Galated 5 - Testamant Nevez 1897 (Jenkins)

CHABISTR V.

¹ Rag‐se choumit stard el liberte gant pehini hen deuz ar C’hrist rentet ac’hanoc’h libr, ha n’en em likit ket a‐nevez dindan yeo an esclavach.

² Me, Paol, a lavar deoc’h, penaos mar lakit circoncisa ac’hanoc’h, ar C’hrist na dalvezo deoc’h da netra.

³ Ha testenia a ran ouz‐pen da gement den a laka circoncisa anezhan, e rank derc’hel al lezen pen‐da‐ben.

⁴ Dispartiet oc’h ouz ar C’hrist, c’houi holl pere a glask en em justifia dre al lezen, kwezet oc’h e‐meaz euz ar c’hras.

⁵ Rag, evidomp‐ni a zo, dre ar Spered, en gortoz euz an esperans da veza justifiet dre ar feiz.

⁶ Rag er C’hrist Jesus ar circoncision na dal netra nag an dicirconcision ken neubeud, mes ar feiz hag a labour dre ar garantez.

⁷ Redec a reac’h ervad, piou hen deuz harzet ac’hanoc’h, ma na zentit mui ouz ar wirionez?

⁸ An ali‐ze na zeu ket euz an Hini hen deuz ho kalvet.

⁹ Eun tammic goell a laka an toaz holl da c’hoi.

¹⁰ Fizians em euz divar ho pen, dre an Aotrou, ne zonjfet ket otramant; mes an hini a droubl ac’hanoc’h, piou‐benag eo, a ranko dougen ar beac’h euz a gement‐se.

¹¹ Evidoun‐me, breudeur, mar prezegan c’hoas ar circoncision, perag e persecuter c’hoas ac’hanoun? Distrujet eo ar scandal euz ar groaz!

¹² Plijet gant Doue ma vije lammet kuit ar re a deu d’ho troubli!

¹³ Breudeur, galvet oc’h bet d’al liberte; mes diwallit, var digarez al liberte‐ze, da veva hervez ar c’hig; mes deuit da blega an eil d’egile dre garantez.

¹⁴ Rag al lezen holl a zo en eur gomz hep‐ken, houman: Karoud a ri da nessa evel‐d’oud da‐unan.

¹⁵ Mes mar deuit da gregi gant ho tent, ha d’en em zevori an eil egile, diwallit ne deufec’h da veza distrujet an eil gant egile.

¹⁶ Me a lavar eta: Baleit hervez ar Spered, ha na gontantit ket c’hoantegeziou ar c’hig.

¹⁷ Rag ar c’hig hen deuz c’hoantaennou control d’ar Spered, hag ar Spered, hen deuz ive control d’ar c’hig, hag an eil a stourm euz egile; en hevelep doare na rit ket an traou a fellfe deoc’h da ober.

¹⁸ Mar d’och renet gant ar Spered, n’emoc’h ket dindan al lezen.

¹⁹ Hogen, oberou ar c’hig a zo anat, hag an oberou‐ze a zo: an avoultriach, al libertinach, al louzdoni, al lubricite,

²⁰ an idolatriach, ar sorcelach, ar gassoni, an disput, ar jalouzi, ar goler, an emgannou, an divisionou, an hereziou,

²¹ an anviou, al lazerezou, ar vezventiou, an dirollou, hag an traou all euz ar seurt‐se. Lavaret a ran deoc’h en avans, evel ma em euz ive lavaret dija, penaos ar re a ra ar seurt traou‐se, na heritint ket rouantelez Doue.

²² Mes frouez ar Spered eo, ar garantez, ar joa, ar peoc’h, ar batianted, ar vadelez, ar garantez evit ar mad, ar fidelite, an dousder, an demperans;

²³ al lezen n’ema ket a‐enep an traou‐ze.

²⁴ Hogen, ar re a zo d’ar C’hrist ho deuz crucifiet ar c’hig gant he wall‐viçou hag he wallioulou.

²⁵ Mar bevomp dre ar Spered, baleomp ive dre ar Spered.

²⁶ Diwallomp da glask ar gloar vên, an eil o klask beza treac’h var egile, hag o veza leun a anvi an eil e‐kenver egile.