Shawlumon A Mahkawn Ga 2 - Jinghpaw Common Language Bible 2009

¹ Ngai gaw Sharon pa na nam nampan, bum kadit hkan e tu ai hka law pan sha rai nga nngai.

Lasha

² Ju sumwum lapran hkan tu ai hka law pan zawn nye a nja jan mung numsha ni a ka-ang e rai nga ai.

Numsha

³ Maling htinggram hpun ni a lapran tu ai ja magaw hpun langai zawn, ngai tsaw ra dik htum ai wa mung kaga lasha ni hte shadawn dingdaw lu nga ai. de a asi gaw nye a namchyim hta dwi nga ai rai nna, de a shingnip hta dung nga na ngai tsaw nngai.

⁴ Shi gaw ngai hpe poi galaw ai shi a gawknu de woi wa nna nye a ntsa e tsaw ra dawnghkawn sharawt da nga ai.

⁵ Nye a n-gun hpe sabyi si jahkraw ni hte n-gun ban ya nna; ja magaw si ni hte ngai hpe n-gun awai ya nga a hka! Ngai gaw tsaw ra machyi hte gawng kya nga nngai.

⁶ Shi a pai lata nye a baw npu e nga nga ai; shi a hkra lata ngai hpe ahpum da nga ai.

⁷ Yerusalem numsha ni e, ngai hpe ga sadi jaw mi; anhte a tsaw ra myit hpe nanhte ginjang n shawn lu myit ga, laram ai chyahkyi hte shannga ni hta dagam da nngai.

Lahkawng Ngu Na Mahkawn Numsha

⁸ Nye a tsaw ra nja wa a nsen hpe ngai na nngai. Shi gaw bum ni hpe kagat lai nna kawng ni hpe shingtawt ai hte ngai kaw du sa ai.

⁹ Nye a tsaw ra wa gaw chyahkyi langai zawn rai nna shan-nga kasha hte mung bung nga ai. Yu u, shi gaw bunghku makau e tsap nga ai. Shi gaw hkuwawt hku mada yu nhtawm hkinchyi hku hku praw rai mada yu nga ai.

¹⁰ Nye a tsaw ra nja wa ngai hpe ga shaga nga ai. Nye a nja jan e, sa rit; nye a tsaw jan e, ngai hte rau sa wa ga.

Lasha

¹¹ Nshung ta lai sai; marang mung hpawng sai;

¹² nampu nampan ni pa hkan e pu nga sai. Ndai aten gaw mahkawn kashai ai aten rai nna; hkrudu ni tut du du ai nsen hpe pa hkan e na lu nga ai.

¹³ Lakum si ni mying hpang wa sai; sabyi ru ni mung pu pu nga ai; de a manam pyaw bat gaw nbung hta mawng nga ai. Nye a nja jan e, sa rit; nye a tsaw ra nja jan e, ngai hte rau sa wa ga.

¹⁴ Nang gaw lungkrawp hkan makoi nga ai hkrudu zawn rai nga ndai. Tsaw ra mai ai na a myi man ngai mu lu n-ga; na a ngwi ngawn ai nsen hpe na lu n-ga law.

¹⁵ Chyahkyawn ni, chyahkyawn kasha ni, sabyi sun na pu pu nga ai sabyi ru ni hpe garai n jahten sharun kau lu yang, dai ni hpe rim kau u.

Numsha

¹⁶ Ngai tsaw ra ai wa gaw nye a matu rai nga ai, ngai mung shi a matu rai nga nngai. Shi gaw hkalaw prang yang e shi a sagu hpung hpe

¹⁷ jahpawt bungli bung wa ai aten kaw nna nsin garai n sin ai aten du hkra shayaw da nga ai. Nye a tsaw ra wa e, chyahkyi zawn mung, Behtera bum ntsa na shan-nga zawn mung nhtang wa rit.