TARA AGYI 16 - Jinghpaw Common Language Bible 2009

Gaza Mare E Nga Ai Samson

¹ Lani mi na aten hta, Samson gaw Hpilisti mung na Gaza mare de sa wa wu ai; dai yang e shawa num langai mi hte hkrum nna shi kaw shang nga wu ai.

² Dai yang e Samson nga nga ai hpe Gaza masha ni chye ma ai shaloi, shanhte gaw dai shara hpe wang da nhtawm mare chyinghka e shana tup shi hpe la ma ai. Shanhte gaw shana tup asim sha nga nhtawm, “Shi hpe nhtoi htoi ai aten du hkra la ga, dai hpang she shi hpe sat kau ga,” ngu nna shanhte myit yu let tsun ma ai.

³ Rai ti mung, Samson chyawm gaw yuptung du hkra sha yup ra e nga nga wu ai. Dai hpang shi rawt nna mare chyinghka hpe hkadun ni, shadaw ni, htinggrang hte yawng mayawng hte hpe baw la nhtawm shi a lahpa hta mara nna Hebron mare hpe praw rai mu mada lu ai kawng pungding de lung wa ai lam de hpai tawn kau wu ai.

Samson Hte Delila

⁴ Samson gaw Sorek Kadit e nga ai Delila mying ai num langai mi hpe tsaw ra wu ai.

⁵ Hpilisti hkawhkam manga hte gaw dai num kaw sa nhtawm, “Hpa rai shi n-gun kaba rawng ai mung, anhte shi hpe kaning rai padang dip lu na mung, shi hpe gyit nna shi hpe hpa n di shangun lu hkra re ai lam nang hpe tsun dan lu hkra Samson hpe hpaji daw yu u. Anhte langai hte langai mung nang hpe gumhpraw hkying mi latsa tsa jaw na ga ai,” ngu nna tsun ma ai.

⁶ Dai rai nna Delila mung Samson hpe, “Nang hpe kaning rai n-gun grai shaja ya ai lam ngai hpe chyeju hte tsun dan e. Marai langai ngai nang hpe gyit nna nang hpa n di lu hkra kaning rai galaw lu na rai nga a ta?,” ngu nna tsun wu ai.

⁷ Samson gaw, “Garai n hkraw mat ai ndan sumri nnan sanit hte ngai hpe gyit hkang yang, ngai gaw masha gale ni zawn n-gun kya mat na ra ai,” ngu nna htan wu ai.

⁸ Dai rai nna Hpilisti hkawhkam ni gaw garai n hkraw mat ai ndan sumri nnan sanit Delila hpe la sa ya ma ai rai nna shi gaw Samson hpe gyit tawn wu ai.

⁹ Shi gaw lasha nkau mi hpe kaga gawk kata e la nga shangun nhtawm shi gaw, “Samson e! Hpilisti masha ni du mara ai law!,” ngu nna jahtau tsun dat wu ai. Rai ti mung shi chyawm gaw dai ni hpe wan hkra yang saman ri di mat ai zawn dai ndan sumri ni hpe gang di kau wu ai. Dai rai nna shi a n-gun ip da ai lam hpe shanhte n chye ya ma ai.

¹⁰ Delila gaw Samson hpe, “Yu u, nang ngai hpe teng man ai lam n tsun dan ai sha ngai hpe mana shachyoi kau nga nit dai. Marai langai ngai nang hpe kaning rai gyit la lu na lam ngai hpe chyeju hte tsun dan e,” ngu nna tsun wu ai.

¹¹ Shi gaw dai numsha hpe, “Shanhte gaw galoi mung garai n lang yu ai sumri nnan hte ngai hpe gyit hkang da ai rai yang, ngai gaw masha gale zawn n-gun kya mat na rai nngai,” ngu nna htan wu ai.

¹² Delila gaw sumri nnan ni hpe la nhtawm, shi hpe gyit tawn wu ai. Dai hpang shi gaw, “Samson e! Hpilisti masha ni sa wa mara ai law!,” ngu nna jahtau tsun wu ai. Lasha ni gaw kaga gawk hta ala nga ma ai. Rai ti mung shi chyawm gaw shi a lahpum na sumri ni hpe saman ri ni hpe zawn gang di kau wu ai.

¹³ Delila gaw Samson hpe, “Nang gaw ngai hpe mana naw shachyoi nna teng man ai lam ngai hpe n tsun dan nga ndai. Marai langai ngai nang hpe kaning rai gyit la lu na lam ngai hpe tsun dan e,” ngu nna tsun wu ai. Shi chyawm gaw, “Nye a kara majaw sanit hpe da shan hta da bang nna shangang da ai rai yang, masha gale zawn ngai hta n-gun kya mat na rai nngai,” ngu nna htan wu ai.

¹⁴ Delila gaw shi hpe shayup da nhtawm, kara majaw sanit hpe la nna da lim hte da bang shangang nhtawm, “Samson e! Hpilisti masha ni sa wa mara ai law!,” ngu nna jahtau tsun wu ai. Rai ti mung shi rawt hprang wa nna da lang hta da bang da ai shi a kara hpe gang malaw mat wa wu ai.

¹⁵ Dai rai nna Delila gaw shi hpe, “Nang gaw de a lachyum n tsun dan ai mi, ngai hpe nang tsaw ra ai ngu nang kaning rai tsun lu na rai ta? Nang gaw ngai hpe masum lang mana shachyoi kau nit dai. Shing rai ya du hkra nang hpe n-gun grai ja shangun ai lam ngai hpe n tsun dan nga ndai,” ngu nna tsun wu ai.

