1 Korintiz 10 - Testamant Nevez 1897 (Jenkins)

CHABISTR X.

¹ Ne fell ket d’in, breudeur, ec’h ignorfac’h penaos hon tadou a zo bet holl dindan ar goabren, hag ho deuz holl tremenet dre ar mor;

² hag ez int bet holl badezet en Moises ebarz er goabren hag er mor;

³ hag ho deuz holl debret euz ar memeus boued spirituel;

⁴ hag ho deuz holl evet euz ar memeus evach spirituel; rag eva a rent dour euz ar roc’h spirituel pehini a heullie anezhe, hag ar roc’h‐ze a oa ar C’hrist;

⁵ mes an darnvuia anezhe na oent ket agreabl da Zoue; rag kweza a rejont maro ebarz an dezert.

⁶ Hogen an traou‐ze a zo bet c’hoarvezet evit talvezoud da skouer deomp‐ni, evit ne c’hoantaimp ket traou fall, evel ma c’hoantaaz ar re‐ze.

⁷ Na deuit ket eta da veza idolatred, evel lod anezhe, hervez ma’z eo scrivet: Ar bobl a azezaz evit dibri hag eva, hag e savjont da zansal.

⁸ Diwallomp da gweza er pec’hed hudur, evel ma reaz lod anezhe; hag e perissaz tri mil var n’ugent anezhe er memeus dervez.

⁹ Ha diwallomp da denti ar C’hrist, evel ma reaz lod anezhe; hag e oent distrujet gant ar serpanted.

¹⁰ Ha na vurmurit ket, evel ma reaz darn anezhe; hag e oent lakeat da berissa gant an eal distrujer.

¹¹ Hogen, an holl draouze a c’hoarvezaz ganthe evit servichoud da skouer; ha scrivet int bet evit hor c’helen, ni pere a zo erru var fin an amzeriou.

¹² Rag‐se, an hini a gred beza en he za, diwallo da gweza.

¹³ N’eo c’hoarvezet ganeoc’h tentation e‐bed, hag a vez bet dreist nerz an den. Hogen, Doue a zo fidel, ha na bermeto ket e vec’h tentet en tu‐all d’ho nerz; mes gant an dentation e tiskouezo ive an hent da zond er meaz anezhi, evit ma c’hellot he anduri.

¹⁴ Rag‐se, va muia‐karet, tec’hit diouz an idolatriach.

¹⁵ Komz a ran deoc’h evel ouz tud a skiant; barnit hoc’hunan ar pez a lavaran.

¹⁶ Ar c’halir a vennoz pehini a vennigomp, ha n’eo‐hen ket ar gommunion e goad ar C’hrist? Ar bara a doromp, ha n’eo‐hen ket ar gommunion e corf ar C’hrist?

¹⁷ Evel ma n’ez euz nemed eur bara hep‐ken, ni, evidomp da veza kalz, n’ed omp nemed eur c’horf hep‐ken; rag holl hon euz lod er memeus bara.

¹⁸ Sellit ouz Israel hervez ar c’hig; ar re a zebr ar sacrifisou, ha n’ho deuz‐hi ket communion gant an aoter?

¹⁹ Petra a lavaran‐me eta? ez eo an idol eun dra‐benag? pe, ez eo ar pez a zo sacrifiet d’an idol eun dra‐benag?

²⁰ Nann; mes lavaret a ran, penaos ar pez a vez sacrifiet gant ar Jentiled, her sacrifiont d’an drouk‐sperejou, ha n’e ket da Zoue. Hogen, na fell ket d’in e teufac’h d’en em unani gant an drouk‐sperejou.

²¹ Na hellit ket eva calir an Aotrou, ha calir an drouk‐sperejou; na hellit ket kaoud lod euz a daol an Aotrou, hag euz a daol an drouk‐sperejou.

²² Ha c’hoant hon euz‐ni da lakaad ar jalouzi da zevel e calon an Aotrou? Ha krenvoc’h ez omp‐ni egethan?

²³ An holl draou a zo permetet d’in, mes pep tra n’eo ket talvoudec; an holl draou a zo permetet d’in, mes pep tra na zervich ket da edification.

²⁴ Ra zeuio pep hini da glask avantach ar re all, ha nann he hini he‐unan.

²⁵ Debrit euz a gement a verzer er gigerez, hep goulen tra e‐bed, evit ar pez a zell ar goustians;

²⁶ rag: An douar, ha kement a zo enhan, a zo d’an Aotrou.

²⁷ Mar deu eun den difeiz d’ho pedi, ha mar fell deoc’h mond, debrit euz a gement a vezo lakeat dirazoc’h, hep goulen tra e‐bed evit ar pez a zell ar goustians.

²⁸ Mes mar deu unan‐benag da lavaret deoc’h: An dra‐man a zo bet sacrifiet d’an idolou; na zebrit ket, abalamour d’an hini hen deuz hoc’h avertisset, hag abalamour d’ar goustians; rag: An douar, ha kement a zo enhan, a zo d’an Aotrou.

²⁹ Hogen, ar goustians a lavaran‐me, n’e ket da hini‐te, mes coustians egile; rag perag e vefe condaonet va liberte‐me gant coustians unan‐all?

³⁰ Ha mar debran gant action a c’hras, perag e vezin‐me tamallet deuz eun dra evit pehini e rentan grasou.

³¹ Pe c’houi eta a zebro, pe c’houi a evo, pe c’houi a rai eun dra all‐benag, grit pep tra evit gloar Doue.

³² Na roit skouer fall da zen e‐bed, na d’ar Judevien, na d’ar Greked, na da Iliz Doue;

³³ evel‐se e ran va‐unan, o klask plijoud d’an holl e pep tra, hep klask va avantach va‐unan, mes hini ar re all, evit ma vezint salvet.