SHINGRAN 11 - Jinghpaw Common Language Bible 2009

Sakse Lahkawng

¹ Dai hpang lamu kasa gaw, shadawn nren zawn san ai shingna langai mi ngai hpe jaw nna, “Rawt u, Karai Kasang a nawku htingnu hpe mung, tawn hkungri hpe mung shadawn u, nawku htingnu e nawku nga ai ni hpe mung hti yu u.

² Rai ti mung, dai htingnu a shinggan wang hpe gaw hkum shadawn et, hpa majaw nga yang, dai gaw maigan masha ni hpe ap ya kau ngut sai rai nna, shanhte gaw dai Chyoi Pra Ai Mare hpe shata mali shi lahkawng tup kabye dip da na mara ai.

³ Bai, nye a sakse yan lahkawng hpe ngai shangun dat na mawe ai rai nna, shan gaw lachyit nba bu hpun let nhtoi 1,260 ya tup Karai Kasang a mungga hpe myihtoi ga hku hkaw tsun na mara ai.

⁴ Dai sakse lahkawng gaw lamu ga Madu a man e jung tawn da nga ai tsanlun hpun lahkawng hte pyengdin shadun lahkawng rai nga ma ai.

⁵ Masha langai ngai shan hpe hpyen na hkyen ai shaloi, shan a n-gup hta na wan pru nna, hpyen ni hpe hkru kau shangun mu ai. Shanhte hpe hpyen na matu shakut ai ni nga manga gaw ndai hku nna sat kau ai hkrum na rai ma ai.

⁶ Shan gaw dai Karai Kasang a mungga htawn tsun myihtoi htoi ai nhtoi hte hta, marang n htu lu u ga, lamu hpe pat kau na ahkang lu ma ai; hka hpe sai shatai kau na ahkang mung, shan gaw tinang ra ai ten shagu hta mungkan ga hpe ana zinli amyu shagu hte tsin-yam dat na ahkang mung lu ma ai.

⁷ Shan lahkawng tinang hkaw tsun ndau ai amu ngut mat ai shaloi, sung htum ai shara na pru lung wa ai matse labye gaw, shan hpe gasat dang kau nna sat kau na ra ai.

⁸ Shan a moi mang gaw shan a Madu jen sat hkrum ai mare kaba a nmaw lam hta taw nga na ra ai. Dai mare a kumla ga hku shamying ai mying gaw Sodom mare shing n rai Egutu rai nga ai.

⁹ Shaloi amyu mungdan shagu hta na amyu lakung ni, ga amyu myu shaga ai ni, amyu bawsang ni gaw, shan a moi mang hpe lup makoi na ahkang n jaw ai sha masum ya e chyingdaw mi tup sa hpu yu nga na mara ai.

¹⁰ Ga ntsa e nga ai masha ni gaw, dai myihtoi lahkawng si ai majaw, kabu gara rai nna shada da kumhpaw kumhpa ni galai jaw chyai rai, poi galaw na mara ai; hpa majaw nga yang, dai myihtoi yan gaw ga ntsa e nga ai masha amyu ni hpe nni nkri grai jahkrum yu masai rai nga ai.

¹¹ Ya dai nhtoi masum ya e chyingdaw mi lai jang, Karai Kasang kaw nna jahkrung ya ai nsoi nsa shan hta shang wa nna, shan gaw jan rai, rawt tsap ma ai; shan hpe mu mada ai ni gaw, nachying hkrit gari nga ma ai.

¹² Dai hpang myihtoi yan gaw, “Nang de lung wa marit,” nga nna lamu de na shaga ai nsen kaba langai mi na mu ai; shan a hpyen ni sin yu nga yang, sumsing lamu de sumwi jawn nna lung mat wa ma ai.

¹³ Dai ahkying hta e nnang nawn kaba nawn wa nna, dai mare htam shi hta na htam mi hten mat nna, masha hkying sanit si lawm mat ai. Naw ngam nga ai masha ni chyawm gaw hkrit kajawng ai hte sumsing lamu na Karai Kasang a galu kaba ai arawng sadang hpe shakawn shagrau nga ma ai.

¹⁴ Lahkawng ngu na dingnye gaw lai mat wa sai, rai ti mung masum ngu na dingnye gaw alawan du na ra ai.

Sanit Ngu Na Pahtau

¹⁵ Dai hpang sanit ngu na lamu kasa gaw shi a pahtau dum dat wu ai. Shaloi sumsing lamu hta e nsen kaba ngoi pru wa ai gaw, “Mungkan ga na mungdan hpe up na ahkang aya gaw, anhte a Madu Meshia a lata de rai nga sai rai nna, shi gaw htani htana prat dingsa e a up nga na sai law!,” nga nna tsun nga ai.

¹⁶ Shaloi, Karai Kasang a man e tinang a tingnyang ni hta dung nga ai salang hkun mali gaw, ga de gum dagup kadawng taw let Karai Kasang hpe nawku nna,

¹⁷ “Ya prat e, htawm hpang prat e dinggrin anga nga ai chyahtum chyalai n-gun rawng ai Madu Karai Kasang e, Nang gaw, na a daru magam atsam hpe lang nna mungkan hpe up hkang nga nit dai majaw, anhte nang hpe chyeju shakawn ga ai law!

¹⁸ Na a pawt sindawng ai aten ladaw mung, si ai ni hpe tara dara na aten ladaw mung, ya aten hta du ra ai majaw, masha amyu ni n yun bu nga masai. Na a shangun ma myihtoi ni hpe mung, na a amyu masha ni hpe mung, nang hpe hkrit hkungga ai kaji kaba ni hpe mung, shabrai shagrau sha-a na aten hte lamu ga hpe jahten shabyak kau ai ni hpe jahten shabyak kau na nhtoi du ra ai law!,” nga nna tsun nga ma ai.

¹⁹ Dai shaloi sumsing lamu hta e Karai Kasang a nawku htingnu hpaw malang wa nna, nawku htingnu kata na, shi a ga shaka hte seng ai sumpu hpe ngai mu nngai. Dai hpang myihprap gala ai, nsen kadu ai, mu ngoi ai, nnang nawn hte sin marang kaba byin wa ai.