1 Korintiz 12 - Testamant Nevez 1897 (Jenkins)

CHABISTR XII.

¹ Evit ar pez a zell an donezonou spirituel, breudeur, ne fell ket d’in e vec’h heb anaoudegez.

² Gouzoud a rit penaos pa oac’h Jentiled, e oac’h douget d’an idolou mud, hervez ma vijec’h renet.

³ Rag‐se e tisclerian deoc’h penaos den e‐bed, o komz dre Spered Doue, na lavar ez eo Jesus milliget, ha penaos den na hell lavaret eo Jesus an Aotrou, nemed dre ar Spered‐Santel.

⁴ Hogen, bez’ a zo meur a seurt donezon, mes n’euz nemed eur Spered hep‐ken.

⁵ Beza ez euz ive meur a seurt kargou mes n’euz nemed eun Aotrou hep‐ken;

⁶ ne labour ket er memeus feçon en holl, mes ar memeus Doue eo a ra pep tra en holl.

⁷ Hogen, an donezonou euz ar Spered a zo roet da bep hini evit mad an holl.

⁸ Rag da unan eo roet dre ar Spered komz ar furnez; da eun all komz ar wiziegez, dre ar memeus Spered;

⁹ unan all a receo ar feiz dre ar memeus Spered; unan all a receo digant ar memeus Spered an donezon da barea an dud klanv;

¹⁰ unan all, an donezon euz ar miraclou; unan all, ar brofesi; eun all ar galloud da anaoud ar sperejou; eun all ar galloud da gomz meur a seurt langach; hag unan all, an donezon da rei da intent al langachou.

¹¹ Mes eur Spered hep‐ken, hag ar memeus Spered, a ra an holl draou‐ze, en eur rei da bep hini he zonezonou, evel ma fell dezhan.

¹² Rag evel m’az eo ar c’horf unan, petra‐benag m’hen deuz kalz a izili; hag evel ma ne ra holl memprou ar c’horf‐se, petra‐benag ma’z int kalz, nemed eur c’horf hep‐ken, evel‐se ive e c’hoarvez gant ar C’hrist.

¹³ Rag badezet omp bet holl ebarz er memeus Spered, evit beza eur c’horf hep‐ken, ken Judevien, ken Greked, esclavourien ha tud libr; ha leuniet omp bet holl euz ar memeus Spered.

¹⁴ Rag n’eo ket bet great ar c’horf gant eun ezel hep‐ken, mes gant meur a hini.

¹⁵ Mar teufe an troad da lavaret: Pa n’e ket me eo an dorn, n’ed oun ket euz ar c’horf; daoust hag hen na vefe ket koulskoude euz ar c’horf?

¹⁶ Ha ma lavarfe ar skouarn: Pa n’e ket me eo al lagad, me n’ed oun ket euz ar c’horf; daoust ha ne vefe ket koulskoude euz ar c’horf?

¹⁷ Ma vije ar c’horf holl lagad, pe‐leac’h e vije ar c’hlevet? Ha ma vije holl klevet, pe‐leac’h e vije ar c’houessa?

¹⁸ Mes breman Doue hen deuz lakeat an izili, pep hini anezhe er c’horf, evel m’az eo bet plijet ganthan.

¹⁹ Ha c’hoas, ma ne vijent holl nemed eun ezel hep‐ken, pe‐leac’h e vije ar c’horf?

²⁰ Mes breman ez euz kalz a izili, hag eur c’horf hep‐ken.

²¹ Hag al lagad na hell ket lavaret d’an dorn: N’am euz ket a ezom ac’hanoud; na c’hoas ar pen d’an treid: N’am euz ket a ezom ac’hanoc’h.

²² Mes er c’hontrol, an izili euz ar c’horf hag a zeblant beza ar re zembla, a zo necesser.

²³ Hag ar re a gav deomp a zo an neubeuta henorabl euz ar c’horf, e reomp dezhe eun henor brassoc’h: en hevelep doare ma teu ar re divaloa, da gaoud ar brassa henor.

²⁴ Eleac’h ar re a zo deread n’ho deuz ket ezom a gement‐se; mes Doue hen deuz reizet ar c’horf assambles, en hevelep doare ma hen deuz roet mui a henor d’an hini a vanke henor dezhan;

²⁵ evit na vezo ket a zizunion er c’horf, mes m’ho devezo an izili ar memeus preder an eil evit egile.

²⁶ Evel‐se, mar souffr eun ezel, an holl izili a zouffr ganthan; ha pa vez henoret eun ezel, an holl izili a zo er joa assambles ganthan.

²⁷ Hogen, c’houi eo corf ar C’hrist, ha c’houi eo he vemprou, pep hini ac’hanoc’h.

²⁸ Ha Doue hen deuz lakeat en Iliz, da genta, an ebestel; d’an eil, ar brofeted; d’an trede, an doctored; neuze, ar re a ra miraclou; ha goude‐ze, ar re ho deuz an donezon da barea ar re glanv, da zicour, da c’houarn, da gomz meur a langach.

²⁹ Daoust hag int a zo holl ebestel? Daoust hag int a zo holl profeted? Daoust hag int a zo holl doctered? Daoust hag int a ra holl miraclou?

³⁰ Daoust hag int ho deuz holl an donezon da barea an dud klanv? Daoust hag int a gomz holl meur a langach? Daoust hag holl ec’h hellont ho rei da intent?

³¹ Hogen, klaskit a‐greiz ho calon kaoud an donezonou gwella, ha me a ia da ziskouez deoc’h eun hent excellantoc’h c’hoas.