2 Timote 3 - Testamant Nevez 1897 (Jenkins)

CHABISTR III.

¹ Hogen, red eo d’id gouzout penaos en deveziou diveza e teui gwall‐amzeriou.

² Rag an dud a vezo touellet ganthe ho‐unan ha gant an arc’hant, fougeerien, ourgouillus, gwall‐deodou, dizent ouz ho zad hag ouz ho mam,

³ dizanaoudec, impi, hep carantez naturel, dibardon, droug‐prezegerien e‐faoz, diroll, didruez, leun a gassoni evit an dud vad,

⁴ treitourien, ter, c’houezet gant an ourgouil, douget d’ar blijadur muoc’h eged da Zoue,

⁵ o kaoud an apparans euz ar biete, mes o veza nac’het an nerz anezhi. Pella ive diouz an dud‐se.

⁶ E niver euz ar re‐ze ema ar re a ia en tiez, hag a c’hounid merc’hed paour karget a bec’hejou, sklejet gant pep seurt ioulou fall;

⁷ pere a zo atao o teski, heb gallout biken dond a‐ben da anaoud ar wirionez.

⁸ Hag evel ma teuaz Jannes ha Jambres da enebi ouz Moises, evel‐se ive ar re‐man a stourm ouz ar wirionez; tud a spered corrompet, ha reprouvet evit ar pez a zell ar feiz.

⁹ Mes n’ez aint ket pelloc’h; rag ho follentez a vezo anavezet gant an holl, evel ma oe ive hini an daouze.

¹⁰ Evidoud‐te, ec’h euz heulliet va doctrin, va buez, va dessein, va feiz, va fatianted, va c’harantez, va hir‐c’houzanvedigez,

¹¹ va fersecutionou ha va zouffransou, evel ar re a c’hoarvezaz ganen en Antiokia, en Iconium, en Lystra. Pebez persecutionou em euzme gouzanvet! Hag an Aotrou hen deuz va delivret anezhe holl.

¹² Hogen kement a fell dezhe beva hervez ar biete er C’hrist Jesus, a vezo persecutet.

¹³ Mes an dud fall hag an dromplerien a ielo var wassaad, en eur drompla ar‐re all, hag o veza tromplet ho‐unan.

¹⁴ Mes te, kendalc’h mad en traou ec’h euz desket, hag euz a bere ez oud bet assuret, o c’houzout gant piou ec’h euz desket anezhe, hag o c’houzout penaos,

¹⁵ adaleg da vugaleach, ec’h anavezez ar Scrituriou‐Sacr, pere a zo capabl da gelen ac’hanoud evit ar zilvidigez, dre ar feiz a zo en Jesus‐Christ.

¹⁶ An holl Scritur a zo inspiret gant Doue, ha mad evit rei kelennadurez, evit lakaad da gredi, evit corrija, evit diski er justis;

¹⁷ evit ma vezo an den a Zoue rentet parfet, ha mad evit peb mad‐ober.