2 Korintiz 10 - Testamant Nevez 1897 (Jenkins)

CHABISTR X.

¹ A‐hend‐all, me Paol, a bed ac’hanoc’h dre zouster ha madelez ar C’hrist, me pehini a zo humbl dirazoc’h, mes leun a hardiegez en ho kenver, pa vezan pell diouzoc’h;

² ho pedi a ran, pa vezin tost deoc’h, na vezo ket red d’in ober usach gant fizians euz an hardiegez‐ze, a behini em euz sonj da ober usach a‐enep eun darn‐benag pere a gemer ac’hanomp evit tud hag a vale hervez ar c’hig.

³ Rag petra‐benag ma valeomp er c’hig, na vrezelekaomp ket hervez ar c’hig.

⁴ Rag hon armou a‐vrezel n’int ket kigus, mes galloudus int en Doue, evit diskar ar fortereziou,

⁵ evit diskar rezoniou an dud, ha pep huelder a zav a‐enep an anaoudegez a Zoue, hag evit digas pep sonjezon da blega da zoujans ar C’hrist;

⁶ ha prest omp da bunissa pep dizentidigez, pa vezo parfet ho sentidigez.

⁷ Ha sellet a rit‐hu ouz an traou hervez an apparans? Mar d’euz unan‐benag hag a gred enhan he‐unan ez eo d’ar C’hrist, ra gredo eta ive penaos, evel ma’z eo hen he‐unan d’ar C’hrist, ni ive a zo dezhan.

⁸ Ha pa deufen d’en em c’hlorifia c’hoas muioc’h euz ar galloud hon euz bet digant an Aotrou, evit ho krenvaad er feiz ha nann evit ho tiskar, n’em befe ket a vêz euz a gement‐se;

⁹ evit na vezo ket credet e karfen ober aoun deoc’h dre va lizerou.

¹⁰ Rag, eme an dud, he lizerou a zo rust ha leun a nerz; mes pa vez dirazomp, he zoare a zo sempl, hag he gomz a zo dister.

¹¹ Ra zeuio an hini a gomz evel‐se, da gonsideri penaos, evel ma’z omp en hor c’homzou hag en hon lizerou, pa vezomp pell diouzoc’h, evel‐se ive ez omp en hon oberou, pa vezomp dirazoc’h.

¹² Rag na gredomp ket en em lakaad e renk darn, pere en em veul ho‐unan, nag en em gompari ganthe; ouz en em vuzuri ho‐unan dreizhe ho‐unan, hag ouz en em gompari ganthe ho‐unan, e tiskouezont n’ho deuz ket a skiant.

¹³ Mes evidomp‐ni, n’en em c’hlorifiomp ket en tu‐all d’ar pez a zo dleet; mes hervez ar muzul euz al loden roet deomp gant Doue, evit erruout beteg enoc’h.

¹⁴ Rag n’en em astennomp ket pelloc’h eged n’eo dleet, evel pa na vemp ket erruet beteg enoc’h, pa’z eo gwir ez omp arruet gant Aviel ar C’hrist.

¹⁵ Ni n’en em c’hlorifiomp ket en tu‐all d’ar pez a zo dleet, da lavaret eo, en labouriou ar re‐all; mes an esperans hon euz penaos, pa vezo cresket ho feiz‐c’houi, ez aimp kalz pelloc’h, el loden a zo bet merket deomp;

¹⁶ evit prezeg an Aviel er broiou a zo en tu‐all d’hoc’h hini; hep en em c’hlorifia euz ar pez a zo bet great dija en loden ar re all.

¹⁷ Koulskoude an hini a deu d’en em c’hlorifia, ra zeuio d’en em c’hlorifia, en Aotrou.

¹⁸ Rag n’e ket an hini en em recommand he‐unan a vez kavet mad, mes an hini a vez recommandet gant Doue.