Apocalyps 21 - Testamant Nevez 1897 (Jenkins)

CHABISTR XXI.

¹ Goude‐ze e veliz eun env nevez hag eun douar nevez; rag an env kenta hag an douar kenta a oa tremenet, hag ar mor ne oa mui.

² Ha me, Ian, a velaz ar gear zantel, ar Jerusalem nevez, o tisken euz an env a‐gichen Doue, kempennet evel eur vreg‐yaouank evit he fried.

³ Hag e kleviz eur vouez vraz euz an env, hag a lavare; Setu tabernacl Doue gant an dud, hag hen a rai he zemeurans ganthe; int a vezo he bobl, ha Doue he‐unan a vezo ganthe, hen a vezo ho Doue.

⁴ Ha Doue a zec’ho an holl daelou euz ho daou‐lagad, hag ar maro na vezo mui. Na vezo mui na kaon, na garm, na poan; rag an traou kenta a zo tremenet.

⁵ Hag an hini a oa azezet var an tron a lavaraz: Setu, ober a ran nevez an holl draou. Neuze e lavaraz d’in: Scriv; rag ar c’homzou‐man a zo gwirion ha sur.

⁶ Lavaret a reaz d’in ive: Achu eo pep tra; me eo an Alpha hag an Omega, ar c’hommansamant hag ar fin. D’an hini hen deuz sec’hed e roin en gratis euz a feunteun an dour a vuez.

⁷ An hini a drec’ho, a herito pep tra; ha me a vezo he Zoue, hag hen a vezo va mab.

⁸ Mes, evit ar re aounic, ar re difeiz, ar re abominabl, ar muntrerien, an dud lubric, an ampoezonerien, an idolatred, hag an holl c’haouiaded, ho lod a zo el lenn ardant a dan hag a soufr; he‐man eo an eil maro.

⁹ Neuze e teuaz d’am c’havout unan euz ar seiz eal ho doa bet ar seiz scudel leun gant ar seiz gouli diveza, hag e komzaz ouzin, en eur lavaret: Deuz, ha me a ziskouezo d’id ar vreg yaouank, greg an Oan.

¹⁰ Hag e tougaz ac’hanoun en spered var eur menez braz hag huel, hag e tiskouezaz d’in ar gear vraz, ar Jerusalem zantel, o tisken euz an env a‐berz Doue, ha gloar Doue ganthi.

¹¹ Skedus e oa evel eur mean precius meurbed, evel eur mean jasp, sclear evel cristal.

¹² Beza he doa eur voger vraz hag huel, gant daouzec dor, hag e‐tal an daouzec dor daouzec eal hag hanoiou scrivet varnezhe, pere eo hanoiou an daouzec tribu euz a vugale Israel.

¹³ Var‐zu ar Sav‐heol, teir dor; var‐zu an Hanter‐noz, teir dor; var‐zu ar C’hreisteiz, teir dor; var‐zu ar C’huz‐heol, teir dor.

¹⁴ Moger ar gear he doa daouzec fondation, var bere hanoiou daouzec abostol an Oan.

¹⁵ Hag an hini a gomze ouzin hen doa eur gorzen aour evit muzuri ar gear, hag he dorojou, hag he moger.

¹⁶ Ar gear he doa pevar c’horn, ha keit e oa he hed hag he lec’hed; hag hen a vuzuraz ar gear gant he gorzen, daouzec mil stad a bep costez; he hed, he lec’hed hag he huelded a oa keit ha keit.

¹⁷ Muzuri a reaz ive ar voger, pevar ilinad ha seiz ugent, diouz mezur eun den, pihini a oa hini an eal.

¹⁸ Ar voger a oa great gant mein jasp, mes ar gear a oa aour pur, henvel ouz gwer pur.

¹⁹ Ha fondationou moger ar gear a oa ornet gant a bep seurt mein precius. Ar c’henta fondation a oa euz a jasp; an eil, euz a zaphir; an trede, euz a galsedoin; ar pevare a emeraud;

²⁰ ar bempved, euz a zardonix; ar c’houec’hved, euz a zardius; ar seizved, euz a grysolith; an eizved, euz a beryl; an naoved, euz a dopaz; an decved, euz a ghrysopraz; an unecved, euz a hyacinth; hag an daouzecved, euz a amethyst.

²¹ An daouzec dor a oa daouzec perlezen; pep dor a oa great gant eur berlezen hep‐ken, hag ar blasen euz ar gear a oa euz a aour pur henvel ouz gwer pur.

²² Ne veliz templ e‐bed enhi; rag an Aotrou Doue holl‐c’halloudec hag an Oan eo an templ anezhi.

²³ Hag ar gear n’he deuz ket a ezom euz an heol, nag euz al loar evit he sclerijenna; rag gloar Doue a sclerijen anezhi, hag an Oan eo he goulou.

²⁴ Hag an nationou a vezo bet salvet, a valeo diouz he goulou, ha rouane an douar a gasso enhi ho gloar hag ho henor.

²⁵ He dorojou na vezint ket serret bemdez, rag eno ne vezo noz e‐bed.

²⁶ Digasset e vezo di gloar hag henor an nationou.

²⁷ Ha na antreo ebarz netra a impur, na den hag en em ro d’an traou abominabl ha d’ar gevier; mes ar re‐ze hep‐ken pere a zo scrivet el levr a vuez euz an Oan.