2 Timote 2 - Testamant Nevez 1897 (Jenkins)

CHABISTR II.

¹ Deuz eta, te, va mab, da grenvaad er c’hras a zo en Jesus‐Christ.

² Hag an traou ec’h euz klevet ganen, dirag kalz a destou, laka anezhe etre daouarn tud fidel, pere a vezo ive capabl d’ho diski d’ar re all.

³ Te eta, gouzanv ar poaniou evel eur zoudard mad da Jesus‐Christ.

⁴ Den e‐bed pa vez er brezel, na zeu d’en em luya gant traou ar vuezman, evit plijoud d’an hini hen deuz he anrollet evit ar brezel.

⁵ Hag ive, mar deu unan‐benag da gombatti er c’hourennadegou, ne vez curunet nemed combatet hen defe hervez al lezennou.

⁶ Red eo d’an tiec labourad, aroag dastum ar frouez.

⁷ Taol evez ouz ar pez a lavaran, ha Doue da rei d’id skiant en pep tra.

⁸ Dalc’h sonj euz a Jesus‐Christ, savet a‐douez ar re varo, ganet euz a raç David, hervez va Aviel,

⁹ evit pehini e souffran poan, beteg beza liammet evel eun torfetour, mes ger Doue n’eo ket liammet.

¹⁰ Kement‐se a zo caoz ma c’houzanvan an holl draou abalamour d’ar re choazet, evit ma c’hellint ive kaoud ar zilvidigez a zo en Jesus‐Christ, gant ar gloar eternel.

¹¹ Gwir eo ar gomz‐man: Mar marvomp assambles ganthan, e vevimp ive assambles ganthan.

¹² Mar gouzanvomp assambles ganthan, e renimp ive assambles ganthan; mar nac’homp anezhan, hen ive a nac’ho ac’hanomp;

¹³ mar n’omp ket fidel, hen a choum fidel koulskoude; na hell ket en em nac’h he‐unan.

¹⁴ Digas dezhe memor euz an traouman, o testenia dezhe azevri dirag an Aotrou, e tleer diwall da zisput divarben komzou goullo, n’int mad nemed da goll ar re a zelaou anezhe.

¹⁵ Bez aketus d’en em diskouez evel eun den amprouvet dirag Doue, evel eul labourer divlam, o tispans gant eünder ar gomz a wirionez.

¹⁶ Mes diwall euz ar c’homzou dizantel ha vên; rag ar re a zo techet dezhe a gwez ato muioc’h‐mui en impiete;

¹⁷ hag ho c’homz a zebro evel ar c’hangren. E niver ar re‐ze ema Hymene ha Philet,

¹⁸ pere ho deuz troet kein d’ar wirionez, o lavaret penaos ar resurrection a zo dija c’hoarvezet, hag a ziskar evel‐se feiz hinienou.

¹⁹ Koulskoude ar fondamant stard a Zoue a choum, o kaoud ar ziel‐man: An Aotrou a anavez ar re a zo dezhan; ha c’hoas; Pioubenag a c’halv hano ar C’hrist, ra zilezo an injustis.

²⁰ En eun ti braz n’euz ket hep‐ken vesseliou aour hag arc’hant, mes ive vesseliou coat ha pri; darn evit eun usach henorabl, darn all evit eun usach disteroc’h.

²¹ Mar deu unan‐benag eta d’en em zerc’hel pur euz an traou‐ze, e vezo eur vessel a henor, santifiet, talvoudec evit usach ar mestr, ha preparet evit peb œuvr vad.

²² Tec’h ive ouz c’hoantadennou ar yaouankiz, ha klask ar justis, ar feiz, ar garantez hag ar peoc’h gant ar re a c’halv an Aotrou gant eur galon bur.

²³ Ha taol kuit diouzid ar c’histionou foll, e pere n’euz deskadurez e‐bed, o c’houzoud penaos e teu chican anezhe.

²⁴ Hogen, arabad eo da zervicher an Aotrou karet an disput; mes dous e tle beza e‐kenver an holl, mad da gelen, leun a batianted;

²⁵ o lakaad gant dousder he adversourien en hent mad, o c’hortoz ma plijo gant Doue ho lakaad da gaoud keuz, ha da zond da anaoud ar wirionez,

²⁶ evit en em diluya euz a bechou an diaoul, pehini ho dalc’h dindan‐han pleget d’he volontez.