Galated 6 - Testamant Nevez 1897 (Jenkins)

CHABISTR VI.

¹ Breudeur, mar tigouez da eun den beza kavet en eur faot‐benag, c’houi pere a zo spirituel, divankit anezhan gant eur spered a zousder. Diwall ouzid da‐unan, gant aoun na vez ive tentet.

² Dougit an eil beac’hiou egile, hag evel‐se likit en pratic lezen ar C’hrist.

³ Rag, mar d’euz unan‐benag hag a zonj dezhan ez eo eun dra‐benag, pa n’ed eo netra, en em drompla a ra he‐unan.

⁴ Mes ra zeui pep hini da amprouv he oberou he‐unan, ha neuze hen devezo leac’h d’en em veuli enhan he‐unan, ha nann ouz en em gompari gant ar re all;

⁵ rag pep hini a zougo he veac’h he‐unan.

⁶ Ra zeui an hini a vez kelennet er Ger, da rei lod euz he holl vadou d’an hini a gelen anezhan.

⁷ Diwallit d’en em drompla; ne vez ket great goab ouz Doue; rag an den a zastumo ar pez hen devezo hadet.

⁸ An hini a had evit he gig he‐unan, a vedo euz ar c’hig ar vreinadurez; mes an hini a had evit ar Spered, a vedo euz ar Spered ar vuez eternel.

⁹ Na skuizomp ket eta oc’h ober ar mad, rag en amzer ma’z eo dleet, e kavimp da vedi, mar ne deuomp ket da skuiza.

¹⁰ Rag‐se, e‐keit ha ma hon euz an occasion, greomp vad d’an holl, mes dreist‐holl d’ar re a zo euz a famill ar feiz.

¹¹ Gwelet a rit pebez lizer braz em euz scrivet deoc’h gant va dorn va‐unan.

¹² Kement holl hag a fell dezhe plijoud deoc’h, hervez ar c’hig, a laka ac’hanoc’h d’en em circoncisa, mes ne reont kement‐se, nemed evit gallout tec’hel ouz ar bersecution, abalamour da groaz ar C’hrist.

¹³ Rag ar re circonciset ho‐unan na viront ket al lezen; mes c’hoant ho deuz e vec’h circonciset, evit galloud en em c’hlorifia ho‐unan en ho kig.

¹⁴ Evidoun‐me, gras ma na c’hoarvezo biken ganen d’en em c’hlorifia, nemed e croaz hon Aotrou Jesus‐Christ, dre behini ez eo crucifiet ar bed evidoun, ha me ive d’ar bed.

¹⁵ Rag en Jesus‐Christ ar circoncision na dalv netra, nag an dicirconcision ken‐neubeud, mes red eo genel a‐nevez.

¹⁶ Ha kement hini hag a vale hervez ar reglen‐man, ra vezo ar peoc’h hag an drugarez varnezhe, ha var an Israel a Zoue!

¹⁷ Diwallo den da ober poan d’in divar vreman, rag dougen a ran em c’horf merkou an Aotrou Jesus.

¹⁸ Breudeur, ra vezo gras hon Aotrou Jesus‐Christ gant ho spered! Amen.