¹⁶ Delila mung shi hpe lani hte lani sha asan nga wu ai rai nna dai lam a majaw shi aput shaja ai hpe na pu ai majaw

¹⁷ shi gaw hpang jahtum e, teng man ai lam tsun dan kau wu ai. Shi gaw, “Ngai gaw shangai wa ai aten kaw nna Nazari langai zawn Karai Kasang hta ap nawng da hkrum ai wa rai nga nngai majaw nye a kara hpe galoi mung n rep kau we ai. Nye a kara hpe rep kau jang masha gale zawn nye a n-gun daw mat nna kya mat na rai li ai,” ngu nna tsun wu ai.

¹⁸ Delila gaw dai teng man ai lam tsun dan nu ai hpe chye jang Hpilisti hkawhkam ni hpang de shiga shana dat nhtawm, “Ya kalang mi naw nhtang sa marit; shi gaw ngai hpe teng man ai lam tsun dan nu ai,” ngu nna tsun wu ai. Shaloi shanhte mung gumhpraw gun let sa wa ma ai.

¹⁹ Delila gaw Samson hpe shi a lahpyen e shayup da nhtawm masha langai mi hpe shaga la let shi a kara majaw sanit gadoi kau ya wu ai. Shi a n-gun daw mat salu ai majaw Delila shi hpe adip arip di zingri hpang wa nu ai.

²⁰ Dai hpang shi gaw, “Samson e! Hpilisti masha ni sa wa mara ai law!,” ngu nna jahtau tsun wu ai. Shi yup hprang wa nna, “Shi gaw shawoi na zawn ndut ndang hprawng pru mat wa we ga,” ngu nna myit yu wu ai. Shi chyawm gaw dai Madu shi hpe tawn kau da nu ai hpe n chye da wu ai.

²¹ Hpilisti masha ni shi hpe rim la nhtawm shi a myi achyaw baw kau ya ma ai. Shanhte gaw Gaza mare de shi hpe woi wa nna magri mang saidawng sumri hte shi hpe gyit tawn let htawng kata e htumrin rin shangun ma ai.

²² Rai ti mung shi a kara bai tu hpang wa nga wu ai.

Samson Si Mat Ai

²³ Hpilisti hkawhkam ni gaw shanhte a hpara Dagon hpe shagu hkungga kaba nawng jau na hte padang poi galaw na matu zup hpawng ma ai. Shanhte gaw, “Anhte a hpara gaw anhte a gumlau hpyen Samson hpe dang kau lu ai awng padang ninglaw jaw ya mi ai!,” ngu nna mahkawn shakawn ma ai.

^24-25 Shanhte gaw shanhte hkum nan kabu gara nga ma ai rai nna, “Samson hpe shaga dat mu, shi hpe anhte a man e mani hpa galaw shangun ga!,” ngu nna shanhte tsun ma ai. Shanhte gaw Samson hpe htawng kaw na woi shapraw wa ma ai shaloi shanhte gaw shi hpe mani asawng shangun ma ai hte shi hpe shadaw lapran e tsap shangun da ma ai. Mung masha ni shi hpe mu ai shaloi, shanhte a hpara hpe, “Anhte a hpara gaw anhte a mungdan hpe jahten kau nna anhte a masha law law hpe sat kau nu ai gumlau hpyen hpe dang kau lu ai awng padang ninglaw anhte hpe jaw mani ai!,” ngu nna mahkawn shakawn ma ai.

²⁶ Samson gaw shi hpe lata hte woi sa wa ai lasha hpe, “Nta dawhpum shadaw ni hpe hkra shangun e; dai ni hta ngai shamyet mayu nngai,” ngu nna tsun wu ai.

²⁷ Dai nta hta numsha lasha ni hte hpring chyat nga ai; Hpilisti hkawhkam manga hte mung dai yang e lawm nga ma ai rai nna de a ntsa htap hta numsha lasha hkying masum daram gaw Samson galaw dan ai mani hpa hpe yu na matu de nga ma ai.

²⁸ Samson gaw, “Tsaw Htum ai Madu e, chyeju hte ngai hpe dum e law; myi lahkawng maga malawk kau ya ai Hpilisti masha ni hpe lang lata matai htang lu n-ga, Karai Kasang e, chyeju hte ngai hpe lang mi sha gaw n-gun naw jaw ya e law,” ngu nna hpyi shaga wu ai.

²⁹ Samson gaw nta dawhpum ngu na ka-ang na shadaw lahkawng hpe apai ahkra di nna lata hte ahpum da nhtawm dai ni hpe shi kanawng dat let,

³⁰ “Hpilisti masha ni hte rau ngai si wa ni ga!,” ngu nna jahtau tsun wu ai. Shaloi shi a n-gun atsam mahkra hte kanawng dat wu ai shaloi, dai nta gaw hkawhkam manga ni a ntsa e mung, dai hta rawng marawng masha shagu hte a ntsa e mung daw agrawp gamyet bun nga ai. Shi naw hkrung nga yang sat kau lu ai hta shi si ai shani Samson sat kau ai masha gaw grau law nga ai.

³¹ Shi a kanau ni hte shi a dinghku masha ni yu sa nna si mang sa hpai la ma ai. Shanhte gaw shi hpe la wa nhtawm Zoara hte Eshtaola lapran na kawa Mano a lup hta shi hpe lup makoi da ma ai. Shi gaw Israela hpe hkun ning tup woi awn lai wa yu nu ai.