Shawlumon A Mahkawn Ga 5 - Jinghpaw Common Language Bible 2009

Lasha

¹ Nye a nja jan, nye a num nnan e, ngai gaw nye a sun de shang ni ai. Ngai gaw manam pyaw ai namji namya ni hte mura ni hpe shinggyin la nngai; lagat ntsin hte gitbaw hpe ngai sha nna, sabyi ntsin hte ngachyu hpe ngai lu nga nngai. Tsaw ra ni e, nanhte gaw tsaw ra myit hte lu nang mat ai aten du hkra lu lu sha sha rai nga mu!

Numsha Mali Ngu Na Mahkawn

² Ngai yup pyaw nga yang, nye a myit masin hprang nga li ai. Chyinghka akawk nga ai nye a tsaw ra wa hpe ngai yup mang mu nngai. Nye a tsaw, nye a nja jan hte nye a hkrudu e, ngai shang wa n-ga. Nye a baw gaw numri hte madi nga ai; nye a kara mung saiwan hte bam nga ai.

Lasha Numsha

³ Ngai gaw ntsa palawng raw kau se ai; ngai hpa majaw bai hpun na rai ta? Ngai gaw lagaw shin da ni ai; ngai hpa majaw bai a gang kau na rai ta?

⁴ Nye a tsaw ra wa gaw shi a lata hte chyinghka jum da nga ai; shi ani sha nga ai majaw nye a masin htuk htak mat nngai.

⁵ Shi hpe shang wa shangun na matu ngai shajin da nngai. Nye a lata ni hta mura sau chya da nngai, ngai gaw chyinghka htinggrang hpe jum da nga yang, nye a lata layung ni hta na mura sau kapya nga ai.

⁶ Nye tsaw ra a matu ngai chyinghka hpaw dat nngai, rai ti mung shi hkawm mat wa sanu hka! Shi a nsen hpe ngai kade sha na mayu nga n hka! Ngai shi hpe tam yu tim, n mu tam lu ni ai; shi hpe shaga tim, shi htan ya na matu na ai n rai.

⁷ Mare sin hkawm ai ni ngai hpe mu nna, ngai hpe kayat jahpye mi ai; mare bunghku sin langa ni nye a palawng hpe gang je kau ya ma ai.

⁸ Yerusalem numsha ni e, ngai hpe ga sadi jaw mi, nanhte rai nna nye a tsaw ra hpe mu myit yang, sumtsaw myit machyi ai a majaw ngai hta n-gun kya nga ai lam shi hpe tsun dan ya mi.

Numsha ni

⁹ Numsha ni hta grau tsawm htum ai jan e, na a tsaw ra wa gaw kaga ni hte gara hku shai nga a ta? Nang hpe anhte ga sadi jaw ra hkra re ai shi hte seng ai lam gaw kaning rai grai wa mauhpa shara rai nga a ta?

Numsha

¹⁰ Nye a tsaw ra wa gaw tsawm htap nna n-gun ja nga ai; shi gaw masha mun mi hta langai mi rai nga ai.

¹¹ Shi a myi man gaw magri mang nsam hte bung nna manen nga ai; shi a kara gaw magyi ai rai nna, uhka zawn chyang nga ai.

¹² Shi a myi ni gaw ngachyu hte kashin nna, hka shi mayan hku hkrem rai tsap dingren, hka wam makau hkan dung nga ai hkrudu ni zawn tsawm htap nga ai.

¹³ Shi a shabyi ni gaw tsi ru hpun ni hte namji namya ni hte hpring nga ai hkai sun langai zawn tsawm htap nga ai. Shi a nten gaw hka law pan hte bung nna, mura sau kapya bun ai zawn madi nga ai.

¹⁴ Shi a lata ni gaw hkrang tsawm nga ai, shi gaw ja lung seng ni hte hkrep da ai lachyawp ni chyawp da nga ai. Shi a hkum hkrang gaw pri tsawm ai magwi kawng hte bung nga ai; dai hta nila ni hte sup da nga ai.

¹⁵ Shi a magyi ni gaw aja machyaw hta shadun ai lung hpraw shadaw ni rai nga ai. Shi gaw Lebanon bum ni hte tsaw ai marau hpun ni zawn dan hkung ai hte hpung rawng nga ai.

¹⁶ Shi a n-gup gaw pup yang dwi nga ai, shi hte seng ai lam magup gaw ngai hpe shalen la nga ai. Yerusalem numsha ni e, dai lam ni gaw nye a tsaw ra hte bung nga ai.