Hebreed 11 - Testamant Nevez 1897 (Jenkins)

CHABISTR XI.

¹ Hogen ar feiz a zo eur gortoz leun a fizians euz an traou a esperer, ar breuven sclear euz an traou na veler ket.

² Rag dreizhan ho deuz kavet hon tadou‐koz euz desteni vad.

³ Dre ar feiz eo ec’h ouzomp ez eo bet great ar bed gant ger Doue; en hevelep doare ma n’eo ket bet great an traou a veler, gant traou hag a heller da velet.

⁴ Dre ar feiz, Abel a offraz da Zoue eur sacrifis gwelloc’h eged hini Caïn; abalamour d’he feiz e oe kavet just, Doue o renta testeni d’he offransou; ha petra‐benag ma’z eo maro, dre ar feiz‐ze e komz c’hoas.

⁵ Dre ar feiz, Henoc a oe savet ouz an douar evit na velje ket ar maro, ha na oe mui kavet, abalamour m’hen doa Doue savet anezhan; rag araog ma oa bet savet, hen doa bet an desteni da veza bet plijet da Zoue.

⁶ Hogen, heb ar feiz na hell den plijoud da Zoue, rag red eo d’an hini a dosta ouz Doue, credi ez euz eun Doue, hag e teui Doue da recompansi ar re a glask anezhan.

⁷ Dre ar feiz, Noe, o veza bet berzet gant Doue euz an traou na hallent ket c’hoas beza gwelet, a oe karget a zoujans, hag a reaz eun arc’h, evit savetei he famill; dreizhi e condaonaz ar bed, hag e teuaz da veza heritour euz ar justis a zo hervez ar feiz.

⁸ Dre ar feiz, Abraham, pa oe galvet, a zentaz, evit mond d’ar vro a dlie da gaoud en heritach, hag a ieaz en hent, hep gouzoud da be leac’h ez ea.

⁹ Dre ar feiz, e choumaz en douar a oa bet prometet dezhan, evel en eun douar estranjour, o loja en tantennou, gant Isaac ha Jacob, kenheritourien euz ar memeus promessa.

¹⁰ Rag en gortoz e oa euz ar gear he deuz fondationou, ar gear euz a behini Doue he‐unan eo ar fondator hag ar mestr‐maçoner.

¹¹ Dre ar feiz ive, Sara a recevaz ar galloud da gaoud eur mab, hag hen ganaz, en despet d’he oad avanset, abalamour ma credaz e oa fidel an hini hen doa great ar bromessa.

¹² Evel‐se euz a eun den, hag a oa dija dinerzet gant an oad, ez euz ganet eun niver braz, ken alies a zen hag a stereden a zo en env, hag a c’hreunen treaz a zo var bord ar mor, pere na hell den ho c’hounta.

¹³ Ar re‐ze holl a zo bet marvet er feiz, hep beza recevet an traou prometet, mes goude beza ho gwelet a‐ziabell, ho deuz ho c’hredet, hag ho digemeret, goude beza anzavet penaos e oant estranjourien ha beajourien var an douar.

¹⁴ Rag ar re a gomz evel‐se, a ziskouez sclear e klaskont ho bro.

¹⁵ Rag, mar ho divije dalc’het sonj euz ar vro a behini e oant deuet, ho divije bet amzer da zistrei di;

¹⁶ mes breman e c’hoantaont eur vro gwelloc’h, da lavaret eo, eur vro celestiel; dre‐ze Doue n’hen deuz ket a vêz o veza galvet ho Doue; rag preparet hen deuz eur gear evithe.

¹⁷ Dre ar feiz, Abraham, o veza amprouvet, a offraz Isaac; an hini hen doa recevet ar promessaou, a offraz memeus he vab unic,

¹⁸ divarben pehini e oa bet lavaret: En Isaac eo e vezo galvet da lignez‐te;

¹⁹ o veza sonjet e oa Doue galloudec d’hen sevel zo‐ken a‐douez ar re varo: hag en gwirionez, hen receo a reaz a‐nevez, evel ma vije bet resussitet en eun doare‐benag.

