1 Tesalonikiz 4 - Testamant Nevez 1897 (Jenkins)

CHABISTR IV.

¹ A‐hend‐all, breudeur, e pedomp, hag ec’h adpedomp ac’hanoc’h dre an Aotrou Jesus, evit, hervez ma hoc’h euz desket ganeomp penaos e tleit bale evit plijoud da Zoue, ma her greot muioc’h‐mui.

² Rag gouzoud a rit pe seurt gourc’hemenou hon euz roet deoc’h en hano an Aotrou Jesus;

³ rag setu aman bolontez Doue: ma veot rentet santel, ha ma en em virot ouz al libertinach,

⁴ ma teuio pep hini ac’hanoc’h da c’houzoud derc’hel he gorf er zantelez hag en honestis;

⁵ heb en em rei d’ar ioulou direiz, evel ar Jentiled, pere na anavezont ket Doue.

⁶ Diwallit na zeufe den da drompla he vreur, na da ober gaou ouz he nessa en afferou; rag an Aotrou eo an hini a denn venjans euz an holl draou‐ze, evel ma hon euz ive hen lavaret ha testeniet deoc’h dija.

⁷ Rag, Doue n’hen deuz ket hor galvet d’al louzdoni, mes d’ar zantelez.

⁸ Dre‐ze ’ta, an hini a ra disprij var gement‐man, n’e ket var eun den eo e ra disprij, mes var Doue, pehini hen deuz roet deoc’h ive he Spered‐Santel.

⁹ Evit ar pez a zell ar garantez euz an eil breur e kenver egile, n’hoc’h euz ket ezom e vez scrivet deoc’h; rag c’houi hoc’h‐unan a zo bet desket gant Doue d’en em garoud an eil egile;

¹⁰ ha kement‐se a rit ive e‐kenver an holl breudeur pere a zo en holl Vacedonia; mes ho pidi a reomp, breudeur, da greski mui‐ouz‐mui,

¹¹ ha da veza aketus da veva en peoc’h, da ober hoc’h afferou hoc’h‐unan, ha da labourat gant ho taouarn hoc’h‐unan, evel ma hon euz gourc’hemenet deoc’h;

¹² evit ma valeot gant honestis e‐kenver ar re a‐ziaveaz, ha ma n’ho pezo ezom a netra.

¹³ Hogen, na fell ket d’in, va breudeur, e vec’h heb deskadurez divarben ar re a zo maro, evit na veot ket tristeet, evel an dud all, pere n’ho deuz ket a esperans.

¹⁴ Rag mar credomp ez eo Jesus maro, hag ez eo resussitet, credomp ive penaos Doue a zigasso adare, dre Jesus, ar re a zo maro, evit beza assambles ganthan.

¹⁵ Rag ni a lavar an dra‐man deoc’h dre c’her an Aotrou, penaos ni, ar re veo pere a vezo choumet evit donedigez an Aotrou, ne vezimp ket araog ar re a zo maro;

¹⁶ rag an Aotrou he‐unan a ziskenno euz an env, pa vezo roet ar signal, gant mouez eun arc’h‐eal, ha gant eun drompil a Zoue; hag ar re varo er C’hrist a resussito dagenta;

¹⁷ goude‐ze, ni ar re veo pere a vezo choumet, a vezo savet assambles ganthe var goabrennou, da zialben an Aotrou, en ear, hag evel‐se e vezimp da viken gant an Aotrou.

¹⁸ Dre‐ze en em gonsolit an eil egile gant ar c’homzouman.