2 Korintiz 5 - Testamant Nevez 1897 (Jenkins)

CHABISTR V.

¹ Rag gouzoud a reomp penaos, mar d’eo distrujet an danten‐man, an ti douarman en pehini e choumomp, hon euz ebarz an envou eun ti‐all a‐berz Doue, eun ti eternel, ha n’eo ket bet great gant dorn an den.

² Rag huanadi a reomp en danten‐man, o tezirout gant nerz beza gwisket gant hon ti a zo euz an env;

³ mar digouez deomp koulskoud ebeza kavet gwisket, eleac’h beza en noaz.

⁴ Rag ni pere a zo en danten‐man, ne reomp nemed huanadi dindan ar beac’h, o veza ma fell deomp, eleac’h beza divisket, beza gwisket, evit ma vezo ar pez a zo marvel lounket gant ar vuez.

⁵ Hag an hini hen deuz great ac’hanomp evit kement‐se, eo Doue pehini ive hen deuz roet deomp an arrez euz he Spered.

⁶ Ato eta ez omp leun a fizians, ha gouzoud a reomp penaos e‐pad ma’z omp o choum er c’horf‐man, emomp pell diouz an Aotrou.

⁷ (Rag dre ar feiz eo e valeomp, ha nann dre ar gwelet.)

⁸ Mes leun omp a fizians, ha gwelloc’h eo ganeomp kuitaad ar c’horf‐man, ha beza e‐kichen an Aotrou o choum.

⁹ Evit se eo e reomp hor fossubl da veza agreabl dezhan, pe e vez red deomp choum er c’horf‐man, pe mond kuit euz anezhan.

¹⁰ Rag red eo deomp holl parissa dirag tribunal ar C’hrist, evit ma recevo pep hini hervez ar mad pe an droug hen devezo great, e‐pad ma oa er c’horf.

¹¹ Oc’h anaoud eta an doujans a zo dleet d’an Aotrou, e poaniomp evit lakaad an dud da gredi; ha Doue a anavez ac’hanomp, hag esperoud a ran ive ez omp anavezet ganeoc’h en ho coustians,

¹² rag n’en em recommandomp ket a‐nevez deoc’h, mes rei a reomp deoc’h leac’h d’en em c’hlorifia abalamour deomp, evit ma c’hellot kaout peadra da respont d’ar re en em c’hlorifi euz an diaveaz, ha nann er galon.

¹³ Rag, pe ni a zo er meaz ac’hanomp hon‐unan, evit Doue eo, pe ni a choum en hor skiant‐vad, evidoc’h eo.

¹⁴ Rag karantez ar C’hrist a bres ac’hanomp, o veza ma credomp stard penaos, mar d’eo marvet unan evit an holl, neuze an holl a zo maro;

¹⁵ hag evit an holl eo bet marvet, evit ma teui ar re a zo beo, da veva nann evithe ho‐unan, mes evit an hini a zo maro ha resussitet evithe.

¹⁶ Evel‐se, a‐vreman, na anavezomp den hervez ar c’hig; ha memeus mar hon euz anavezet ar C’hrist hervez ar c’hig, breman n’hen anavezomp mui evel‐se.

¹⁷ Mar d’euz eta unan‐benag hag a zo er C’hrist, hennes a zo eur c’hrouadur nevez; an traou koz a zo tremenet; setu deuet pep tra da veza nevez.

¹⁸ Hogen, an holl draou‐ze a zeu euz a Zoue, pehini hen deuz hon unanet a‐nevez ganthan dre Jesus‐Christ, hag hen deuz roet deomp ar garg a adunvaniez.

¹⁹ Rag Doue a oa er C’hrist, oc’h adunvani ar bed ganthan he‐unan, o viret da gounta dezhe ho fec’hejou; hag hen deuz lakeat enomp ar gomz a adunvaniez.

²⁰ Ober a reomp eta ar garg a gannaded evit ar C’hrist, evel pa vez Doue he‐unan oc’h exhorti dreizomp; hag en hano ar C’hrist eo e pedomp ac’hanoc’h stard: Bezit unanet a‐nevez gant Doue!

²¹ Rag an Hini n’hen deuz ket anavezet ar pec’hed, a zo bet tretet ganthan evel pec’her abalamour deomp, evit ma teuimp‐ni da veza just euz a justis Doue enhan.