1 Korintiz 16 - Testamant Nevez 1897 (Jenkins)

CHABISTR XVI.

¹ Evit ar pez a zell ar gest a rer breman evit ar zent, grit evel m’em euz gourc’hemenet d’an Ilizou euz a Galatia.

² D’an deiz kenta euz a bep sizun, ra lako pep hini ac’hanoc’h a‐gostez en he di eun dra‐benag, o tastum ar pez a hello, hervez he c’hounidegez, evit na vezo ket ar gest da ober, pa erruin.

³ Ha pa vezin erruet, me a gasso gant lizerou ar re ho pezo choazet, da gas ho tonezonou da Jerusalem.

⁴ Ha mar d’eo deread ez afen‐me ive va‐unan, e teuint assambles ganen.

⁵ Ouzpen, mond a rin d’ho kavout, goude ma em bezo tremenet dre ar Vacedonia; rag tremen a rin dre ar Vacedonia.

⁶ Ha marteze e choumin eur pennad amzer ganeoc’h, marteze zo‐ken da c’hoanvi, evit beza ambrouget ganeoc’h en pe leac’h‐benag ma’z in.

⁷ Rag ne fell ket d’in ho kwelet breman, en eur dremen; mes esperoud a ran choum ganeoc’h eur pennad amzer, mar permet an Aotrou.

⁸ Koulskoude e choumin en Ephesus beteg ar Pentecost;

⁹ rag eun nor vraz a zo digor d’in eno, gant esperans da c’hallout ober eun dra‐benag a vad; mes kalz a enebourien a zo.

¹⁰ Mardeu Timoteus, likit evez ma vezo heb aoun en ho touez, rag labourat a ra da œuvr an Aotrou, kerkoulz ha me va‐unan.

¹¹ Rag‐se diwallit ne deufe den d’hen disprija, hag ambrougit anezhan en peoc’h, evit ma teuio beteg enoun, rag ouz he c’hortoz emoun gant ar breudeur.

¹² Evit ar pez a zell Apollos, hor breur, hen pedet em euz stard da vond d’ho kavout gant ar breudeur; mes n’eo ket bet fellet dezhan mond breman; mes mond a raio pa gavo an occasion.

¹³ Beillit, choumit ferm er feiz, en em gomportit evel tud, creskit en nerz;

¹⁴ grit kement a reot gant karantez.

¹⁵ Breudeur, anaoud a rit famil Stephanas, ha gouzoud a rit penaos ez int ar c’henta‐frouez euz an Akaia, hag ez int en em roet ho‐unan da zervich ar Zent,

¹⁶ ho pidi a ran d’en em zoumeti d’ar seurt tud‐se, ha da gement hini a labour hag a gemer poan assambles ganeomp.

¹⁷ Joa em euz ma’z eo deuet Stephanas, ha Fortunatus, hag Akaikus, rag dalc’het ho deuz ho plas, pa ne oac’h ket aman;

¹⁸ rag krenveet ho deuz va spered hag hoc’h hini‐c’houi. Bezit eta leun a respet evit ar seurt tud‐se.

¹⁹ Illizou an Azi a zalud ac’hanoc’h. Akilas ha Priscilla, gant an Iliz a zo en ho zi, a zalud kalz ac’hanoc’h en Aotrou.

²⁰ An holl breudeur a zalud ac’hanoc’h. En em zaludit an eil egile dre eur pok santel.

²¹ Me, Paol, a zalud ac’hanoc’h gant va dorn va‐unan.

²² Mar d’euz unan‐benag ha na gar ket hon Aotrou Jesus‐Christ, ra vezo anathem, Maranatha! (Erru eo an Aotrou.)

²³ Gras hon Aotrou Jesus‐Christ ra vezo ganeoc’h.

²⁴ Va c’harantez a zo ganeoc’h holl en Jesus‐Christ! Amen.