Galated 4 - Testamant Nevez 1897 (Jenkins)

CHABISTR IV.

¹ Hogen, me a lavar penaos, keit ha ma’z eo an heritour eur bugel, ez eo henvel en pep tra ouz eun esclav, petra‐benag ma’z eo mestr var pep tra;

² mes choum a ra dindan renerien ha culatored, beteg an amzer merket gant an tad.

³ Evel‐se ive ni, pa oamp bugale, e oamp en esclavach dindan kenta genteliou ar bed.

⁴ Mes, pa’z eo deuet an amzer merket, Doue hen deuz digasset he Vab, ganet euz a eur vreg, ganet dindan al lezen,

⁵ evit prena ar re a oa dindan al lezen, evit ma teujemp da veza bugale a adoption.

⁶ Hag, abalamour ma’z oc’h bugale, Doue hen deuz digasset Spered he Vab en ho calonou, hag ar Spered‐se a gri: Abba, O Tad!

⁷ Dre‐ze n’oud ken eun esclav, mes eur mab, ha mar d’oud eur mab, ez oud ive heritour da Zoue dre ar C’hrist.

⁸ Mes en amzer‐ze, evit‐gwir, dre ne anavezec’h ket Doue, e servichec’h doueou ha n’int ket doueou dre ho natur.

⁹ Ha breman pa hoc’h euz anavezet Doue, pe kentoc’h pa’z oc’h bet anavezet gant Doue, penaos e tistroit‐hu c’hoas d’ar c’henta genteliou dister ha paour‐ze, da bere e fell deoc’h plega a‐nevez?

¹⁰ Miret a rit gant aked an deiziou, ar miziou, an amzeriou hag ar bloaveziou.

¹¹ Aoun em euz evidoc’h, n’em befe labouret en hoc’h andred, ha kollet va foan.

¹² Breudeur, me ho ped, bezit evel‐d’oun, rag me ive a zo eveldoc’h. N’hoc’h euz great gaou e‐bed ouzin;

¹³ hag anaoud a rit penaos em euz prezeget deoc’h an Aviel araog breman er zempladurez euz ar c’hig;

¹⁴ ha n’hoch euz ket va disprizet, na va zaolet diouzoc’h, abalamour ma’z oun amprouvet evel‐se em c’hig; mes digemeret oc’h euz ac’hanoun evel eun eal a‐berz Doue, evel Jesus‐Christ he‐unan.

¹⁵ Petra eta a rea neuze hoc’h eürusted? Rag me a ro testeni deoc’h penaos ma vije bet possubl deoc’h, ho pije tennet euz ho pen ho taou‐lagad hoc’h‐unan, ha roet anezhe d’in‐me.

¹⁶ Ha deuet oun‐me eta da veza enebour deoc’h, en eur lavaret deoc’h ar wirionez?

¹⁷ Sourci ho deuz evidoc’h; mes n’eo ket gant lealded: er c’hontrol, c’hoant ho deuz d’ho tistaga diouzimp, evit ma vezoc’h leun a c’hoantegez‐vad evithe.

¹⁸ Hogen, mad eo beza leun a volontez‐vad evit ar pez a zo mad, e peb amzer, ha nann hep‐ken pa vezan prezant en ho touez.

¹⁹ Va bugaligou, evit pere e santan c’hoas ar poaniou a vez o c’henel bugale, ken a vezo formet ar C’hrist enoc’h;

²⁰ karoud a rajen beza breman assambles ganeoc’h, ha chanch va langach; rag eur gwall zourci em euz divar ho pen.

²¹ Livirit d’in, c’houi pere a fell deoc’h beza dindan al lezen, ha na gomprenit‐hu ket al lezen?

²² Rag scrivet eo, penaos Abraham hen deuz bet daou vab; unan euz ar plac’h‐esclav, hag egile euz ar vreg‐libr.

²³ Mes an hini a oa euz ar plac’h‐esclav a oe ganet hervez ar c’hig; hag hini ar vreg‐libr a oe ganet dre vertuz ar bromessa.

²⁴ An traou‐ze a zo eun imach; rag an diou vaouez‐ze a zo diou allians, unan euz a venez Sina, hag a c’han esclaved, hag honnes eo Agar.

²⁵ Rag an Agar‐ze eo menez Sina, en Arabi, ha represanti a ra ar Jerusalem avreman, pehini, evel ma velomp, a zo en esclavach gant he bugale;

²⁶ mes ar Jerusalem, a zo euz an env, a zo libr, hag honnes eo hor mam‐ni holl.

²⁷ Rag scrivet eo: Kemer levenez, maouez difrouez, te pehini n’az poa ket a vugale, sav da vouez, ha cri a bouez‐pen, te pehini n’oud ket bet en poan a vugale; rag an hini a oa dilezet, he devezo muioc’h a vugale, eged an hini he doa ar pried.

²⁸ Hogen ni, breudeur, evel Isaac, a zo bugale ar bromessa.

²⁹ Mes evel ma c’hoarvezaz neuze, ma teuaz an hini a oa ganet hervez ar c’hig da bersecuti an hini a oa ganet hervez ar Spered, evel‐se e c’hoarvez breman.

³⁰ Mes petra a lavar a Scritur? Kas kuit ar plac’h esclav hag he mab; rag mab ar plac’h esclav na herito ket assambles gant mab ar vreg‐libr.

³¹ Hogen, breudeur, n’omp ket bugale ar plac’h esclav, mes bugale ar vreg‐libr.