SHINGRAN 7 - Jinghpaw Common Language Bible 2009

Israela Amyu Masha Jahpan 144,000 A Lam

¹ Dai hpang lamu kasa mali gaw, lamu ga jut mali hta tsap nga nna, ga ntsa e mung, panglai ntsa e mung, hpun magup a ntsa e mung, nbung n bung bun lu hkra, ga man mali maga de na nbung ni hpe manat shingdang da nga ai gaw, ngai mu nngai.

² Bai, ahkrung nga ai Karai Kasang a dazik lang tawn da ai lamu kasa langai mi sinpraw maga de nna pru lung wa ai hpe ngai mu nngai. Shi gaw lamu ga hte panglai hpe jahten shaza kau na ahkang jaw da hkrum ai lamu kasa mali hpe,

³ “Anhte a Karai Kasang a shangun ma ni a lahtan ni hta e dazik masat garai n shakap kap gaw, aga hpe mung, panglai hpe mung, hpun ni hpe mung, garai hkum zingri myit,” nga nna nsen kaba hte jahtau tsun wu ai.

⁴ Lahtan ni hta Karai Kasang a dazik masat shakap da sai dai masha ni gaw, 144,000 rai nga ma ai lam ngai hpe tsun dan ni ai. Dai ni gaw Israela kashu kasha amyu dap shi lahkawng hta na,

⁵ Yuda amyu hta na mun mi hkying lahkawng, Rubin amyu hta na mun mi hkying lahkawng, Gad amyu hta na mun mi hkying lahkawng,

⁶ Ashe amyu hta na mun mi hkying lahkawng, Naphtali amyu hta na mun mi hkying lahkawng, Manashe amyu hta na mun mi hkying lahkawng,

⁷ Simun amyu hta na mun mi hkying lahkawng, Lewi amyu hta na mun mi hkying lahkawng, Yisahka amyu hta na mun mi hkying lahkawng,

⁸ Zebulun amyu hta na mun mi hkying lahkawng, Yosep amyu hta na mun mi hkying lahkawng, Benyamin amyu hta na mun mi hkying lahkawng, dazik shakap ai hkam la masai,

Masha Wunawng Wuwa Kaba

⁹ Dai hpang ngai yu dat yang, dai masha ni yawng mayawng hpe kadai mung n dang hti lu ai masha wunawng wuwa kaba langai mi hpe dai yang e ngai mu nngai. Shanhte gaw masha amyu baw shagu hta na mung, amyu shagu hta na mung, amyu mungdan shagu hta na mung, ga amyu shagu hta na mung, sa du ai ni rai nga ma ai. Dai ni gaw hpraw ai hpun palawng bu hpun nna, shanhte a lata ni hta tsanlun lakung ni hpe lang let, dai tingnyang a man e mung, Sagu Kasha a man e mung tsap nga ma ai.

¹⁰ Shanhte gaw nsen kaba hte, “Hkye hkrang la ai lam gaw, tingnyang hta dung nga ai anhte a Karai Kasang hte Sagu Kasha kaw na rai nga ai law!,” nga nna jahtau ma ai.

¹¹ Bai, lamu kasa ni yawng mayawng mung, salang ni hte dusat amyu mali hte mung, dai tingnyang hpe shinggrup nna tsap nga ma ai. Shaloi shanhte gaw dai tingnyang nhpang e shanhte a myi man dagup nna, Karai Kasang hpe nawku let,

¹² “Amen! Shakawn kungdawn ai, hpung shingkang, hpaji byeng-ya, chyeju dum shakawn ai, arawng sadang, hpung dagu hte n-gun lagaw gaw, htani htana prat dingsa e anhte a Karai Kasang kaw anga nga u ga law, Amen,” nga nna tsun ma ai.

¹³ Shaloi salang ni hta na langai mi gaw, “Ndai hpun palawng ahpraw bu hpun ai masha ni gaw kadai ni rai nga ma ta? Kanang nna pru wa ai ni rai ma ta?,” nga nna ngai hpe san ai.

¹⁴ Ngai gaw, “Nye a Madu e, ngai n chye nngai, nang gaw chye nga ndai,” ngu nna htan we ai. Shaloi shi gaw, “Shanhte gaw hkrit hpa zingri zingrat hkrum ai kaw na lawt pru wa ai masha ni rai nga ma ai. Shanhte gaw tinang a hpun palawng ni hpe dai Sagu Kasha a asai hta hkrut jahpraw la manu ai.

¹⁵ Dai re ai majaw, shanhte gaw Karai Kasang a tingnyang man e ningngai nga lu na ma ai hte, shi a nawku htingnu hta shani shana shi hpe nawku daw jau nga ma ai. Tingnyang hta dung nga ai wa mung, shanhte hte rau nga nga nna shanhte hpe makawp maga na ra ai.

¹⁶ Shanhte gaw galoi mung kawsi hpang gara n hkrum na masai. Jan a shingna mung, hpa kang kahtet ai mung shanhte hpe hkru kau lu na n rai.

¹⁷ Hpa majaw nga yang, tingnyang ka-ang e nga ai Sagu Kasha gaw, shanhte a sagu rem wa tai na ra ai, rai nna, asak hka hpawk du hkra shanhte hpe lam madun na ra ai. Karai Kasang mung, shanhte a myi ni hta na myi prwi yawng tsai hkra katsut kau ya na ra ai,” ngu nna ngai hpe tsun ai.