1 Yann 4 - Testamant Nevez 1897 (Jenkins)

CHABISTR IV.

¹ Bugale muia‐karet, na gredit ket da bep spered, mes amprouvit ar sperejou, evit gouzoud hag int a zo a‐berz Doue; rag kalz a falsprofeted a zo deuet er bed.

² Anavezit Spered Doue en kement‐man: kement spered hag a anzav penaos Jesus‐Christ a zo deuet er c’hig, a zo a‐berz Doue;

³ ha kement spered ha na anzav ket ez eo Jesus‐Christ deuet er c’hig, n’eo ket a‐berz Doue. Hogen, hennes eo spered an Ante‐Christ, divarben pehini hoc’h euz klevet lavaret ema o tond, ha pehini a zo dija breman ebarz ar bed.

⁴ C’houi, bugaligou a zo euz a Zoue, hag hoc’h euz trec’het anezhe, rag an hini a zo enoc’h, a zo brassoc’h eged an hini a zo er bed.

⁵ Int a zo euz ar bed, dre‐ze e komzont hervez ar bed, hag ar bed a zelaou anezhe.

⁶ Ni a zo euz a Zoue; an hini a anavez Doue, a zelaou ac’hanomp; an hini n’eo ket euz a Zoue, na zelaou ket ac’hanomp: dre gement‐se ec’h anavezomp ar spered a wirionez hag ar spered a c’haou.

⁷ Bugale muia‐karet, en em garomp an eil egile; rag ar garantez a zeu euz a Zoue, ha kement hini a gar, a zo ganet euz a Zoue, hag a anavez Doue.

⁸ An hini na gar ket, n’hen deuz ket anavezet Doue, rag Doue a zo karantez.

⁹ Karantez Doue en hor c’henver a zo en em diskouezet dre ma hen deuz digasset Doue he Vab unic er bed, evit ma vevimp dreizhan.

¹⁰ E kement‐man ema ar garantez: n’e ket ni eo hon euz karet Doue, mes Doue eo hen deuz hor c’haret, hag hen deuz digasset he Vab, da eza eur sacrifis a adunvaniez evit hor pec’hejou.

¹¹ Bugale muia‐karet, mar hen deuz Doue hor c’haret evel‐se, ni a dle ive en em garet en eil egile.

¹² Den e‐bed n’hen deuz biscoas gwelet Doue; mar en em garomp an eil egile, Doue a choum enomp, hag he garantez a zo peur‐c’hreat enomp.

¹³ E kement‐man ec’h ouzomp penaos e choumomp enhan hag hen enomp, o veza ma hen deuz roet deomp euz he Spered.

¹⁴ Ha ni hon euz gwelet, hag e roomp testeni penaos an Tad hen deuz digasset ar Mab, Salver ar bed.

¹⁵ Piou‐benag a anzavo ez eo Jesus Mab Doue, Doue a choum enhan, hag hen en Doue.

¹⁶ Evidomp‐ni, hon euz anavezet ar garantez hen deuz Doue evidomp hag hon euz credet enhan: Doue a zo karantez; hag an hini a choum er garantez, a choum en Doue, ha Doue enhan.

¹⁷ E kement‐man eo peur‐c’hreat ar garantez enomp, evit ma hor bezo fizians en deiz ar varn; rag evel ma’z eo he‐unan, evel‐se ez omp ive er bed‐man.

¹⁸ Er garantez ne vez aoun e‐bed, mes ar garantez parfet a daol kuit an aoun; rag pa vez aoun, e vez ive eur bunition‐benag, hag an hini hen deuzaoun n’eo ket parfet er garantez.

¹⁹ Evidomp‐ni, ni a gar anezhan, abalamour ma hen deuz hor c’haret da genta.

²⁰ Mar d’euz unan‐benag hag a lavar: Me a gar Doue, ha mar deu da gasaad he vreur, hennes a zo eur gaouiad; rag an hini na gar ket he vreur hag hen o velet anezhan, penaos ec’h hell‐hen karoud Doue, pa na vel ket anezhan?

²¹ Hag ar gourc’hemenman hon euz bet diganthan: An hini a gar Doue ra zeui ive da garet he vreur.