YOBA 10 - Jinghpaw Common Language Bible 2009

¹ Ngai gaw asak hkrung nga ai hta hki ba nga nngai. Nye a ahkup ahka nga ai aput angun ga hpe madat ya e.

² Karai Kasang e, ngai hpe hkum daw dan e. Ngai hpe hpa baw mara shagun na n ta? Ngai hpe tsun dan e law!

³ Na a matu grai di gumshem ai gaw jaw a ni? Nang nan hpan da ai arai hpe hpa majaw yu matsat kau n ta? N hkru ai masha ni a yaw shada ai lam ni hta hpa majaw yu myit dik nga n ni?

⁴ Anhte galaw ai amu ni hpe nang mu n ni?

⁵ Na a asak gaw anhte zawn kadun nga a ni?

⁶ Nng gaw nye a yubak mara yawng hpe hpa majaw hkan tam n ni? Ngai shut kau ai mara shagu hpe hpa majaw hkan sawk yu n ni?

⁷ Ngai mara n lu nga nngai mung, na a lata kaw na ngai hpe kadai n hkye la lu ai hpe mung nang chye nga ndai.

⁸ Na a lata hte ngai hpe hpan da nna hkrang shapraw da nga ndai, ya chyawm gaw dai lata hte nan ngai hpe shamyit kau nga ndai.

⁹ Nang gaw ngai hpe kagam ga hte hpan da nga ndai hpe dum u; ngai hpe ga nhpu de bai nhtang wa shangun na a ni?

¹⁰ Ngai hpe shaprat na matu nye wa hpe nang n-gun bang ya nit dai; nang gaw ngai hpe nye nu a hkritung hta kaba wa shangun nga ndai.

¹¹ Nye a hkum hkrang hpe nrut nra hte lasa ni hte nang shachyaw nna; nra hpe lasa shan hte ahpyi ni hte jahpring da nga ndai.

¹² Nang gaw asak hte dinggrin tsaw ra myit hpe jaw ya ndai; nang lanu lahku ai a majaw ngai hkrung nga lu nngai.

¹³ Rai ti mung, ya chyawm gaw aten shagu ngai hpe machyi hkra shangun na matu mayun mayaw maw mawn nga ndai hpe ngai chye ni ai.

¹⁴ Ngai yubak galaw yang, nang ngai hpe azi yu ndai; ngai hpe mara dat ya na nang n hkraw nga ndai.

¹⁵ Ngai shut hpyit mara galaw ai shaloi jang, ngai hta ru yak tsin-yam hkrum nngai, rai ti mung, jaw ai amu hpe ngai galaw ai shaloi, ngai gaw arawng sadang hkam la lu ai n rai. Ngai gaw nni nkri hte kaya kahpa e htinggrum da hkrum nga nngai.

¹⁶ Ngai hta awng dang ai lam loi mi lu la yang, hkanghkyi zawn nang ngai hpe gyam nna ngai hpe nni nkri jahkrum na nga, mauhpa amu ni hpe pyi nang galaw ndai.

¹⁷ Nang gaw ngai hpe mara shagun na sakse nkau mi tut nawng lu ndai; na a masin kahtet ai gaw ngai hpang maga de grau grau law wa nga ai; nang gaw gasat ladat nnan tut nawng maw mawn nga ndai.

¹⁸ Karai Kasang e, nang hpa majaw ngai hpe shangai dat n ta? Ngai gaw kadai mung ngai hpe garai n mu yang si mat ang ni ai.

¹⁹ Nu a kan kaw nna pru wa nhtawm lup sung hku de dingyang sa mat wa ai gaw galoi mung n nga yu ai wa zawn kaja mai nga ai.

²⁰ Nye a asak gaw ganoi lai mat wa sai n rai ni? Ngai hpe hkrai kau da e! Ngai hpe aten mi kabu gara shangun na, ngai hpe hkrai tawn da e law.

²¹ Ngai gaw kade n na yang sa mat wa nna galoi mung nhtang wa na n rai- dai shara gaw nsin hte myit kaji garen re ai ga,

²² sin mak ai, si ai shingnip hte kashuk kashak nga ai ga, nhtoi hkum nan sin ai shara rai nga ai.