1 Korintiz 2 - Testamant Nevez 1897 (Jenkins)

CHABISTR II.

¹ Evidoun‐me, breudeur, pa oun deuet d’ho kavout, n’e ket gant komzou gwisket kaer, na gant furnez ar bed, ez oun deuet da ziscleria deoc’h testeni Doue.

² Rag n’em euz klasket anaoud tra e‐bed en ho touez, nemed Jesus‐Christ, ha Jesus‐Christ crucifiet.

³ Bet oun va‐unan en ho touez er zempladurez, hag en aoun, ken a grenen.

⁴ Ha n’em euz ket impliet, en eur gomz hag en eur brezeg deoc’h, ar c’homzou eloquant euz a furnez ar bed, mes roet em euz preuvennou sclear euz ar spered hag euz ar galloud a Zoue;

⁵ evit ma teuje ho feiz da veza fountet, nann var furnez an den, mes var ar galloud a Zoue.

⁶ Hogen, prezeg a reomp ar furnez e‐touez ar re barfet, eur furnez ha n’eo ket euz ar bed‐man, nag euz a renerien ar bed‐man pere n’ho deuz galloud e‐bed;

⁷ mes prezeg a reomp furnez Doue, en eur myster, eur furnez hag a oa kuzet, hag a oa bet destinet a bep amzer gant Doue evit hor gloar,

⁸ ha n’eo bet anavezet gant hini euz a renerien ar bed‐man; rag ma ho divije he anavezet, n’ho divije ket crucifiet Aotrou ar gloar.

⁹ Mes, hervez ma’z eo scrivet, ar re‐man a zo traou ha n’hen doa na lagad an den ho gwelet, nag he skouarn ho c’hlevet, pere ne oant ket antreet en he galon, hag a oa bet preparet gant Doue evit ar re a gar anezhan.

¹⁰ Mes Doue hen deuz discleriet anezhe deomp dre he Spered; rag ar Spered a zont pep tra, memeus an traou dounna euz a Zoue.

¹¹ Rag piou a anavez ar pez a zo en den, nemed ar spered euz an den a zo enhan? Evelse ive ne anavez den ar pez a zo en Doue, nemed ar Spered a Zoue.

¹² Evidomp‐ni, n’hon euz ket recevet spered ar bed, mes ar Spered a zeu euz a Zoue, evit anaoud an traou a zo bet roet deomp gant Doue;

¹³ hag ho discleria a reomp nann gant ar c’homzou a zeu euz a furnez an den, mes gant ar re a zo desket deomp gant ar Spered‐Santel, hag e tisplegomp an traou spirituel d’ar re a zo spirituel.

¹⁴ Hogen, an den aneval na gompren ket an traou euz a Spered Doue; rag follentez int evithan, ha na hell ket ho anaoud, rag dre ar Spered a Zoue eo e ranker ho barna.

¹⁵ Mes an den spirituel a oar barna pep tra, ha n’ed eo barnet gant den.

¹⁶ Rag piou hen deuz anavezet mennoz an Aotrou evit galloud he gelen? Mes ni hon euz mennoz ar C’hrist.