Hebreed 8 - Testamant Nevez 1897 (Jenkins)

CHABISTR VIII.

¹ Hogen, ar pen‐kenta euz ar pez hon euz lavaret, eo ma hon euz eun hevelep Beleg‐braz, pehini a zo azezet a‐zeo d’an tron euz ar Vajeste en envou,

² hag a zo Ministr ar sanctuer hag ar gwir dabernacl, pehini a zo bet savet gant an Aotrou, ha nann gant an den.

³ Rag peb beleg‐braz a zo lakeat evit offr donezonou ha sacrifisou; dre‐ze ez eo red da he‐man ive kaoud eun dra‐benag da offr.

⁴ Rag ma vije‐hen var an douar, na vije ket memeus beleg, o veza ma’z euz beleien pere a offr donezonou hervez al lezen, pere a rent eur c’hult,

⁵ imach ha skeuden euz an traou celestiel, hervez an urz divin a oe roet da Voises, pa dlie sevel an tabernacl: Bez leun a evez, emezhan, da ober pep tra hervez ar model a zo bet diskouezet d’id var ar menez.

⁶ Mes breman ar C’hrist hen deuz recevet eur garg excellantoc’h, o veza ma’z eo ar Mediator euz a eun allians gwelloc’h, pehini a zo fontet var bromessaou gwelloc’h.

⁷ Rag, ma vije bet an allians kenta hep si, na vije ket bet red lakaad unan all.

⁸ Rag oc’h ober rebechou dezhe, Doue a lavar d’ar Judevien: Setu, dond a rai an deiziou, eme an Aotrou, ma peur‐c’hrin eun allians nevez gant ti Israel, ha gant ti Juda;

⁹ n’e ket eun allians evel an hini a riz gant ho zadou, en deiz ma crogiz en ho dorn, evit ho zenna euz a zouar an Egypt; rag n’ho deuz ket kendalc’het em allians, hag em euz ho dilezet, eme an Aotrou.

¹⁰ Hogen, setu aman an allians a rin gant ti Israel, goude an deiziou‐ze, eme an Aotrou, lakaad a rin va lezennou en ho sperejou hag ho scriva a rin var ho c’halonou. Me a vezo ho Doue, hag int a vezo va fobl;

¹¹ hag hini anezhe ne roi mui kelennadurez na d’he nessa na d’he vreur, en eur lavaret: Anavez an Aotrou; rag holl ec’h anavezint ac’hanoun, adaleg ar bihana en ho zouez beteg ar brassa;

¹² rag beza e vezin leun a druez e‐kenver ho injustisou, ha n’em bezo mui sonj euz ho fec’hejou, nag euz ho fallenteziou.

¹³ O komz divarben eun allians nevez, e teu da ziscleria ez eo koz an hini genta; hogen, ar pez a zo deuet da veza ancien hag a zo kosseet a zo dare da vond kuit.