Efeziz 2 - Testamant Nevez 1897 (Jenkins)

CHABISTR II.

¹ C’houi ive a oa maro en ho kwallou hag en ho pec’hejou,

² (e pere gwech‐all hoc’h euz baleet, hervez giz ar bed‐man, hervez ar prins euz a c’halloud an ear, ar spered‐se pehini a labour breman e bugale an dizentidigez;

³ e‐touez pere ive e vevemp holl gwech‐all, hervez ar ioulou euz hor c’hig, oc’h ober hervez deziriou ar c’hig hag hor sonjezonou; hag e oamp dre natur bugale ar goler, evel ar re all.)

⁴ Mes Doue, pehini a zo pinvidic a drugarez, abalamour d’ar garantez vraz gant pehini hen deuz hor c’haret,

⁵ pa oamp maro en hor pec’hejou, hen deuz hon rentet d’ar vuez assambles er C’hrist, (dre c’hras eo ez oc’h salvet;)

⁶ hag hen deuz hon resussitet assambles, hag hen deuz hon lakeat da azeza assambles el leac’hiou celestiel, en Jesus‐Christ;

⁷ evit diskouez, en amzeriou da zond, ar pinvidigezou dreist muzul euz he c’hras, dre he vadelez en hor c’henver‐ni en Jesus‐Christ.

⁸ Rag dre c’hras eo ez oc’h salvet, dre ar feiz; ha kement‐se na zeu ket ac’hanoc’h hoc’h‐unan, donezon Doue eo;

⁹ n’e ket dre an oberou, evit na zeui den d’en em c’hlorifia.

¹⁰ Rag he labour omp, o veza bet crouet en Jesus‐Christ evit an oberoumad, pere a zo bet preparet gant Doue a‐ziaraog, evit ma kerzimp enhe.

¹¹ Dre‐ze, ho pezet sonj penaos c’houi, pere a oa gwech‐all Jentiled er c’hig, ha pere a oa galvet ar re dicirconcis gant ar re a c’halver circonciset er c’hig dre zorn an den,

¹² e oac’h en amzer‐ze heb ar C’hrist, er meaz euz a republic Israel, estranjourien e‐kenver alliansou ar bromessa, o veza heb esperans, hag heb Doue er bed.

¹³ Mes breman, en Jesus‐Christ, c’houi pere gwech‐all a oa pell, a zo bet digasset tost dre oad ar C’hrist.

¹⁴ Rag hen eo hor peoc’h, hen pehini hen deuz lakeat an daou bobl a‐unan, en eur diskar ar voger a zisparti;

¹⁵ o veza distrujet en he gig ar pez a oa caoz d’ar gassoni, lezen ar gourc’hemenou, eul lezen a ordrenansou; evit ober enhan he‐unan, euz a zaou, eun den hep‐ken, eun den nevez, goude beza great ar peoc’h;

¹⁶ ha ma teuje, en eur distruja he‐unan ar gassoni a oa etrezhe, da reconcilia gant Doue, dre ar groaz, an eil rum hag egile en eur c’horf hep‐ken.

¹⁷ Ha deuet eo evit annons kelou mad ar peoc’h deoc’h‐hu, pere a oa pell, ha d’ar re a oa tost;

¹⁸ rag dreizhan hon euz digemer, an eil hag egile, digant an Tad, en eur memeus Spered.

¹⁹ Evel‐se n’oc’h mui breman estranjourien, na tud a‐ziaveaz, mes kenvrois d’ar zent, hag euz a di Doue;

²⁰ o veza savet var fondamant an ebestel hag ar brofeted, euz a behini Jesus‐Christ he‐unan eo ar meancorn,

²¹ en pehini an holl vatis, o veza frammet ervad assambles, a zav da veza eun templ santel d’an Aotrou; en pehini ez oc’h ive c’houi savet assambles, evit beza ti Doue er Spered.