1 Pêr 5 - Testamant Nevez 1897 (Jenkins)

CHABISTR V.

¹ Pedi a ran ar re Ancien pere a zo en ho touez, me pehini a zo ive Ancien assambles ganthe, ha test euz a souffransou ar C’hrist, ha lodennec euz ar gloar a dle beza diskouezet:

² Messait denved Doue pere a zo en ho touez, o teuler evez varnezhe, nann dre fors, mes a volontez‐vad; nann evit eur c’hounidegez vil, mes dre garantez;

³ nann evel pa vijec’h mestr var ar re a zo bet fiziet enoc’h, mes o rei skouer vad dezhe.

⁴ Ha pa zeuio ar Pastor souveren, c’houi a recevo ar gurunen ziwenvus a c’hloar.

⁵ C’houi ive evel‐se, tud yaouank, en em zoumetit d’ar re ancien, hag o plega holl an eil d’egile, en em viskit a humilite; rag Doue a stourm ouz ar re ourgouillus, mes ober a ra trugarez d’ar re a zo humbl.

⁶ Plegit eta gant humilite dindan an dorn galloudus a Zoue, evit ma savo ac’hanoc’h pa vezo deuet an amzer;

⁷ o teurel varnezhan hoc’h hollzourciou, rag hen hen deuz sourci ac’hanoc’h.

⁸ Bezit sobr, beillit; rag hoc’h enebour, an diaoul, a ra an dro deoc’h, evel eul leon o iudal, o klask piou a hello da lounka.

⁹ Stourmit outhan, o choum stard er feiz, o c’houzout penaos ho preudeur, pere a zo er bed, a c’houzanv ar memeus poaniou.

¹⁰ Hogen, ra zeui an Doue a bep gras, pehini hen deuz hor galvet d’he c’hloar eternel en Jesus‐Christ, goude ma ho pezo gouzanvet eun neubeud, d’ho renta parfet, ferm, krenv ha stard en ho sa.

¹¹ Dezhan ar gloar hag ar galloud da viken! Amen.

¹² Scrivet em euz deoc’h e ber gomzou dre Silvanus, pehini a zo, evel mac’histiman anezhan, eur breur fidel, en eur exhorti ac’hanoc’h hag en eur assuri deoc’h penaos ar gwir c’hras a Zoue eo an hini en pehini e choumit stard.

¹³ An assamble euz ar re choazet a zo en Babylon, ha Marc va Mab, a zalud ac’hanoc’h.

¹⁴ En em zaludit an eil egile dre eur pok a garantez. Ar peoc’h ganeoc’h holl pere a zo en Jesus‐Christ! Amen.