2 Korintiz 6 - Testamant Nevez 1897 (Jenkins)

CHABISTR VI.

¹ Pa’z eo gwir eta ez omp ken‐labourerien assambles gant Doue, ho pedi a reomp stard da ober en hevelep doare ma n’ho pezo ket bet gras Doue en vên.

² Rag hen a lavar: Me em euz da zelaouet en amzer favorabl, hag em euz da zicouret e deiz ar zilvidigez. Setu breman an amzer favorabl; setu breman deiz ar zilvidigez.

³ Ne roomp scandal e‐bed, en nep doare, evit na vezo tamal e‐bed var hor c’harg.

⁴ Mes klask a reomp beza kavet mad e pep tra, evel servicherien da Zoue, en eur batianted vraz, en afflictionou, en tourmanchou, en enkreziou,

⁵ er gouliou, er prizoniou, er seditionou, el labouriou, er veilladou, er iunou,

⁶ er burete, er wiziegez, en hirc’houzanvedigez, en dousder, dre ar Spered‐Santel, dre eur garantez gwirion,

⁷ dre gomz ar wirionez, dre nerz Doue, dre armou ar justis, pere a zalc’her a‐zeo hag agleiz,

⁸ e‐kreiz an henor hag an dismegans, e‐kreiz ar vrud fall hag ar vrud vad;

⁹ o veza tremenet evit tromplerein, ha ni gwirion koulskoude; evel tud ha n’int anavezet gant den, ha ni anavezet mad; evel tud o vervel, ha ni beo koulskoude; evel tud kastizet, mes hep beza lakeat d’ar maro;

¹⁰ evel tud glac’haret, ha ni joaüs bepred; evel peorien, ha ni o pinvidikaad meur a hini; evel tud ha n’ho deuz netra, ha ni o kaout pep tra.

¹¹ O Corintied, abalamour deoc’h eo hon euz digoret hor genou! Deuet eo hor c’halon da veza frankoc’h.

¹² N’eo ket henk varnoc’h enomp‐ni; mes ho calon‐hu a zo henkeet.

¹³ Hogen, evit ober d’in evel ma ran deoc’h (komz a ran ouzoc’h evel ouz va bugale), frankait ive ho calon.

¹⁴ N’en em lakit ket dindan ar memeus ieo assambles gant an dud difeiz; rag daoust pe seurt henveledigez a zo etre ar justis hag ar fallentez? ha pe seurt accord a hell beza etre ar sclerijen hag an devalijen?

¹⁵ Pe seurt union a hell beza etre ar C’hrist ha Belial? pe daoust pe seurt lod a hell an den a feiz kaout gant an den difeiz?

¹⁶ Petra hen deuz templ Doue da ober gant an idolou? Rag c’houi eo templ an Doue beo, evel ma hen deuz Doue lavaret: Me a choumo en ho c’hreiz hag e valein en ho zouez; me a vezo ho Doue, hag int a vezo va fobl.

¹⁷ Rag‐se deuit er meaz euz ho zouez, ha dispartiit diganthe, eme an Aotrou, ha na douchit ouz netra a vez impur, ha me ho tigemero;

¹⁸ ha me a vezo Tad deoc’h, ha c’houi a vezo mibien ha merc’hed d’in, eme an Aotrou holl c’halloudec.