ha torfetourien, mes an denved n’ho deuz ket ho zelaouet.

⁹ Me eo an nor; mar deu unan‐benag da antren dreizoun‐me, e vezo salvet; antren a rai, ha mond a rai er meaz, hag e kavo peuri.

¹⁰ Al laer na zeu nemed da laerez, da laza ha da zistruja; me a zo deuet, evit ma kavo va denved ar vuez, ha ma vezint e‐kreiz an abondans.

¹¹ Me eo ar mesaer mad; ar mesaer mad a ro he vuez evit he zenved.

¹² Mes ar mevel, pehini n’ed eo ket ar mesaer, ha n’eo ket an denved dezhan, a vel ar bleiz o tond, a lez eno an denved hag a dec’h kuit; hag ar bleiz a gas ganthan an denved, hag ho disparti holl.

¹³ Ar mevel a dec’h kuit, abalamour ma’z eo mevel, ha ma n’hen deuz ket a zourci euz an denved.

¹⁴ Me eo ar mesaer mad; anaoud a ran va denved, hag anavezet oun ganthe,

¹⁵ evel ma c’hanavez va Zad ac’hanoun, hag evel ma c’hanavezan va Zad; hag e roan va buez evit va denved.

¹⁶ Bez’ em euz denved all ha n’emaint ket er vanden‐man; red eo d’in ho c’herc’hat ive; hag e selaouint va mouez, ha ne vezo nemed eur vanden hag eur mesaer hep‐ken.

¹⁷ Setu perag e kar va Zad ac’hanoun; abalamour ma roan va buez, evit he c’hemeret a‐nevez.

¹⁸ Den na lam anezhi diganen, mes me a ro anezhi ac’hanoun va‐unan; ar galloud em euz d’he c’huitaad, hag ar galloud d’he c’hemeret a‐nevez; an urz‐man em euz bet digant va Zad.

¹⁹ Neuze e savaz a‐nevez eun disput e‐touez ar Judevien, abalamour d’ar c’homzou‐ze.

²⁰ Ha kalz anezhe a lavare: Eun diaoul a zo ganthan, ha n’ema ket en he skiant vad; perag e selaouit‐hu anezhan?

²¹ Darn all a lavare: Ar re‐ze n’int ket komzou eun den possedet gant eun diaoul. Daoust hag eun diaoul a hell digeri daou‐lagad ar re dall?

²² Hogen, en amzer‐ze e oat o celebri e Jerusalem gouel an Dedi, hag ar goanv a oa o ren.

²³ Evel ma oa Jesus o vale en templ, e porched Salomon,

²⁴ ar Judevien en em zastumaz en dro dezhan, hag a lavaraz dezhan: Pegeit e talc’hi‐te hor spered en douetans? Mar d’oud ar C’hrist hen lavar freaz deomp.

²⁵ Jesus a respontaz dezhe: Hen lavaret em euz deoc’h, ha na gredit ket; an oberou a ran en hano va Zad a rent testeni ac’hanoun.

²⁶ Mes c’houi na gredit ket, rag n’oc’h ket euz va denved, evel ma em euz lavaret deoc’h.

²⁷ Va denved a glev va mouez, ha me a anavez anezhe, hag int a heul ac’hanoun.

²⁸ Rei a ran dezhe ar vuez eternel, ha biken ne vezint kollet, ha den n’ho dilammo euz va dorn.

²⁹ Va Zad, pehini hen deuz ho roet d’in, a zo brassoc’h eged an holl; ha den na hell ho dilemmel euz dorn va Zad.

³⁰ Me hag an Tad a zo unan.

³¹ Neuze ar Judevien a gemeraz adare mein evit meina anezhan.

³² Ha Jesus a lavaraz dezhe: Meur a ober mad em euz great dirazoc’h a‐beurz va Zad; evit pehini anezhe e veinit‐hu ac’hanoun?

³³ Ar Judevien a respontaz dezhan: N’e ket evit eun ober mad eo e veinomp ac’hanoud, mes evit eur blasphem, hag abalamour, o veza eun den, en em rez Doue.

³⁴ Jesus a respontaz dezhe: Ha n’eo ket scrivet en ho lezen: Lavaret em euz: C’houi a zo doueou?

³⁵ Mar he deuz galvet doueou ar re da bere e teue ger Doue (hag ar Scritur na hell ket beza dianzavet),

³⁶ ha lavaret a rit‐hu e vlaspheman, ha me bet santifiet gant va Zad ha digasset er bed, abalamour ma em euz lavaret: Me eo Mab Doue?

³⁷ Ma na ran ket oberou va Zad, na gredit ket ac’hanoun.

³⁸ Mes mar gran anezhe, ha pa na gredfec’h ket ac’hanoun, credit d’am oberou, evit ma c’hanavezot ha ma credot ema an Tad enoun ha me enhan.

³⁹ Klask a rent eta c’hoas cregi enhan; mes mond a reaz euz tre ho daouarn.

⁴⁰ Hag ez eaz a‐nevez en tu all d’ar Jourdan, el leac’h ma oa Ian o vadezi da genta; hag e choumaz eno.

⁴¹ Ha kalz a zeuaz d’he gavoud, hag e lavarent: Ian, evit gwir, n’hen deuz great miracl e‐bed; mes kement hen deuz lavaret Ian divarben he‐man a zo gwir.

⁴² Ha kalz a gredaz enhan eno.