2 Pêr 1 - Testamant Nevez 1897 (Jenkins)

CHABISTR I.

¹ Simon per, servicher hag abostol Jesus‐Christ, d’ar re ho deuz bet en partach eur feiz euz ar memeuz priz gant hon hini‐ni, er justis euz hon Doue ha Salver Jesus‐Christ.

² Ra vezo cresket deoc’h ar c’hras hag ar peoc’h, en anaoudegez euz a Zoue hag euz a Jesus hon Aotrou.

³ Evel ma hen deuz he c’halloud divin roet deomp kement a zell ouz ar vuez hag ar biete, dre an anaoudegez euz an hini hen deuz hor galvet dre he c’hloar hag he vertuz;

⁴ dre bere eo bet roet deomp ar promessaou braz ha precius meurbed, evit ma teuot, dre ar re‐man, da gaoud lod euz an natur divin, o pellaad ouz ar gorruption a zo o ren dre ar bed dre ar c’hoantaennou diroll;

⁵ evel‐se, o lakaad hoc’h holl boan d’hen ober, unanit assambles gant ho feiz ar vertuz, gant ar vertuz ar wiziegez;

⁶ gant ar wiziegez an demperans; gant an demperans ar batianted; ha gant ar batianted ar biete;

⁷ gant ar biete ar garantez a vreur; ha gant ar garantez a vreur ar garantez.

⁸ Rag ma ema an traou‐ze enoc’h, ha mar emaint en abondans, ne lezint ket ac’hanoc’h da veza na didalvez, na difrouez en anaoudegez euz hon Aotrou Jesus‐Christ.

⁹ Mes an hini n’ema ket an traou‐ze enhan, a zo dall, ber‐velet eo, hag ankounac’heet hen deuz ar burification euz he bec’hejou tremenet.

¹⁰ Rag‐se, breudeur, bezit muioc’h‐mui aketus da grenvaad ho kalvedigez hag ho choazedigez; rag en eur ober kement‐se, ne deuot biken da gweza;

¹¹ hag evel‐se an antre e rouantelez eternel hon Aotrou ha Salver Jesus‐Christ a vezo roet deoc’h gant largentez.

¹² Setu perag, ne vankin ket da zigas da zonj deoc’h dalc’hmad euz an traou‐man, petra‐benag ma c’hanavezit anezhe, ha ma’z oc’h krenveet er wirionez pehini a zo ganeoc’h.

¹³ Ha me a gred ez eo just, ekeit ha ma vezin ebarz an danten‐man, e tihunfen ac’hanoc’h dre va aliou,

¹⁴ o c’houzout penaos, hep‐dale e tilezin an danten‐man, hervez ma hen deuz hon Aotrou Jesus‐Christ roet d’in da anaoud.

¹⁵ Mes soagn em bezo da ober ar pez a zo red evit ma c’hellot, goude va zremenvan, kaout sonj bepred euz an traou‐ze.

¹⁶ Rag n’e ket en eur heuil fablennou great gant finesse eo hon euz roet da anaoud deoc’h galloud ha donedigez hon Aotrou Jesus‐Christ; mes goude beza gwelet he vajeste gant hon daou‐lagad hon‐unan.

¹⁷ Rag recevet hen deuz digant Doue an Tad henor ha gloar, pa oe adresset dezhan ar vouez‐man gant ar Gloar souveren: He‐man eo va Mab muia‐karet, en pehini em euz lakeat va holl garantez.

¹⁸ Ha ni hon euz klevet ar vouez‐ze a zeue euz an env, pa oamp assambles ganthan var ar menez santel.

¹⁹ Beza hon euz ive komz ar brofeted hag a zo eur gomz ferm meurbed, ouz pehini e rit mad teurel evez, evel ouz eur c’houlaouen hag a lugerne en eul leac’h teval, ken a deuje an deiz da c’houlaoui ha ken a zavje stereden ar mintin en ho calonou;

²⁰ gouezit da genta an dra‐man penaos, profesi ebed euz ar Scritur na zeu euz a zantimant an den he‐unan.

²¹ Rag ar brofesi n’eo ket bet digasset gwech‐all dre volontez an den; mes tud santel a Zoue ho deuz komzet, douget da gement‐se gant ar Spered‐Santel.