Apocalyps 22 - Testamant Nevez 1897 (Jenkins)

CHABISTR XXII.

¹ Goude‐ze, an eal a ziskouezaz d’in eur rivier a zour beo, sclear evel cristal, hag a zeue er meaz euz a dron Doue hag an Oan.

² Hag e‐kreiz plasen ar gear, hag en daou du euz ar rivier, e oa eur vezen a vuez hag a zouge daouzec frouezen, hag a roe he frouez bep mis: ha deliou ar vezen a oa evit iac’haad ar Jentiled.

³ Na vezo malloz e‐bed ken; ha tron Doue hag an Oan a vezo enhi, hag he zervicherien a zervicho anezhan.

⁴ Gwelet a raint he faç, hag he hano a vezo var ho zal.

⁵ Ne vezo mui noz e‐bed, ha n’ho devezo ket ezom a c’houlou, nag a sclerijen an heol, rag an Aotrou Doue a sclerijenno anezhe; hag e renint da viken.

⁶ Goude‐ze e lavaraz d’in: Ar c’homzou‐man a zo sur ha gwirion, hag an Aotrou, Doue ar brofeted santel, hen deuz digasset he eal, evit discleria d’he zervicherien an traou a dle c’hoarvezoud hep‐dale.

⁷ Setu, e teuan dizale; eürus an hini a vir komzou profesi al levr‐man!

⁸ Ha me, Ian, eo an hini hen deuz gwelet ha klevet an traou‐ze. Ha goude beza ho c’hlevet ha gwelet, en em daoliz ouz treid an eal ho diskoueze d’in, evit hen adori.

⁹ Mes hen a lavaraz d’in; Diwall da ober kement‐se; rag me a zo ken‐servicher ganez, ha gant da vreudeur ar brofeted, ha gant ar re a vir komzou al levr‐man. Ador Doue.

¹⁰ Lavaret a reaz ive d’in: Ne laka ket dindan ziel ar c’homzou a brofesi euz al levr‐man; rag an amzer a zo tost.

¹¹ An hini a zo injust, ra vezo injust c’hoas; an hini a zo souillet ra zeui da veza muioc’h souillet c’hoas; hag an hini a zo just ra zeui da veza justoc’h c’hoas; hag an hini a zo santel ra zeui d’en em zantifia c’hoas muioc’h.

¹² Hogen, setu, e teuan dizale, ha va gobr a zo ganen evit renta da bep hini hervez ma vezo bet he oberou.

¹³ Me eo an Alpha hag an Omega, ar c’henta hag ar diveza, ar c’hommansamant hag ar fin.

¹⁴ Eürus ar re a zalc’h he c’hourc’hemenou, evit m’ho devezo lod euz ar vezen a vuez, ha ma c’hellint mond ebarz ar gear dre an norojou!

¹⁵ Mes en diaveaz e vezo an dud impudic, an ampoezonerien, ar re lubric, ar muntrerien, an idolatred, ha kement hini a gar hag a ra ar gaou.

¹⁶ Me, Jesus, em euz kasset va eal, evit renta deoc’h testeni euz an traou‐man en Ilizou. Me eo grizien ha lignez David, ar stereden lugernus euz ar mintin.

¹⁷ Ar Spered hag ar Pried a lavar: Deuz. Hag an hini a glev, lavaro ive: Deuz. Hag an hini hen deuz sec’hed, ra zeuio; ha piou‐benag a fell dezhan kaoud dour beo, recevo en gratis.

¹⁸ Discleria a ran da gement hini a glev komzou ar brofesi euz al levr‐man, penaos mar deu unan‐benag da lakaad enhan ger e‐bed ouz‐pen ar pez a zo scrivet, Doue a lakai da gweza varnezhan ar gouliou a zo scrivet el levr‐man;

¹⁹ ha mar deu unan‐benag da lemmel euz a gomzou al levr a brofesi‐man, Doue a lammo he lod euz al levr ar vuez, hag euz ar gear zantel, hag euz an traou a zo scrivet el levr‐man.

²⁰ An hini a ro testeni euz an traou‐man, a lavar: Ia, dond a ran, dizale. Amen! Ia, deuz, Aotrou Jesus!

²¹ Gras hon Aotrou Jesus‐Christ ra vezo ganeoc’h holl! Amen.