²⁰ Dre ar feiz, Isaac a vennigaz Jacob hag Esaü en gwêl euz an traou da zond.

²¹ Dre ar feiz, Jacob, o vervel, a vennigaz pep hini euz a vibien Josef, hag ec’h adoraz, ouz en em harpa var ben he vaz.

²² Dre ar feiz, Josef, oc’h echui he vuez, a gomzaz divarben ar bobl a Israel, a dlie sortial euz an Egypt, hag a roaz urzou divarben he eskern.

²³ Dre ar feiz, Moises, o veza ganet, a oe kuzet e‐pad tri mis gant he dud, dre ma veljont e oa kaer ar bugel; ha n’ho doe ket a aoun rag gourc’hemen ar roue.

²⁴ Dre ar feiz, Moises, pa oe deuet da veza braz, a refusaz beza galvet mab da verc’h Pharaon;

²⁵ o karout kentoc’h beza gwall‐dretet assambles gant pobl Doue, eged jouissa evit eur pennadic euz a blijadurezou ar pec’hed;

²⁶ oc’h estimoud e oa dismegans ar C’hrist brassoc’h pinvidigez eged tenzoriou an Egypt, rag sellet a rea ouz ar recompans.

²⁷ Dre ar feiz eo, e lezaz an Egypt, hep kaoud aoun rag coler ar roue; rag en em zerc’hel a reaz ferm, evel pa velje an hini a zo invisibl.

²⁸ Dre ar feiz, e reaz ar Pask, hag e skulliaz ar goad, evit na deuje ket an eal a zistruje ar vugale kenta‐ganet da douch ouz re an Israelited.

²⁹ Dre ar feiz, a treuzjont ar Mor ruz evel dre eun hent seac’h; pa glaskaz an Egyptianed tremen ive, e oent beuzet er mor.

³⁰ Dre ar feiz, e kwezaz mogeriou Jerico, goude ma oe bet great an dro dezhe e‐pad seiz devez.

³¹ Dre ar feiz, na oe ket distrujet Rahab, ar gourtizanes, assambles gant ar re dizent, abalamour m’he doa digemeret ar spierien en peoc’h.

³² Ha petra a livirin‐me ouz‐pen? Rag an amzer a vankfe d’in, evit komz euz a Gedeon, euz a Varac, euz a Samson, euz a Jephte, euz a Zavid, euz a Samuel, hag euz ar brofeted;

³³ pere, dre ar feiz, ho deuz trec’het rouantelezou, ho deuz rentet ar justis, ho deuz bet ar madou prometet, ho deuz serret ho genou d’al leoned,

³⁴ ho deuz mouget nerz an tan, ho deuz tec’het diouz lem ar c’hleze, a zo bet pareet euz ho c’hlenvejou, a zo bet galloudec er brezel, ho deuz lakeat an armeou estranjour da dec’hel kuit.

³⁵ Gragez ho deuz adkavet ho zud varo dre ar resurrection; ha re all a zo bet merzeriet, pa ne felle ket dezhe beza delivret, evit gallout kaoud eur resurrection gwelloc’h;

³⁶ re all a zo bet amprouvet gant goaperezou ha skourjezou; ha memeus dre chadennou ha dre brizon:

³⁷ meinet int bet, eskennet int bet, amprouvet int bet, lazet int bet gant ar c’hleze, mond a reant aman hag a‐hont, gwisket gant krec’hen denved ha krec’hen gevri, en dienez a bep tra, persecutet, ha gwall‐dretet;

³⁸ (int euz a bere ar bed ne oa ket dign;) o vale en dezertchou hag er meneziou, er c’havernou hag en toullou an douar.

³⁹ Hag ar re‐ze holl, o veza bet eun desteni vad dre ho feiz, n’ho deuz ket gallet kaoud ar madou prometet;

⁴⁰ rag Doue hen deuz pourveet eun dra‐benag gwelloc’h evidomp‐ni, evit na vijent ket rentet parfet hepdomp‐ni.