2 Pêr 3 - Testamant Nevez 1897 (Jenkins)

CHABISTR III.

¹ Breudeur muia‐karet, setu aman an eil lizer a scrivan deoc’h. Enhe ho daou e tihunan gant va c’helennadurez hoc’h intentamant vad;

² evit ma ho pezo sonj euz ar c’homzou a zo bet lavaret diaraog gant ar brofeted santel, hag euz hor gourc’hemenni, ebestel an Aotrou hag ar Zalver.

³ O c’houzout da‐genta kement‐man, penaos e teuio en deiziou diveza goaperien, pere a valeo hervez ho drougioulou ho‐unan,

⁴ hag a lavaro: Peleac’h ema ar bromessa euz he zonedigez? Rag abaoe ma’z eo maro hon tadou, an holl draou a choum evel ma oant adaleg ma’z eo bet crouet ar bed.

⁵ Rag a volontez‐vad ec’h ignoront kement‐man, penaos eo dre c’her Doue eo bet crouet an envou gwech‐all, hag ez eo bet tennet ive diouz an dour, an douar pehini a veve dre an dour;

⁶ ha penaos eo dre an traou‐ze e perissaz ar bed euz an amzer‐ze, beuzet dindan an dour.

⁷ Hogen, an envou hag an douar a‐vreman a zo diwallet dre ar memeus ger, ha reservet evit an tan, en deiz ma vezo barnet ha kollet an dud impi.

⁸ Koulskoude, va breudeur muia‐karet, arabad eo deoc’h choum heb anaoud eun dra: penaos dirag an Aotrou euz devez a zo evel mil bloaz, ha mil bloaz evel eun devez.

⁹ An Aotrou na laka ket he bromessa da zale, evel ma’z euz lod hag a gred e tale; mes kemer a ra patianted en hor c’henver‐ni, o veza na fell ket dezhan ez afe den da goll, mes e teufe an holl d’ar gonversion.

¹⁰ Hogen, deiz an Aotrou a zeuio evel eul laer en noz; en amzer‐ze an envou a dremeno gant eun drouz vraz, hag an elemanchou entanet a vezo teuzet, hag an douar, gant al labouriou a zo enhan, a vezo devet holl.

¹¹ O veza eta ma tle an holl draouze, dond da deuzi, na pe seurt tud ne dlefec’h‐hu ket beza dre ar zantelez euz ho puez, ha dre ho piete,

¹² o c’hortoz, hag oc’h hasta donedigez an dervez a Zoue, en pehini an envou entanet a vezo diforc’het, hag an elemanchou entanet a vezo teuzet?

¹³ Hogen ni, hervez he bromessa, a c’hortoz envou nevez hag eun douar nevez en pehini ar justis a rai he zemeurans.

¹⁴ Abalamour da ze, breudeur muia‐karet, en eur c’hortoz an traou‐man, grit ho possubl evit beza kavet dinam ha didamal dirag he zaou‐lagad er peoc’h.

¹⁵ Ha credit penaos ar batianted vraz euz hon Aotrou eo ho silvidigez, evel ma hen deuz ive scrivet deoc’h Paol, hor breur muia‐karet, hervez ar furnez a zo bet roet dezhan; hag evel ma her gra en he holl lizerou,

¹⁶ pa gomz enhe euz an traou‐man; e‐touez pere ez euz lod dies da entent, hag a vez troet e‐gin koulz hag ar Scrituriou all, gant tud heb anaoudegez ha di‐assur, hag a ra kement‐se evit ho c’holl ho‐unan.

¹⁷ Rag‐se, breudeur muia‐karet, pere a zo bet berzet, bezit var evez, gant aoun da veza treinet gant tromplerez an dud impi, ha da zond da gweza deuz ho fermder.

¹⁸ Mes creskit en gras hag en anaoudegez hon Aotrou ha Salver Jesus‐Christ. Ar gloar dezhan, breman, ha da viken! Amen.