Hebreed 12 - Testamant Nevez 1897 (Jenkins)

CHABISTR XII.

¹ Evel‐se eta, pa’z eo gwir ez euz en‐dro deomp eun niver ker braz a destou, o teuler kuit diouzomp pep beac’h hag ar pec’hed a zeu ken eazet d’ hon luya, kendalc’homp da redec ar redadec a zo digor dirazomp;

² o terc’hel da zellet ouz Jesus, ar mestr hag ar peur‐oberour euz ar feiz, pehini, oc’h ober fae var ar vêz, abalamour d’ar joa a oa kinniget dezhan, hen deuz gouzanvet ar groaz, hag ez eo azezet a‐zeo da dron Doue.

³ Rag‐se, considerit ervad an hini hen deuz gouzanvet eun hevelep enebiez a‐berz ar bec’herien, evit ne gwezot ket, o lezel hoc’h eneou da zemplaad.

⁴ C’houi n’hoc’h euz ket c’hoas stourmet beteg ar goad, o combatti a‐enep ar pec’hed.

⁵ Hag hoc’h euz ankounac’heet an exhortation a zo bet roet deoc’h, evel da vugale: Va mab, na zisprij ket punition an Aotrou, ha na goll ket a gourach, pa zeu da repren ac’hanoud;

⁶ rag an Aotrou a gastiz an hini a zo karet ganthan, hag a sko gant gwialennou var an hini a zo anavezet ganthan evit he vab.

⁷ Mar gouzanvit ar bunition, Doue en em ziskouez deoc’h, evel da vugale dezhan; rag piou eo ar mab ha na vez ket punisset gant he dad?

⁸ Mes mar bezit exant euz ar bunition a behini an holl ho deuz lod, neuze eta ez oc’h bastarded, he nann bugale legitim.

⁹ Ouz‐pen‐ze, hon tadou hervez ar c’hig ho deuz punisset ac’hanomp, ha koulskoude hon euz bet respet evithe: ha na vezimp‐ni ket kalz sentussoc’h ouz Tad ar sperejou, evit gallout kaoud ar vuez?

¹⁰ Rag hon tadou a bunisse ac’hanomp evit eun neubeud deiziou, evel ma kavent mad; mes Doue a gastiz ac’hanomp evit hor brassa mad, evit m’hor bezo lod en he zantelez.

¹¹ Gwir eo penaos pep punition a zeblant, er momant ma vez roet, beza eur sujet a dristidigez, ha nann eur sujet a joa; mes goude, e teu da rei, er peoc’h, eur frouez a justis evit ar re a vez bet evel‐se amprouvet.

¹² Krenvait eta ho taouarn dinerzet, hag ho taoulin pere a zo sempleet;

¹³ ha grit eun hent eün d’ho treid, evit n’ez ai ket ar pez a zo kam divar an arouden, mes kentoc’h ma vezo pareet.

¹⁴ Klaskit ar peoc’h gant an holl, hag ar zantelez, hep pehini na velo den an Aotrou;

¹⁵ o lakaad evez ne deufe den d’en em briva euz a c’hras Doue; ha ne deufe eur c’hrizien c’houero‐benag, o sevel, da veza kiriec a drubuil deoc’h, ha da lakaad meur a hini da veza saotret ganthi;

¹⁶ hag o tiwall na vez den avoultr, na profan e‐bed evel Esaü, pehini, evit eur pred‐boued hep‐ken, a verzaz he zroed a vab hena.

¹⁷ Rag anaoud a rit penaos goude‐ze, pa fellaz dezhan herita euz ar venediction, e oe reprouvet, rag ne hellaz ket distrei ar pez a oa bet great, petra‐benag ma her goulennaz gant daelou.

¹⁸ Hogen, c’houi n’oc’h ket bet tosteet ouz ar menez a helle beza touchet gant an dorn, hag a oa an tan en‐dro dezhan, nag ouz ar goabren deo, nag ouz an devalijen, nag ouz an tempest,

¹⁹ nag ouz an drompil skiltrus, nag ouz trouz ar c’homzou, eun drouz ker braz ma teuaz ar re her c’hleve, da bedi, evit ne vije mui adresset ar gomz dezhe.

²⁰ Rag ne oant ket evit supporti an urz‐man: Mar deu memeus eun aneval da douch ouz ar menez, e vezo lazet a daoliou mein, pe c’hoas e vezo treuzet gant eur flem.

²¹ Ha ken heuzus e oa ar pez en em ziskoueze, ma lavaraz Moises: Krena a ran, hag ez oun spountet‐holl.

²² Mes c’houi a zo tosteet ouz menez Sion, ouz kear an Doue beo, ar Jerusalem celestiel, ouz ar milierou a elez,

²³ ouz an assemble hag ouz Iliz ar re genta‐ganet, scrivet ho hano en env, ouz eur barner pehini a zo Doue an holl, ouz sperejou ar re just deuet da veza parfet,

²⁴ hag ouz Jesus, Mediator an allians nevez, hag ouz ar goad skulliet, pehini a lavar gwelloc’h traou eged hini Abel.

²⁵ Likit evez na rafec’h disprij var an hini a gomz ouzoc’h; rag mar n’ho deuz ket gallet ar re a rea disprij var an hini ho c’helenne var an douar a‐berz Doue, tec’hel kuit, diessoc’h c’hoas e vezo deomp‐ni tec’hel pa droomp kein d’an hini a gomz euz an env;

²⁶ ar vouez euz a behini neuze a lakaz an douar da grena, ha pehini breman hen deuz great ar bromessa‐man, en eur lavaret: Eur vech c’hoas e lakin da grena, nann an douar hep‐ken, mes ive an env.

²⁷ Hogen, ar c’homzou‐man: C’hoas eur vech, a verk ar fin euz an traou a hell beza chenchet, e kement ha ma’z int bet great, evit ma choumo ar re ne chenchont ket.

²⁸ Abalamour da ze, o cregi er rouantelez ha na hell ket beza chenchet, dalc’homp ar c’hras, evit ma c’hellimp dreizhi servicha Doue en eun doare hag a blijo dezhan gant respet ha gant doujans;

²⁹ rag hon Doue a zo ive eun tan hag a zev.