Efeziz 4 - Testamant Nevez 1897 (Jenkins)

CHABISTR IV.

¹ Rag‐se, me, prizonier an Aotrou, a bed ac’hanoc’h da heuil eur vuez dign euz ar vocation dre behini oc’h bet galvet,

² gant pep humilite ha pep dousder, gant eur spered a batianted, oc’h en em supporti an eil egile gant karantez;

³ o lakaad ho poan da genderc’hel a‐unan er memeus spered, dre liam ar peoc’h.

⁴ N’euz nemed eur c’horf hag eur Spered hep‐ken, evel ive ma’z oc’h bet galvet da eun esperans hep‐ken, dre ho vocation.

⁵ Eun Aotrou hep‐ken, eur feiz hep‐ken, eur vadiziant hep‐ken;

⁶ eun Doue hep‐ken ha Tad an holl, pehini a zo dreist an holl, dre an holl, hag enoc’h holl.

⁷ Mes da bep hini ac’hanoc’h eo roet ar c’hras, hervez ar muzul euz donezon ar C’hrist.

⁸ Rag‐se eo bet lavaret: Pa eo bet savet d’an neac’h, hen deuz kasset ganthan eun niver braz a gaptived, hag hen deuz distribuet donezonou d’an dud.

⁹ Hogen ar c’homzouman: Eo bet savet, petra a zinifiont‐hi, nemed ma oa bet diskennet araog el leac’hiou izel euz an douar?

¹⁰ An hini a zo bet diskennet, eo ar memeus hini hag a zo bet ive savet dreist an holl envou, evit ma leunje pep tra.

¹¹ Hen ive eo hen deuz lakeat lod da ebestel, ha lod da brofeted, ha lod da avielerien, ha lod da bastored ha da zoctored;

¹² evit lakaad ar zent da greski e perfection, evit labour ar garg a vinistr, evit edification corf ar C’hrist;

¹³ ken a vezimp holl deuet da veza a‐unan er feiz hag en anaoudegez euz a Vab Doue, e stad eun den parfet, d’ar muzul euz a vent parfet ar C’hrist;

¹⁴ evit na vezimp mui bugaligou, douget ho troet aman hag a‐hont gant peb avel a zoctrin, gant tromplerez an dud, hag ho ijin fall da drompla dre finessa;

¹⁵ mes ma teuimp, en eur heuil ar wirionez er garantez, da greski en pep tra, en hini a zo ar pen, ar C’hrist;

¹⁶ euz a behini ar c’horf holl, o veza frammet‐mad hag unanet stard assambles, dre ar zicour a zeu dezhan euz he holl juntrou, a denn he grescans, hervez an nerz roet da bep ezel, evit ma vezo edifiet he‐unan er garantez.

¹⁷ Setu aman eta ar pez a lavaran hag a destenian aberz an Aotrou: N’ho pezit mui ar memeus comportamant evel ar Jentiled all,

¹⁸ pere a heuil ar vanite euz ho spered; o veza tenvaleet ho intentamant, hag o veza pell euz ar vuez a Zoue, abalamour d’an ignorans a zo enhe, dre ar galeder euz ho c’halon;

¹⁹ o veza kollet pep santimant, ez int en em roet d’an diroll, evit ober peb louzdoni, gant eur ioul direiz.

²⁰ Mes c’houi, n’e ket evel‐se hoc’h euz desket ar C’hrist;

²¹ da vihana, mar hoc’h euz selaouet anezhan, ha mar d’oc’h bet, hervez ar wirionez a zo en Jesus,

²² desket enhan, evit ar pez a zell ho puez tremenet, da deurel diouzoc’h an den koz, pehini a zeu da gorrompi dre ar c’hoantadennou tromplus;

²³ da veza renevezet dre ar Spered en hoc’h intentamant;

²⁴ ha da viska varnoc’h an den nevez, a zo crouet da imach Doue, er justis hag er zantelez euz ar wirionez.

²⁵ Dre‐ze, goude beza taolet diouzoc’h ar gaou, ra zeuio pep hini da gomz d’he nessa hervez ar wirionez, rag ni a zo izili an eil euz egile.

²⁶ Mar en em lakit en coler, diwallit da bec’hi; diwallit ne deufe an heol da guzat var ho coler;

²⁷ ha na roit ket a zigor d’an diaoul.

²⁸ Ra zeuio an hini a laere, da choum hep laerez mui; mes kentoc’h ra labouro gant he zaouarn da eun dra vad‐benag, evit m’hen devezo peadra da rei d’an hini a zo en dienez.

²⁹ Mirit na zeuio er meaz euz ho kenou komz divalo e‐bed; mes ra vezo ho komzou, komzou talvouduz ha mad evit edifia, evit ma raint vad d’ar re ho zelaou.

³⁰ Ha na gontristit ket Spered‐Santel Doue, dre behini ez oc’h bet siellet evit dervez ar redemption.

³¹ Ra vezo taolet kuit euz ho touez pep c’houervder, pep kassoni, pep coler, pep scrijaden, pep gwall‐deodat, hag ive pep drougviez.

³² Mes bezit mad an eil e‐kenver egile, truezus, o pardoni an eil d’egile, evel ma hen deuz Doue pardonet deoc’h ive er C’hrist.