1 Timote 3 - Testamant Nevez 1897 (Jenkins)

CHABISTR III.

¹ Ar gomz‐man a zo gwir: Mar deu unan‐benag da c’hoantaad ar garg a eskop, eun oeuvr vad meurbed eo a c’hoanta.

² Red eo eta da eun eskop beza didamal, pried da eur vreg hep‐ken, moderet, leun a evez, renket‐mad, prest da zigemer en he di, capabl da gelen;

³ arabat eo e vez douget d’ar gwin, na ter, na douget d’ar gounid dizhonest, mes dous, aketus da dec’het euz ar c’hannou, hag heb avaristed,

⁴ eun den hag a c’houarn mad he di, o terc’hel he vugale en doujans, gant pep honestis.

⁵ Rag mar d’euz unan‐benag ha na oar ket gouarn he di he‐unan, penaos ec’h hallo hen gouarn Iliz Doue?

⁶ Arabat eo e vez nevez convertisset, gant aoun, o veza c’houezet gant an ourgouil, na deufe da gweza e condaonation an diaoul.

⁷ Red eo ive hen defe testeni vad digant ar re a‐ziaveaz, gant aoun ne gwezfe, en dismegans hag en pech an diaoul.

⁸ Er memeus doare, ra vezo an diaconed tud poellec, hep tromplerez; arabat eo e vent douget d’ar gwin, na d’ar c’hounidegez disleal;

⁹ o terc’hel stard myster ar feiz gant eur goustians pur.

¹⁰ Ha ravezo ar re‐man ive eprouvet da genta: ha ma raint neuze ho c’harg, mar d’int didamal.

¹¹ Er memeus doare, ho gragez a dle beza merc’hed a zoare, diwall ouz an drouk‐prezegerez, beza fur, ha fidel en pep tra.

¹² Ra n’ho devezo an diaconed nemed eur vreg hep‐ken, o ren mad ho bugale hag ho ziez ho‐unan.

¹³ Rag ar re ho devezo great mad ar garg‐se, a c’hounez eur renk henorabl, hag eur fizians vraz er feiz a zo er C’hrist Jesus.

¹⁴ An traou‐man a scrivan d’id, oc’h esperout mond hep dale d’az kavout,

¹⁵ mes mar talean pell, evit ma ouezi penaos e tleer en em gomporti en ti Doue, pehini eo Iliz an Doue beo, ar pilier hag ar fount euz ar wirionez.

¹⁶ Hag, evel ma teu an holl d’hen anzav, braz eo ar myster euz ar biete: Doue a zo en em ziskouezet er c’hig, a zo bet justifiet dre ar Spered, gwelet gant an elez, prezeget d’ar Jentiled, credet er bed, ha savet er gloar.