Shawlumon A Mahkawn Ga 1 - Jinghpaw Common Language Bible 2009

¹ Pyaw htum ai Shawlumon a mahkawn ga ni.

Langai Ngu Na Mahkawn Numsha

² Na sailen nten hte ngai hpe pup nga ai; na a tsaw ra myit gaw sabyi ntsin hta grau kaja nga ai.

³ Nang hta manam pyaw ai baw bat nga nga ai; na a mying shingteng gaw dai hpe marit nga ai. Numsha kadai mung nang hpe tsaw ra nga ma ai.

⁴ Ngai hpe dun la e, an rau sha tsan tsan de hprawng ga; nye a hkawhkam tai nga u, na a gawk de ngai hpe woi shang wa rit. An rau sha kabu let pyaw nga ga; n dum mat hkra lu nang nna dut dang ai lam n nga ai sha tsaw ra nga ga. Numsha ni yawng nang hpe tsaw ra ai gaw mauhpa n rai nga a hka!

⁵ Yerusalem numsha ni e, ngai gaw chyang nngai rai ti mung tsawm nngai, Kedara nam mali na sum ni zawn chyang ti mung, Shawlumon a hkaw htingnu na nba grang ni zawn tsawm htap nga nngai.

⁶ Ngai hpe jan katen hkra mat ai majaw mung, nye a nsam galai mat ai majaw mung ngai hpe hkum yu kaji nga et. Nye a kahpu kanau ni ngai hpe masin pawt ma ai rai nna, ngai hpe sabyi sun e amu galaw shangun ma ai. Nye a hkum hpe yu lajang na aten chyawm gaw n lu nngai.

⁷ Nye a tsaw nja wa e, na a yam nga hpung ni hpe rem na matu gara shara de woi sa na mung, shani chyingtung kaw nna gara shara hta ban sa na mung, ngai hpe tsun e. Kaga sagu rem ai ni a sagu hpung ni a lapran hta hpa majaw ngai nang hpe hkan tam la ra nga a ni?

Lasha

⁸ Num ni yawng hta tsawm htum ai jan e, dai shara hpe nang n chye n ni? Sagu hpung a hpang hkan sa nna sagu rem ni a sum makau hkan e na a bainam ni a matu udat shara tam la u.

⁹ Nye a tsaw ra n ja jan e, nang gaw Hpara-u leng ni hta lang ai gumra ni hpe gumra yi gaw yu katu kahtet nga ai zawn, lasha ni hpe yu n dawt nga ndai.

¹⁰ Na a shabyi hta noi abya da ai kara gaw yu tsawm nga ai; dai gaw ja lung seng ni zawn na a du hta gali da nga ai.

¹¹ Rai ti mung, anhte gaw gumhpraw hte sumli da ai ja saidawng langai na a matu galaw ya na ga ai.

Numsha

¹² Nye a hkawhkam wa gaw shi a yup ku hta kaleng taw nga ai, nye a manam pyaw ai bat gaw nbung hta manam mawng nga ai.

¹³ Shi gaw nye a sinda ntsa e kaleng nga yang, nye a tsaw ra nja wa gaw mura a manam pyaw bat lu manam la lu nga ai.

¹⁴ Nye a tsaw ra wa gaw Engedi sabyi sun ni hta pu ai nam nampan ni hte bung nga ai.

Lasha

¹⁵ Nye a nja jan e, nang gaw kade sha tsawm htap nga n hka! Na a myi ni mung kade sha yu tsaw ra na zawn htoi tu nga a hka!

Numsha

¹⁶ Ngai tsaw ra dik htum ai wa e, nang gaw kade sha tsawm htap nga n hka! Nang gaw ngai hpe kade sha ra sharawng nga n hka! Tsit lali ai tsingdu pa gaw an a yup ra tai na ra ai;

¹⁷ arit hpun ni mung an a nta ngaudang ni tai na ra ai, marau hpun ni gaw numgaw madin rai na ra ai.